Job 22

1Temán llaqtayoq Elifazmi kutichirqan: 2–Diospaqri, ¿imapaqtaq runari valenman? Yachayniyoqña kaspapas, ¿ima allintaq Diospaqri kanman? 3¿Ima allintaq kanman Tukuy-atiyniyoqpaqri chanin runa kasqaykiri? ¿Ima allintaq kanman Diospaqri mana huchachana kasqaykiri? 4¿Qan yuyankichu: Dios sonqo runa kaqtiymi payqa anyawan, chay hawan payqa juzganapi huchachawan, nispayki? 5Manan, huchaykikuna sinchillaña kaqtinmi, millay ruwasqaykikuna umanta wasapaqtinmi, chaytaqa nisunki. 6Wawqeykiq p'achantan paganankama yanqa qasi ch'utirqanki, p'achanta ch'utispan q'alallata qatirparipurqanki. 7Sayk'usqamanmi unuta mana haywarirqankichu, yarqasqamanmi mikhunatapas mana qoykurqankichu. 8Munayniyoq runa, tukuypa k'umuykunan kaspaykin suyuntin hallp'ata hap'ipakurqanki. 9Viudakunatan mana imayoqta kacharparipurqanki, mana tayta-mamayoqkunatan yanqalla llak'achikurqanki. 10Chaymantan watuchasqa rikukunki, qonqaylla llaksasqa kapushanki. 11Manan imatapas rikupunkichu tutayarqoqtin, manchay suchuq unuq millp'usqanmi rikukunki. 12¿Diosqa manachu hanaq pachaq hawanpiraq tiyan? Qhawariy Diosta, imayna altopiña kashan ch'askakuna chaypas, payqa aswan hawanpiraqmi kashan. 13Chaytukuywanpas qanqa ninkin: ¿Imatan yachan Dios? ¿Phuyuq pakasqan ukhumanta chaninchamunmanchu? 14Payqa yana phuyu ukhupin kashan, chaymi hanaq pachapi kayneqman haqayneqman purispa mana rikuwanchischu, nispa. 15¿Millay mana chanin runakunaq purisqan ñawpa ñantachu kaqta puriyta munanki? 16Paykunaqa manaraq wañunanpin qonqay wañupurqanku, poqoy mitapi mayuq qhochusqan hina. 17Paykunaqa Diostan nirqanku: –¡Hatariy ñoqaykumanta! Tukuy-atiyniyoq Dios kaspari, ¿imanawankikumantaq? nispa. 18Chaywanpas Diosmi wasinkuman imakunapas hunt'achiqqa, ñoqan ichaqa mana chaninkunaq yuyaychayninmanta t'aqakuni. 19Millay runakunaq ñak'arisqanta rikuspan chanin runakunaqa kusikunku, mana huchachana kaqkunapas paykunata asipayaspan ninku: 20¡Cheqaqtapunin awqanchisqa thunisqa kashan! ¡Ninan qhapaq kayninta ruphaykapun! nispa. 21Wakmanta Dioswan allipunay, chay hinapin wakmanta t'ikarinki. 22Chaskillay paypa yachachisqanta, umaykipi hap'iqay siminkunata. 23Tukuy-atiyniyoq Diosman kutirikuspan wakmanta sayarinki: Wasiykimantachus mana allin kayta wikch'unki, 24qoriykitachus q'opaman wikch'upunki, chaninniyoq qoriykitachus mayuman hich'aykunki chayqa, 25Tukuy-atiyniyoq Diosmi qoriyki hina kanqa, paymi allinnin qolqeyki hina kanqa. 26Paymi kusikunayki kanqa, sonqopas-sonqotaq hap'ipakunki. 27Imatapas mañarikuqtiykiqa paymi uyarisunki, qanpas ima rimarisqaykitapas hunt'anki. 28Ima yuyaykusqaykipipas allinkaman kasunki, ñanniykipipas ima sumaqtan k'ancharisunki. 29Diosqa hatunchakuq runatan k'umuykachinqa, payqa k'umuykukuq runatan qespichinqa. 30Qanpa ch'uya kasqayki hawan yanqanmanta huchachasqa runatapas Diosqa horqonqa, nispa.

will be added

X\