Job 24

1¿Imaraykun Tukuy-atiyniyoqqa taripanan p'unchaykunata mana willakunchu? ¿Imaraykun Diosta reqsiqkunaqa taripanan p'unchaykunata mana yachankuchu? 2Millay runakunaqa chakraq qorpantan suchurichinku, ovejakunatapas suwakuspan michinku. 3Mana tayta-mamayoqpa asnontapas qechunkun, viudaq torontapas paganankaman hap'inku. 4Wakchakunatan mana uyariq tukunku, mana imayoq runakunan paykunamanta pakakun. 5Mana imayoqkunan k'ita asnokuna hina lloqsinku ch'in pampapi sinchi sasawan mikhunanku maskhaq, chay ch'inneqmantan wawankupaq mikhunata tarimunku. 6Wak chakrakunamantan trigo choqllokunata pallakamunku, mana chanin runakunaq uvas chakrankunamantan qhellakamunku. 7Tutan paqarinku q'alalla mana qatanayoq kaspa, manan imallankupas kanchu chirimanta hark'aykuqninku. 8Orqopi parawanmi lliwta hallch'uchikunku, qaqallatan oqllaykunku pakakunata maskhaspanku. 9Viudamantan wawanta ñuñukushaqtin qechunku, wakchakunaq qholla wawantan manumanta paganankama qechunku. 10Wakchakunaqa q'alallañan purinku, trigo q'epiykusqan yarqaymanta wañushanku. 11Olivos sach'akuna chawpipin aceiteta ch'irwanku, uvastan sarunku vinota ruwakunankupaq, chaywanpas ch'akiymantan wañushanku. 12Llaqtaq karunmanraqmi uyarikun wañunayaqkunaq anchisqan, k'irisqakunan waqyakunku yanapaykunapaq. Diostaq ichaqa chay mana allinkunata qhawarparillan. 13Wakinkunan k'anchayta cheqnikunku, tukuy puriyninkupitaq k'anchaymanta t'aqakunku. 14Runa wañuchiqqa rankhi-rankhillataraqmi puñunanmanta sayarin, hinaspan wakchata mana imayoqtawan wañuchin, tutatañataq suwakuq puririn. 15Wasanchay huchapi puriq runaqa tutayaykunantan suyakun, uyantapas allintan pakaykukun, mana pipas rikunanta yuyaspa. 16Suwakunaqa tutan wasikunaman winaykukun, ch'isiyaq p'unchaytaq ichaqa wasinkupi wisq'arayanku, p'unchaytaqa manan rikuytapas munankuchu. 17Paykunapaq p'unchayqa laqhayaq tuta hinan, aswantaqa munanku tutaq manchay ch'ampiqyaynintan. 18Millay runaqa mayu phosoqo hinan, hallp'anpas ñakasqan kapun, manataq pipas llank'anñachu uvas chakrantaqa. 19Chiraw tiempo ruphaymi rit'itaqa chulluchin, chay hinallatataqmi huchasapataqa Wañuy-pacha chinkachin. 20Kikin mamanpas paymantaqa qonqapunmi, kurukunan misk'itaraq paytaqa mikhuykapun, manan pipas millay runamantaqa yuyarikunñachu, mallki wit'usqa hinan payqa kumpakapun. 21Mana wachakuq warmitan mana allinta ruwarqan, viuda warmitan mana khuyapayarqanchu. 22Ichaqa Diosmi chay atiyniyoqkunata kallpanwan chinkachin, pay muchuchiyta munan chayqa, millay runaqa manan kawsanñachu. 23Hinallata Dios qhawaqtinmi suwaqa waqaychasqa kasqanta yuyaykun, ichaqa Diosmi lliw purisqanta qhawashan. 24Millay runaqa huk ratollan hatunchasqa, chaymantataq chinkarqapun, yuyu t'irasqa hinan ch'akirqapun, qholla trigo choqllo wit'urparisqa hinan kapun. 25Mana chayri, ¿pitaq kunan rimasqayta: Llullan, ninman? ¿Pitaq rimasqayta yanqa rimayman tukuchinman? nispa.

will be added

X\