1 Chaymi Jobqa kutichirqan: 2 –Kunanpas nanasqa sonqoyoqraqmi Dios contra quejakuni, hinaña anchishani chaypas Diospa makinqa ñit'ishawanraqmi. 3 ¡Maytan munayman maypichus Diosta tariyta! ¡Maytan munayman Diospa tiyasqanman chayayta! 4 Paypa qayllanpitaq imayna kasqayta rimariyman, hinapuni kasqayta sut'inchaspa willakuyman. 5 Ñoqataq yachayman ima nispachus kutichiwasqanta, yachallaymantaq ima nispachus niwasqanta. 6 Payri, ¿munayniyoq kaspachu contraypi sayarinman? Manan, aswanmi uyariwanman. 7 Chaypin chanin runaqa tupapakuyta atinman, juezniypa ñawpaqenmantaqa mana huchachasqan ripuyman. 8 Inti lloqsimuy ladopin maskhamuni Diosta, chaypiqa manan kanchu, inti haykuy ladopin maskhamuni Diosta, chaypipas manan tarinichu. 9 Wichay ladopi Dios llank'ashaqtinqa manan rikunichu, uray ladoman kutipuqtapas manallataqmi huk ratopas rikunichu. 10 Chaytukuywanpas payqa lliw purisqaytan yachan, ch'uyanchawaqtinqa qori hina ch'uyan kasaq. 11 Paypa sarusqantakaman ñoqaqa sarurqani, ñannintapas mana mayman q'ewirispan purirqani. 12 Llapantan kamachikuy siminkunataqa hunt'arqani, siminkunatan sapa p'unchay mikhunaymantapas aswantaraq munarqani. 13 Pay sapallanpunin Diosqa, ¿pitaq churanakunman? Payqa munasqantan ruwan. 14 Ñoqawan ima ruway yuyaykusqantan ruwanqa, chay hina yuyaykusqanqa askhapunin. 15 Chayraykun ñawpaqenpiqa manchakuni, llapan chaykunamanta yuyarispan payta manchakuni, 16 Diosmi kallpayta chiriyachin, Tukuy-atiyniyoqmi q'aqchawan. 17 Tutayaqpas manan ch'inyachiwanchu, laqhayaqpas manan upallachiwanchu.
