Job 20

1Naamat suyumanta Zofarmi kutichirqan: 2–Umaytan wasapawanki, manan sonqoy tiyanchu, chayraykun kutichisqayki. 3Millayta rimaspan anyawanki, ichaqa ñoqapas yachanin imayna kutichiyta. 4Qanqa yachankipunin ñawpa p'unchaymantapacha, kay pachapi runaq kasqanmantapacha, 5millay runaq kusikuyninqa pisi p'unchayllapaq kasqanta, mana allin runaq q'ochukuyninpas huk ratollapaq kasqanta. 6Chay runaq hatunchakuyninqa hanaq pachamanraqpas aypachun, phuyumanraqpas uman taripashachun, 7qhepamanqa hatun hisp'ay hinan kapunqa, amigonkunapas: ¿Maypitaq kapunri? nispan tapukunqaku. 8Mosqoy hinan pasapunqa, tuta musphay hinan chinkapunqa, manataq pipas tarinqañachu. 9Rikuqninkunapas manan rikunqakuñachu, wasinmantapas hukpaqkaman chinkapunqa. 10Wawankunan wakchakunaman kutichipunqaku, churinkunan taytanpa suwakusqanmanta kutichipunqaku 11Kallpallanpiraq wayna kashaspan hallp'aq sonqonman chinkaykapunqa. 12Hinaña mana allinkuna siminpaq sumaq karqan chaypas, hinaña qallunpa pampanpi hap'irqan chaypas, 13hinaña siminpi hap'irayarqan chaypas, mana aqtuyta munarqanchu chaypas, 14mikhusqanqa hayamanmi wiksanpi tukunqa, ch'unchulninpiqa mach'aqwaypa venenonmanmi tukunqa. 15Llapan oqosqan qhapaq kaykunatan aqturqamunqa, wiksanmantan Diosninchis wikch'uchimunqa. 16Mach'aqwaypa venenontan ch'onqanqa, mach'aqwaypa picasqantaqmi wañunqa. 17Payqa manan rikunqañachu olivo aceite mayu hinaraq phawaqta, manan rikunqañachu lechetapas miel misk'itapas mayu hinaraq phawaqta. 18Llank'asqanwan ima hayk'a tarisqantan llapanta kutichipunqa, qhapaq kaykuna tarisqantaqa manapunin malliykunqachu. 19Wakchakunatan sarunchaspa wikch'upurqan, runaq wasinkunatan hap'ikapurqan. 20Manan hayk'aqpas yarqayninta thanichikurqanchu, manan pipas hap'ipakusqantaqa qechurqanchu. 21Manan imapas oqorqonanmantaqa ayqerqanchu, chayraykun allin-kayninqa mana takyarqanchu. 22Hunt'asqa imanpas kashaqtinmi hatun llaki taripanqa, imaymana phutikuykunan payta ñit'iykunqa. 23Wiksanta hunt'achiqtinmi Diospa k'arak phiñakuynin payman aypanqa, parata hinaraqmi phiñakuyninta chayachimunqa. 24Fierro maqanamantaña ayqenqa chaypas, broncemanta p'eqtawanmi ayparqachinqaku. 25Wach'isqataqmi aychantaraq huk ladoman pasarqonqa, chhipipishaq ñawch'inpas rurunnintaraqmi lloqsirqamunqa, chaymi mayta mancharikunqa. 26Manchay laqhayaqmi paypaqqa wakichisqa kashan, Diospa ninanmi payta ruphanqa, payta ruphaspapas wasintawanraqmi tukunqa. 27Hanaq pachan huchanta q'alarparinqa, kay pachataqmi pay contra sayarinqa. 28Pay patapi Diospa phiñakuynin llimp'ariqtinqa, wasinpi lliw qhapaq kayninmi ch'usaqyachisqa kapunqa. 29Chay hinatan Diosqa millay runapaq wakichin, chay hinan Diospa unanchasqan p'uchukayqa kanqa, nispa.

will be added

X\