Job 27

1Jobqa nillarqantaqmi: 2–Tukuy-atiyniyoq Diospa sutinpin jurani, paymi chaninchawayta mana munanchu, paymi kawsayniyta hayaman tukuchin. 3Chaytukuywanpas samarinaypaq kallpata qowanankamaqa, kawsanay p'unchaykamaqa, 4manapunin llullakusaqchu, manapunin ima waqllisqa simitapas rimasaqchu. 5Manapunin rimasqaykichistaqa: Hinapunin, nisaqchu, kawsanaykamaqa: Mana huchayoqmi kani, nillasaqpunin. 6Mana huchayoq kashaspaqa manan hinata nichikuymanchu, kawsanaykamaqa manan sonqoy huchachawanqachu. 7Awqayqa millay runa hina muchuchisqa kachun, contrayqa mana chanin runa hina ñak'arichisqa kachun. 8¿Ima suyakuytaq kanman huchasapa runapaq, Diosninchis kawsayninta qechurqapuqtinri? 9Hatun sasachakuypiña rikukuqtiypas, Diosqa manapunin mañakusqaykunata uyarinqachu. 10Payri, ¿Tukuy-atiyniyoq Dioswan kusikunmanchu? ¿Sapa rato hina Diosmanta mañakunmanchu? 11Kunanqa Diospa hatun atiyninmantan yachachisqaykichis, Tukuy-atiyniyoqpa yuyaykusqankunatan rikuchisqaykichis. 12Ichaqa llapaykichisñan rikurqankichis, chay hinari, ¿imanaqtintaq yanqa qasi rimankichis? 13Kay hinan millay runapaq Diospa wakichisqan muchuchiyqa, kay hinan awqa sonqo runapaq Tukuy-atiyniyoqpa unanchasqan ñak'ariyqa. 14Askhaña wawankuna kanqa chaypas awqa-tinkuypin wañupunqaku, wawankunaña kanqa chaypas yarqaymantan wañunqaku. 15Wawankunamanta qhepaqtapas qonqay onqoymi wañuchinqa, viudankunapas manan paykunamanta waqanqakuchu. 16Millay runaqa hinaña hallp'ata hina qolqeta montonqa chaypas, askhataña p'achata montonqa chaypas, 17chanin runan chay waqaychasqa p'achawanqa churakapunqa, ch'uya runakunan chay qolqetapas phasminakapunqa. 18Millay runaq wasinqa thutaq q'esan hinallan, chakra patapi qhawaqpa ch'ukllan hinallan. 19Allin qhapaqmi puñunanmanqa siriykunqa, rikch'arinqataq wakcha, mana imallayoqña. 20Q'aqchakuyqa chayamun para lloqlla hinan, q'aqyaqeyqa tutaq sonqonpin payta apapun. 21Inti lloqsimuy rupha wayran payta aparqapun, wasinmantapas aparikapuqtinmi chinkapun, 22hinaña kallpachakunqa ayqekunanpaq chaypas, payta mana khuyapayaspan wayranqa, 23manchay-manchayta t'oqyasparaqmi wayraqa qatiykachanqa.

will be added

X\