Job 21

1Chaymi Jobqa kutichirqan: 2–Rimasqayta makilla uyariykuwaychis chayllawanpas kusirichiwaychis. 3Upallakuychisyá rimanaykamaqa, chaymantaña asikuychispas munaspaqa. 4Quejayqa manan mayqen runawanpaschu, chayraykun sonqoy mana tiyanchu. 5Qhawariwaspa mancharikuychis, mancharikuymanta upayaychisraq. 6Imachus kawasqanta yuyarispaqa llaksakuniraqmi, ukhuyraqmi q'estiriwan. 7¿Imanaqtintaq millay runakunari kawsashallankupuni? ¿Imanaqtintaq yuyaq kanankukama qhapaq kayninkuwan atiyniyoq kashanku? 8Wawankuq kawsasqantaraqmi rikunku, nietonkuq ima sumaq wiñasqantaraqmi rikunku. 9Mana piqpa imanasqanmi wasinkupi kawsanku, Diospas manan imamantapas muchuchinchu. 10Toronkunapas allin muhun, wakankunapas mana sulluspan wachan. 11Wawankunapas oveja hinaraqmi, erqenkunapas pukllaspa tusunkuraqmi. 12Paykunaqa takinkun arpawan tinyawan, paykunaqa kusikunkun qenawan. 13Kawsayninkupiqa allillanpunin kanku, mana imata muchuspallan wañukapunku. 14Chaytukuywanpas Diostaqa ninkun: ¡Ñoqaykumanta hatariy! Manan munaykuchu munayniykiman hina kawsaytaqa. 15¿Pitaq Tukuy-atiyniyoq Diosri kamachinta ruwanaykupaq? ¿Imatataq tarisaqku ñawpaqenpi mañakuspari? nispa. 16Millay runaq allin kayninqa manan paymantachu, paykuna hina yuyanaytaqa Diospas amapuni munachunchu. 17¿Hayk'a kutitan millay runaq k'anchaynin wañun? ¿Hayk'a kutitan hatun llaki paykunaman chayan? ¿Hayk'a kutitan Diosqa phiñakuspa paykunata ñak'arichin? 18¿Hayk'a kutitan q'opa hina phukusqa kanku? ¿Hayk'a kutitan tutuka hatun wayrawan apachikunku? 19Diosqa taytanpa huchanmantan wawankunata ñak'arichin, ninkun. Ñoqataq nini kikinpunin chaskinan huchanmantaqa Diospa muchuchiyninta, chhaynapin yachanqa huchanmanta ñak'ariy kasqanta. 20Pay kikinpunin muchuchisqaqa kanan, pay kikinpunin Tukuy-atiyniyoq Diospa phiñakuynintaqa chaskinan. 21Wawankunapaq imaña kaqtinpas, ¿imataq paymanri qokun wañupusqan qhepatañari? 22¿Pitaq atinman imatapas Diosman yachachiyta? Paymi juzgan hanaq pachapi atiyniyoqkunatapas. 23Wakin runan kallpallanpi wañukapun kusisqa llakhillataq kashaspa, 24allin wirayasqa qhali runa rakhu tulluyoq kashaspa ima. 25Wakinkunataq ichaqa llakisqalla wañun, kawsashaspaqa manan hayk'aqpas kusikuyta tarirqanchu. 26Hallp'aq sonqonpiqa kuskallapunin kapunku, iskayninkutataq kurullapuni mikhupun. 27Ñoqaqa allintan yachani ñoqamanta yuyaykusqaykichista, contraypi millay yuyaykuyniyoq kashasqaykichista. 28Qankunaqa tapukunkichis: ¿Maytaq chay hatun wiraqochaq wasinri? ¿Maypitaq chay millay runaq karpanri? nispa. 29¿Manachu qankunaqa puriqkunaman rimakurqankichis? ¿Manachu paykunaq willakusqantapas uyarirqankichis? 30Paykunan ninku: Diosninchis phiñakuspa hatun llakita kachamuqtinpas, millay runataqa manan imananpaschu, nispa. 31Manan pipas uyanpiqa ima kasqantapas laq'anchu, manataqmi pipas mana allin ruwasqanmantaqa muchuchinchu. 32Wañuqtinpas p'ampanapaq apapunkupachan p'ampakusqan cheqastapas makillan qhawashanku. 33P'ampanapaq apaqtinkun llapalla ima sumaqta puriysinku, mana yupay atiyraqmi rinku, p'ampakusqan hallp'apas paytaqa sumaqllatañan chaskiykun. 34Chhaynaqa, qankunaq kusichiy munawasqaykichisqa yanqan, ¡q'otukuykaman ima niwasqaykichispas! nispa.

will be added

X\