1 Kunantaq ichaqa ñoqamanta asikunku, ñoqamantapas aswan waynakunaraq, taytankutapas manapunin munarqanichu uywa michiq alqokunawan kanallantapas. 2 ¿Imapaqtaq paykunaq kallpanri serviwanman karqan? Paykunaqa sayk'usqa runakunañan karqanku. 3 Yarqaymanta pisipaymantawan machuyasqa, tutapas ch'inneqpa ch'usaqninpin ch'aki saphikunallataña q'awtirqanku. 4 Ch'aphra-ch'aphrakunamantan p'osqo qorakunata pallakurqanku, retamaq saphintawanpas mikhurqanku. 5 Runamasinpa qarqosqankunan karqanku, suwata hina qaparkachakuspa qatiykachasqakunan karqanku. 6 Ch'aki mayuq k'aktunkunapin tiyarqanku, qaqa-qaqapin pampa t'oqokunapin tiyarqanku. 7 Ch'aphra-ch'aphrakunapin qaparkachaspa purirqanku, chaykunaq pachanmanmi suchuykurqanku. 8 Mana valeq runakuna, mana taytayoq q'aqa runakuna, suyunkumantapas qarqosqa mana serviq runakuna. 9 Kunantaq ichaqa chaykunaq wawankuna asipayawanku, ñoqamanta rimaspan imaymana rimayman wasapachinku. 10 Millakuwaspankun ñoqamanta karunchakunku, uyaypiraqmi thoqaykuwanku. 11 Diospa kay hina k'umuchisqanña kashaqtiymi ima munasqankuta ruwawanku. 12 Qayllaymanmi askhallaña huñurqakamunku, hinaspan qhepaman kutichiwanku, kumpaytapuni munawaspan phawaykuwanku. 13 Ñanniytan wisq'arqowanku, askha llakikunawanmi ñit'iykuwanku, manataqmi pillapas yanapaykuwanchu. 14 Perqaq hatun q'asantan hunt'aykamuwanku, mancharikuytaraqmi phawaykamuwanku. 15 Llaksakuymi ñoqataqa chiriyarqachipuwan, respetasqa-kayniypas wayra hinan pasakapun, kaqniyoq kayniypas phuyu hinan ch'usaqyarqapun. 16 Manañan kawsayta atiniñachu, llakikuymi ñoqataqa ñit'iykapushawanña. 17 Nanaymi tulluykunamanña haykurqapun, tutakunapas sinchitapunin ch'akakakawan. 18 Diosmi much'uymanta kallpawan hap'irqowan, mat'i kunkayoq p'acha hinan mat'irqowan. 19 T'uru-t'urumanmi chanqaykuwan, ñut'u hallp'a hinan, uspha hinan kapuni. 20 Diosníy, waqyakamuqtiypas manan uyariwankichu, qayllaykamuykiña chaypas yanqallan qhawarimuwanki. 21 Ñoqapaqqa awqa sonqo runa hinan tukupunki, llapan kallpaykiwanmi qatiykachawanki. 22 Hap'iykuspan wayrawan apachiyta yuyaykuwanki, manchay tutuka hatun wayrawanmi chhaphchichiwanki. 23 Allintan yachakuni wañuyman qatiwashasqaykita llapan runapaq waqaychasqa cheqasman. 24 Sasachaypi rikukuspa ñak'ariq runa yanapayta waqyakuqtinqa, manan pipas aswan hatun llakiwan yapaykunchu. 25 Ñoqari, ¿manachu muchuqmantapas waqarqani? Ñoqari, ¿manachu pisichikuqtapas khuyapayarqani? 26 Ñoqaqa kusikuytan suyakurqani, mana allin-kaytaq chayamuwan. K'anchaytan suyakurqani, laqhayaqtaq aypamuwan. 27 Sonqoypas mana thaniykuspan phataqeshawan, llaki phutiy p'unchayllañan suyashawan. 28 Khuyaytan yanayaykapushani intiq k'anchaynintapas mana rikuspa, llapa runaq qayllanpin yanapaytapas mañakuni. 29 Chacal animalkuna hinaraqmi aullakushani, suri animalkuna hinaraqmi qaparishani. 30 Aycha qaraypas yanayaykapuspan t'akarikapushan, tulluykunapas fiebrewanmi ruphapakushan. 31 Qenaypas waqay-waqaytañan tocapushan, arpaypas llakiy-llakiytañan waqapushan.
