Job 31

1Ñoqa kikiymi allintapuni yuyaykurqani soltera sipaskunatapas mana munapayanaypaq. 2Diosri, ¿hanaqmantapacha imatataq runaman qomun? Tukuy-atiyniyoqri, ¿runaq ruwasqanmanta imatataq qomun? 3Payqa millaykunatan qolluchin, mana chanin ruwaqkunamanmi hatun llakita kachaykun. 4¿Manachu ruwasqayta Diosri rikun? ¿Manachu purisqaykunatapas payri qhawariwan? 5Juranin ima mana chanintapas mana ruwasqayta, mana pillatapas q'otuy yuyaykusqayta. 6Diosqa chaninkaq balanzapi taripawachun, chaypin yachanqa mana ima huchaypas kasqanta. 7Cheqaq ñanmantachus t'aqakurqani chayqa, munapayaywanchus q'otuchikuni chayqa, ima mana allintapas ñoqapi tariwan chayqa, 8tarpusqaykunatapas hukkuna mikhukapuchun, wiñachisqaykunatapas saphinmantaraq t'irapuchun. 9Wak warmiwanchus sonqoyta suwachikuni chayqa, runamasiytachus qhamiyarqani warminwan puñunaypaq chayqa, 10warmiypas huk qharipaq kutapakuchun, paywanqa wak qharikuna puñuchun. 11Chay hina ruwasqay kaqtinqa sinchi millaypunin, muchuchisqapunin kanay. 12Mana thanispa rawraq nina hinachá kanman, cosechaykunatapas llapantachá ruphaykunman. 13Kamachiykuna imachus tupaqninmanta quejakuwaqtin mana uyariqpas tukuymanchu karqan chayqa, 14Dios uyapurachiwaqtinri, ¿imanaymantaq? Pay tapuwaqtinri, ¿imaynatataq kutichiyman? 15Kikin Diosmi wiksapiqa kamawanchis, paykunaqpas ñoqaqpas Payllapunin kamaqninchis. 16Manapunin wakchakunaq mañakuwasqantaqa: Manan, nirqanichu. Manapunin viudakunaq llakikunantapas munarqanichu. 17Manan hayk'aqpas sapallayqa mikhunayta mikhurqanichu, wakchakunamanpas qorillaqpunin kani. 18Wakchakunataqa wayna kayniymantapachan tayta hina qhawarqani, viudakunatapas yanapallarqanipunin. 19Mana p'achayoq q'alakuna chiripi kashaqtinqa, wakchakunapas mana imawanpas p'istuykukunan kashaqtinqa, 20ovejaykunaq millmanwanmi q'oñirichirqani, paykunataq mayta saminchawarqanku. 21Mana tayta-mamayoqtachus makiywan amenazarqani, juzganapi ñoqaman sayapakuwananta yachashaspapas chayqa, 22makiykuna p'akikuchun, rikraymanta urmachun. 23Ñoqaqa Diospa ñak'arichiynintaqa manchakurqanin, ñoqaqa Diospa hatun-kaynintaqa manchakuspan chaykunataqa mana ruwarqanichu. 24Manan qoriymanpas hap'ipakurqanichu, manan qhapaq kayniymanpas k'askakurqanichu. 25Manan askha qhapaq kayniywanpas alabakurqanichu, manan askha qolqeywanpas kusikurqanichu. 26Inti k'anchaqtapas qhawasharqanin, killaq sut'isqantapas rikusharqanin, 27ichaqa manapunin pakallapipas chaykunataqa yupaycharqanichu, manan karumantapas much'arqanichu. 28Chayta ruwayman karqan chayqa, muchunaymi kanman karqan, hanaq pacha Diostachá chaywanqa qheparpariyman karqan. 29Awqaytaqa manan kusipayarqanichu hatun llakipiña rikukuqtinpas, manan asipayarqanichu sasakunapiña rikukuqtinpas. 30Simiyqa manan huchallikurqanchu: Wañuchunraq, nispaqa manan ñakarqanchu. 31Llapan kamachiykunan yachan, wasiyman hamuqtaqa mikhuchiqpuni kasqayta. 32Wak llaqtayoqtaqa manan hawapichu illarichiq kani, purikuqpaqqa kicharayallaqpunin wasi punkuyqa. 33Huchaytaqa manan wakinkuna hinachu pakaykurqani, manan wakinkuna hinachu sonqoypi hap'irqani, 34runata manchakuspayqa, aylluykunaq pisichawananta manchakuspayqa, manapunin wisq'aykukuspa ch'inllaqa tiyarqanichu. 35¡May allinchá kanman pillapas uyariykuwanman chayqa! Sutiy seq'esqaywanmi rimasqayta mat'ipani. ¡Kunanqa Tukuy-atiyniyoq Dios kutichimuwachun! Qelqasqapi rikuchiwachun tumpawasqankunata. 36Ñoqaqa kusisqan chay qelqata rikray patapi apasaq, umay patapiraq coronata hina churakusaq. 37Diosmanraq tukuy ima ruwasqaymanta willakusaq, mana p'enqakuspan ñawpaqenman asuykusaq. 38Hallp'aychus contrayta hanaq pachaman waqyakun chayqa, wachunkunapas llakikuymanta waqan chayqa, 39mana pagaspachus cosechasqankuta hap'ikapurqani chayqa, chaypi llank'aqniykunamanchus mana pagarqani chayqa, 40hallp'aykuna trigo rurunanmantaqa khiskata ruruchun, cebada rurunanmantaqa asna qora wiñachun, nispa. Kaypin Jobqa tupapakuyta tukupun.

will be added

X\