Job 26

1Chaymi Jobqa kutichirqan: 2–Mana kallpayoqtari, ¿maypitaq kay hinata yanapana? Laqhoyasqatari, ¿maypitaq kay hinata kawsarichina? 3Pisi yuyayniyoqtari, ¿maypitaq kay hinata yuyaychana? ¡Kusa allintamá yachasqanki! 4¿Pitaq yanaparqasunki kay simikunata rimanaykipaqri? ¿Pitaq yuyaycharqasunki chay hinakunata rimanaykipaqri? 5Wañuqkunaqa manchay llaki phutikuypin kashan, qochaq pachanpi tiyaqkunapas manchakuymantan chhaphchikunkuraq. 6Wañuy-pachaq ukhuntaqa llapantapunin Diosqa rikun, aya p'ampanaqa Diospa ñawpaqenpi kicharparisqan. 7Diosqa ch'usaq patapin hanaq pachata mast'arin, chay ch'usaqllapitaqmi hallp'a pachatapas warkuykun. 8Phuyukunamanmi unuta hunt'achin, unuq llasaykusqan phuyupas manataqmi phatanchu. 9Huk phuyuwan pakaykuspan pura killata qataykun. 10Diosqa lamar-qochaq muyuriqninmanpas churanmi qorpata k'anchaymanta tutayaqta t'aqananpaq. 11Diosninchis phiñakamuqtinqa, hanaq pachaq tusankunapas manchakuymantan chhaphchikunku. 12Atiyninwanmi lamar-qochata astawan phoqchiqechirqan, yachayninwanmi hatunkaray Rahab animaltapas ñut'urqan. 13Phukuriqtinmi q'alarparikun hanaq pachapas, makinwanmi sipirqon qowa hina mach'aqwaytapas. 14Chaykunaqa manan ruwasqankunamantaqa imapasraqchu, uyarisqanchispas samp'a rimay hinallaraqmi, ¿pitaq entiendeyta atinman atiyniyoq kunkantari? nispa.

will be added

X\