Job 19

1Chaymi Jobqa kutichirqan: 2–¿Hayk'aqkaman ñak'arichiwankichis? ¿Hayk'aqkaman simiykichiswan k'iriwankichis? 3Kuti-kutirisparaq k'amiwankichis, mana p'enqakuspan siminchawankichis. 4Ñoqaña huchayoq kayman chaypas, ñoqamanmi huchayqa chayawanqa. 5Qankunaqa yuyankichis ñoqamanta aswan allin kasqaykichistan, ñak'arisqayta rikuspan: Huchanmantan muchun, niwankichis. 6Allinta yachanaykichispaqpas ñoqataqa Diosmi kumpawan, paypunin llikanwan hap'irqowan. 7Ñoqaqa qaparini: ¡Mana chanintan ruwashawan! nispa, manataq pipas uyariwanchu, mañakunin yanapayta, manataq pipas chaninchawanchu. 8Diosmi purinayta wisq'arqowan mana chimpanaypaq, ñanniytapas tutayarqachinmi. 9Hatunchasqa kayniytapas qechurqapuwanmi, allinpaq hap'isqa kayniytapas chinkarqachipunmi. 10Kay hina raqay-raqaypin saqerpariwan, suyakuyniytapas mallkita hinan t'irarqapun. 11Contraypin k'arakta phiñakun, awqanta hinan qhawaykuwan. 12Llapan soldadonmi aswan-aswanta qayllaykuwan, karpa qhepaykunapin muyuykuwan, phawaykuwananpaqmi wakichikunku. 13Diosmi wawqeykunata karunchachiwan, amigoykunapas karupiñan ñoqamanta kashan. 14Familiaykunapas lliwmi ñoqamanta t'aqarikapun, amigoykunapas lliwmi qonqapuwanku. 15Qorpachasqaykunapas wak llaqtayoqta hinan qhawariwanku, uywasqay sipaskunapas wak runata hinan rikuwanku. 16Uywasqay runata waqyarikuqtiypas manan uyariwanchu, imaymana sumaqta valeykukuqtiypas manan uyariwanchu. 17Warmiypas simiypa asnasqantan millakun, wawaykunapaqpas millaytan asnapuni. 18Erqekunapiwanpas pisicharpariwanmi, hatarishallaqtiyraqmi k'amimushawankuña. 19Sinchi munasqay amigoykunapas cheqnikapuwanmi, munakusqay kaqkunapas contraypin sayaripunku. 20Aychaypas qaray ukhupin ismupushan, tulluypas kiruy hinañan q'alarqakapushan. 21Amigoykuna, khuyapayaykuwaychisyari, Diosmi makinwan muchuchishawan. 22¿Imanaqtinmi qankunapas Dios hina qatiykachawankichis? ¿Manachu saksankichis kay hinata khaskawaspaykichis? 23¡May allinchá kanman pillapas rimasqayta qelqanman chayqa, huk qelqa k'uyupi seq'enman chayqa! 24¡May kusachá kanman pillapas fierro cincelwan k'awaspa rumipipas titipipas wiñaypaq qelqasqata saqenman chayqa! 25Allintan yachani Qespichiqniy kawsashasqanta, paypunin qhepa p'unchaypi sayarimunqa ñoqamanta rimariq. 26Hinaña aychay urmaqashaqtin wañupusaq chaypas, ñoqaqa kikiypunin Diosta rikusaq. 27Ñoqaqa ñawiywanpunin rikusaq, ñoqa kikiypunin, manan hukchu. ¡Maytapunin chayta munashani! 28Qankunataqchus ninkichis: ¡Imaynatataq qatiykachasunmanri! ¡Pay kikinpin mana allin-kayqa kashan riki! nispa chayqa, 29manchakuychis espadaq ñak'arichinasuykichista, Diosmi phiñakuspa qankuna hina rimaqtaqa muchuchispa wañuchin, chaypin yachankichis chanin juez kasqanta, nispa.

will be added

X\