Job 2

1Señor Diosmanmi angelninkuna huk kutitawan qayllaykurqanku, Satanaspas paykunawan kuska qayllaykullarqantaq. 2Chaymi Señor Diosqa payta nirqan: –¿Maymantan hamushanki? nispa. Satanastaq nirqan: –Kay pachaq k'uchun-k'uchunta purimusqaymantan, nispa. 3Hinan Señor Diosqa tapuykullarqantaq: –¿Kamachiy Jobta qhawarirqankichu? Pay hina chanin runaqa manan kay pachantinpi kanchu. Payqa tukuy sonqonwanpunin serviwan, mana allin ruwaymantapas t'aqakunpunin. Hinaña mana ima huchanmanta muchuchinaypaq tanqariwarqanki chaypas, payqa qaqatapunin iñiyninpi sayan, nispa. 4Hinan Satanasqa Señor Diosman kutichirqan: –Manataq cuerponta llamiykunkichu chayllayá allin kashan. Qhali kashaspaqa, tukuy imantapas runaqa qoyta atinmi, kawsayninta qespichinanraykuqa. 5Pay kikinta llamiykuwaq, chayñayá yachawaq imaynataraqchus uyaykipi ñakasunkiman chayta, nispa. 6Señor Diostaq kutichirqan: –Chay hinaqa, ima munasqaykita payta ruwamuy, ichaqa aman wañuchinkichu, nispa. 7Satanastaq Señor Diospa qayllanmanta ripurqan, hinaspan Jobpa aycha qaranta sarnaman rikch'akuq millay onqoywan tukurqachirqan, uma mukukunmanta chaki puntankama. 8Hinan Jobqa ripurqan uspha montonpi tiyakuq, manka p'akisqa k'arpawantaq qhetukurqan. 9Warminpas nillarqantaq: –Kay hinataña ñak'arishaspapas, ¿qaqataraqchu iñiyniykipi sayashanki? ¡Diosta ñakay, hinaspa wañuy! nispa. 10Qosan Jobtaq kutichirqan: –¡Yaw, warmi, mana yuyayniyoq warmi hinan rimashanki! Diospa lliw allinkuna qowasqanchista chaskishaspaqa, ¿imaynataq mana chaskillasunmantaqchu mana allinkunatapas? nispa. Chay hinaña kashaspapas Jobqa manapunin imatapas Dios contraqa rimarqanchu. 11Jobpan karqan kinsa amigonkuna, Temán llaqtayoq Elifaz, Shúa suyumanta Bildad, Naama suyumanta Zofarpiwan. Paykunan Jobta imaymana llakiq qatisqanta yachaspanku wasinkumanta puririrqanku, hinaspan watuykukuq riyta yuyaykurqanku, payta tiyapayaspa nanayninkunamanta llakipayanankupaq sonqochaykunankupaqwan. 12Jobta karumanta qhawarimuspankutaq mana reqsiytapas atirqankuchu, chaymi qaparispa waqaykurqanku, llakikuymantataq p'achankutaraq llik'ikurqanku, hallp'atapas hanaqman hach'ispan umankuta hallp'acharqanku. 13Chaymantataq paywan kuskapacha pampapi tiyaykurqanku qanchis p'unchay qanchis tutatawan, mana huk simillatapas rimapayaspa, sinchi khuyay nanayniyoq kasqanta rikuspanku.

will be added

X\