Job 29

1Jobqa rimallarqantaqmi: 2–¡May kusachá kanman qayna killakunaman kutikapuyman chayqa, Diosninchispa yanapawasqan p'unchaykunaman kutikapuyman chayqa! 3K'anchayninwanmi sut'iriwarqan, laqha tutayaqpi puriyta atinaypaq. 4Allin poqosqa kashaqtiymi, Diosninchisqa wasiyta qhawarispa saminchawarqan. 5Tukuy-atiyniyoq qayllaypi kashaqtinqa, wawaykunapas sumaqtan muyuriqniypi tiyaykurqanku. 6Uywaykunan askhallataña lecheta qowarqan, qaqa-qaqakunapiraqmi olivo sach'aykunapas wiñarqan. 7Llaqta haykunapi huñukuna cheqasman riqtiymi, huñukuna plazapi tiyaykuqtiymi, 8rikurqamuwaspanku waynakunapas huk ladoman suchurirqanku, kurak taytakunapas sayariykurqanku, 9qollana runakunapas rimashaspa upallaykurqanku, siminkutapas makinkuwan wisq'akurqanku, 10kamachikuqkunapas rimashaspan samp'ayaykurqanku, llapallankun ch'inyaykurqanku. 11Uyariqniykunan ñoqamanta allinta rimarqanku, rikuwaqniykunan: Kusapunin, niwarqanku. 12Ñoqaqa sapa kutillan “yanapaykuway” niq wakchakunata horqorqani, mana tayta-mamayoq wikch'usqakunatan yanaparqani. 13Hatun pisipaypiña kashaqkunan saminchawarqanku, viudakunaq sonqontan kusichirqani. 14Runaqa p'achawan churakunpunin, chay hinan ñoqapas allin kaqtaqa ruwaqpuni kani, runaqa sombrerowanpas ponchowanpas churakunpunin, chay hinan ñoqapas chaninkaqtaqa ruwaqpuni kani. 15Ñoqaqa ñawsakunaq ñawinmi karqani, such'ukunaqpas chakinmi karqani, 16pisichikuqkunaqpas taytanmi karqani, wak llaqtayoqkunaqpas amachaykuqninmi karqani. 17Ñoqaqa awqa sonqo runaq atiynintapas thuniqmi karqani, makinpi kashaq runakunatapas qechuqmi karqani. 18Ñoqaqa nirqanin: P'unchayniykunaqa qocha aqo hinachá kanqa, wañukusaqpas yuyaqllañachá kikin wasiypipuni. 19Mayu patapi mallkisqa sach'a hinan kani, raphiykunatapas tuta sullan ch'aranchan. 20Sumaq-kayniyqa mosoqpunin kanqa, kallpaypas aswan allinraqmi kapuwanqa, nispa. 21Lliwpas makillañan uyariwaqku, kunasqaykunatapas ch'inllan uyariqku. 22Ñoqaq rimasqaytaqa manan pipas rimapaqñachu, rimarisqaymi paykunapaq iphu para hina karqan. 23Paykunataq yanqallaña suyarayakuqku, paraqtin kusikuq chakra llank'aq hinan simiytaqa chaskiqku. 24Asirikuqtiypas paykunaqa ñak'ayllatan creewaqku, kusisqa uyaytan makillaña qhawawaqku. 25Ñoqan paykunaq kamachiqninkuqa karqani, paykunaq ima ruwanankupaqpas ñoqan yuyaykuq karqani, soldadonkunaq chawpinpi rey hinaraqmi karqani, llakisqaña kaqtinkupas kusichiqmi karqani.

will be added

X\