1 Jobqa manaña imanakuytapas atispan paqarisqan p'unchaytaraq ñakarqan. 2 Hinaspan nirqan: 3 –¡Ñakasqa kachun paqarisqay p'unchayqa! ¡Ñakasqa kachun “Qharin wawayki” nisqanku tutaqa! 4 ¡May kusachá chay p'unchay tutayanman karqan, Diospas manaña qhawarimunmanchu karqan, k'anchaypas manaña sut'iykamunmanchu karqan! 5 ¡May kusachá yana llanthuq pakaykusqan kanman karqan, yana phuyuq qataykusqan kanman karqan, amaña intipas chay p'unchay k'anchanmanchu karqan! 6 ¡May kusachá chay tutaq laqhayaqpi chinkapuyninqa kanman karqan! Chay p'unchaypas wataq killanpa p'unchayninkuna ukhupi manaña yupasqachu kanman karqan. 7 ¡May kusachá yanqa-qasi tuta kanman karqan, kusikuymanta qapariypas manaña kanmanchu karqan! 8 ¡May kusachá chay p'unchayqa layqakunaq ñakasqan kanman karqan, paykunaqa atiyniyoqmi Leviatanta hap'inankupaqpas! 9 ¡May kusachá chay paqarqa ch'askapas ama k'anchanmanchu karqan, suyakusqanku sut'iyaypas ama sut'irimunmanchu karqan, pachaq illarimuyninpas ama rikukunmanchu karqan! 10 ¡Ñakasqa kachun paqarisqay tutaqa kay hina ñak'ariyta rikunaypaq paqarichiwasqanmanta! 11 ¿Imaraykun mana wiksallapiraqchu wañukapurqani? ¿Imaraykun mana nacerqamuspa hinachu wañukapurqani? 12 ¿Imapaqraqmi hoqariykuwarqanku? ¿Imapaqraqmi ñuñuykuwarqanku? 13 Wañukapuyman karqan chayqa, kunan horas llakhichá samakushayman karqan, thak-nisqachá puñukushayman karqan 14 reykunawan kamachikuqkunawan kuska, hatuchaq wasikuna sayarichiqkunawan kuska, 15 llaqta kamachiqkunawan kuska, qoriwan qolqewan wasinman hunt'aykachiqwan kuska. 16 ¿Imaraykun sullusqata hinachu mana p'ampawarqanku, manaraq paqarimushaspa wañukapuq wawata hinachu? 17 Hallp'aq sonqonpin tukukapun millay runaq mana allin ruwayninkunaqa, chaypiqa sayk'usqakunapas samariytan tarin. 18 Chaypiqa p'analla llank'aqkunapas thak-kaytan tarin, chaypiqa llank'achiqpa k'amisqantapas manan uyarinkuñachu. 19 Chaypiqa kuskan kashanku hatunpas huch'uypas, uywaqninpa kacharparisqanmi kapun kamachipas. 20 ¿Imaraykun Diosqa ñak'ariq runaman k'anchayta rikuchin? ¿Imaraykun Diosqa sonqo nanay muchushaq runata kawsachishallan? 21 Chay runaqa wañupuyllatañan munashan, manataq wañunchu. Wañuytan pakasqa illamantapas aswantaraq maskhashan, manataq tarinchu. 22 Chay runaqa wañuspallañan kusikuyta tarin. 23 ¿Imapaqñan Diosqa kawsachin mayman rinantapas mana yachakuq runata, llapa ladonmanta mat'iykusqa runata? 24 Mikhunaypas hik'ipakuyllañan, nanaymanta qapariyniypas qocha phoqchiq hinaraqmi. 25 Llapan manchakusqay kaqkunan chayamuwan, aswan llaksakusqay kaqkunan patayman urmaykamuwan. 26 Manan samaykuniñachu, manan takyaykuniñachu, manan thak-kayta tariniñachu, aswanmi sinchi llakikuyllapiña kashani, nispa.
