Job 32

1Jobmi kinsantin amigonkunata sayk'uchirqan chanin kasqanta rimaspakama, chaymi paywan churanakuyta tatipurqanku. 2Hinan Buz ayllu Ram miraymanta Baraquelpa churin Eliuqa Jobpaq phiñakurqan, mana huchayoqman tukuspa Diosta huchachasqanmanta. 3Phiñakullarqantaq Jobpa kinsantin amigonkunapaqpas, mana kutichiy atisqankumanta, Diosta qhepapi rikuchisqankumantawan. 4Eliuqa llapankumanta waynallaraq kaspanmi suyakurqan wakinkunaraq Jobwan parlayta tukunankama. 5Ichaqa paykunapas manaña ima niytapas atiqtinkun, mayta phiñakurqan. 6Chaymi nirqan: –Ñoqaqa waynallaraqmi kani, qankunataq kurakkunaña, chaymi manchakuspa yachasqayta mana rimarirqaykichischu. 7Nirqanitaq: Kurak runakunaraq rimachunku, watan-watan yachasqankuta rikuchichunku, nispa. 8Chaywanpas Tukuy-atiyniyoq Señor Diospa samayninmi runataqa yachayniyoqman tukuchin. 9Manan llapan yuyaq runakunachu yachaysapaqa, manan llapan kurak runakunachu chaninkaqtaqa reparan. 10Chayraykun nini: Kunanqa uyariwaychis, ñoqapas yachasqaytan rimarisaq. 11Ñoqaqa ch'inllan uyarikurqani qankunaq imaymana rimasqaykichista, hinallan uyarirqani allin simikuna maskhasqaykichista. 12Allintan rimasqaykichistaqa uyarirqani, manan mayqenniykichispas Jobpa pantasqantaqa reqsichirqankichischu, manan rimasqanman tupaqtapaschu nirqankichis. 13Chayrayku ama niychischu: Yachaytan tariyku, kunanqa Diospuni anyachun, ama runachu, nispaqa. 14Jobpas manan ima niwanpaschu ñoqataqa, ñoqapas manan qankuna hinachu kutichisaq. 15Uyariway, Job: Kay kinsantin amigoykikunaqa sayk'usqan kashanku, paykunaqa manan ima niytapas atisunkikuñachu. 16¿Paykuna upallakuqtinchu ch'inlla kakuyman? Paykunaqa manañan ima niytapas atinkuñachu. 17Ñoqapas kay rimaypi rimaysikusaqmi, ima niytachus munasqaytan nisaq. 18Askha imaymanakunan rimarinay kashan, manapuniñan upallakuyta atirqoshaniñachu. 19T'oqyanay patallapiñan kashani, qara p'uyñupi poqoshaq vino hinallañan kashani. 20Samaranaypaqqa rimarinaypunin, qanmanqa kutichinaypunin. 21Manan pimanpas sayakusaqchu, lliwtapas huk kuskatan qhawarisaq. 22Runa llunk'upayaq kayman karqan chayqa, ñachá Kamaqniyqa chinkachiwanmanña karqan.

will be added

X\