1 Kanmi qolqe horqona mina, kanmi maypichus qori ch'uyanchana. 2 Fierropas hallp'amantan horqokun, cobrepas rumikunata unuyachispan ruwakun. 3 Runaqa hallp'aq ukhu sonqonman haykuspan tutayaqllapi mina rumita maskhan, chaypin laqhayaqtapas k'anchayninwan p'unchayman tukuchin. 4 Llaqtakunamantapas sinchi karupin, ranra qhatapin mina t'oqota hasp'in, ch'inneq ch'usaq cheqaskunapin runakunaqpas mana purinankunapin waskhapi warkuykusqa llank'anku. 5 Patan hallp'apin mikhuykuna wiñaykushan, pachanpitaq nina rawrachisqa hinaraq kaykushan. 6 Chay qaqakunapin anqas umiña kashan, qoripas hallp'awan chhaqrusqan kashan. 7 Manan ima suwa ankakunapas mina ñantaqa rikunchu, waman ankapas manallataqmi hayk'aqpas rikunchu. 8 Salqa animalpas manan chaynintaqa purinchu, leonkunapas manallataqmi saruykunkuchu. 9 Runaqa ch'ila qaqatan t'oqon, orqoq saphintaraq t'iramun. 10 Qaqakunapin suchuna t'oqokunata ruwakun, chaypitaqmi imaymana qhapaq kaykunata tarin. 11 Mayukunaq paqarimusqantapas qhawararqamunmi, sut'imanmi horqomun pakasqa kaqkunatapas. 12 Chay hinari, ¿maymantataq yachayri hamun? ¿May cheqaspitaq kashan yuyayniyoq-kayri? 13 Runaqa manan yachanchu yachaypa maypichus tiyasqantapas, manan runa ukhupipas tarinchu. 14 Chinkay-chinkay ukhupas: Manan kaypiqa kanchu, ninmi, lamar-qochapas: Manan ñoqaqa hap'inichu, nillantaqmi. 15 Manan ch'uya qoriwanpas tarikunmanchu, manan qolqewanpas rantikunmanchu. 16 Manapunin chaninniyoq qoriwanpas rantikunmanchu, manapunin alqa umiñawanpas, anqas umiñawanpas tarikunmanchu. 17 Qorimanta qespimantapas aswan chaninniyoqpunin, manapunin rantikunmanchu ch'uya qori alhajakunawanpas. 18 Yachaywan tupachisqaqa coralpas qespipas yanqan, perlamanta aswan chaninniyoqqa yachaypunin. 19 Yachaywan tupachisqaqa Etiopía suyu q'ellu umiñapas yanqan, manapunin sinchi chaniyoq qoriwanpas rantikunmanchu. 20 Chay hinari, ¿maymantapunitaq yachayri hamun? ¿May cheqaspipunitaq yuyayniyoq-kayri kashan? 21 Ima rikch'aq animalkunapas manan yachaytaqa rikunchu, phalaq animalkunapas manan chaytaqa rikunchu. 22 Wañuy-pachawan aya p'ampanawanpas ninkun: Yachaymantaqa rimaqllatan uyariyku, nispa. 23 Ichaqa Diosllan reqsin yachaypa ñannintaqa, payllan yachan maypi kasqanta. 24 Payllataqmi hallp'aq cantonmanta cantonkamaraq rikun, hanaq pacha urapi kaqtapas llapallantapunin reqsin. 25 Diosqa wayraman kallpata qoshaspan, lamar-qochamanpas qorpata churashaspan, 26 paraq parananpaqpas kamachikuyta churashaspan, chikchiq mayninta purinantapas kamachikushaspan, 27 rikullarqantaq yachaypa imayna chaniyoqchus kasqanta, allinta qhawarispataq: Allinmi, nirqan. 28 Hinaspan Diosqa runakunata nirqan: –Ñoqa Señor Diosta manchakuymi yachayniyoq-kayqa, mana allin-kaymanta t'aqakuymi yuyayniyoq-kayqa, nispa.
