Job 18

1Shúa suyumanta Bildadmi kutichirqan: 2–¿Hayk'aqkamataq manari upallankichu? Chaninchasqata rimaqtiykiqa rimaysiykikumanmi. 3¿Imanaqtintaq uywata hinari qhawariwankiku? ¿Waq'amantaraqtaq qhawaykuwankikupas? 4¿Yuyankichu renegasqa pelapakuqtiyki kay pacha qanpaq ch'usaqyananta, qaqakunapas tiyasqanmanta anchhurinanta? 5Millay runaqqa k'anchayninpas phukusqan kanqa, q'onchanpi ninapas manan rawranqachu. 6Karpanpi k'anchaqpas tutayapunqan, ladonpi lamparanpas wañupunqan. 7Allintan sarurqan, kunantaq yanqallaña, pay kikinpa yuyaykusqanwanmi urmaykapun. 8Pay kikinpa chakinmi llikaman aysaykun, chay llikapitaqmi mayt'usqa rikukun. 9Chaki talonninmantan huk toqlla hap'irqon, chaytaqmi allintapuni kanirqon. 10Ñan purinanpin kashan sipita pakasqa, ñan purinanpin kashan huk toqlla churasqa. 11Llapa ladonmantan llaksakuy muyuykun, manchakuymi sapa thaskisqanpi qatiykachan. 12Hatun llakin payta suyashan oqorqonanpaq, kumpakuqtinqa hukpaqkamallaña ñit'irqonanpaq. 13Onqoyqa pisi-pisimantan aychata mikhun, onqoyqa wañuypa willaqninmi, chakintan makintan oqon. 14Wasinpi thak-nisqa tiyasqanmantapas wikch'usqan, manchakuy wañuy reypa qayllanman aysasqan. 15Karpantapas ninan ruphaykapun, tiyasqankunapas azufrewan hach'iykusqan. 16Ch'akisqa saphiyoq mallki hinan, t'awisqa k'allmayoq sach'a hinan. 17Paymantaqa kay pachapi manan yuyarinkuñachu, manañataqmi sutinpas hoqarisqañachu, 18k'anchaymantan tutayaqman wikch'uykapunqaku, kay pachamantan qarqopunqaku. 19Mirayninpas manan llaqtanpi kanqachu, wasinpiqa manan pininpas kawsanqañachu. 20Inti haykuy suyu runakunan chayta yachaspa llaksakunqa, inti lloqsimuy suyu runakunan chayta uyarispa q'aqchakunqa. 21Chaypin millay runaq kawsayninqa tukukun, chay hinatan Diosta mana reqsiq runaqa tukukun, nispa.

will be added

X\