Job 17

1Mana kallpayoqñan karqapushani, kawsayniymi p'uchukayninman chayarqapushanña, aya p'ampana t'oqon suyamushawanña. 2Cheqaqtapunin burlakuqniykunalla muyuykushawan, tukuy p'unchaymi cheqnikuwasqankutaqa yachashani. 3Qanllan, Diosníy, ñoqamantaqa rimariwaq, manan pipas ruwanmanchu aswanqa qanllapunin. 4Qanmi yuyayninkutapas muyurqachinki, chayraykun mana munanichu atipawanankuta. 5Qolqerayku amigonta hap'iykachiq runaqqa wawankunan ñawsayaspa muchunqa. 6Diosmi runaq siminman churaykuwan, chaymantapas uyaypin thoqaykuwanku. 7Nanaymantan ñawiypas tutayaykapun, ñoqapas yanqa llanthullañan kashani. 8Chayta rikuwaspan chaninkunaqa musphankuraq, mana huchayoqkunan millay runakunapaq phiñakunku. 9Chaywanpas chaninkunaqa allintan sayanqaku, chaninta ruwaqkunaqa aswan-aswantan kallpachakunqaku. 10Kunantaq llapaykichis qayllaykamuwaychis, manan qankunapiqa hukllatapas yachayniyoqta tarisaqchu. 11Kawsasqay p'unchaykunan tukukapun, yuyaykusqaykunan lliw ñut'ukapun, lliw munasqaykunan qaqapapun. 12Qankunan ichaqa p'unchaytapas tutaman tukuchinkichis, laqhayaq ch'ampiqpi kashaspapas: Sut'irimushanñan, ninkichis. 13Kunanqa suyakushani wañuyllatañan, laqhayaqpi siriykuspan puñuykapusaq. 14Aya p'ampanatan: Taytáy, nisaq, kurukunatan: Mamáy, panáy, nisaq. 15Chay hinari, ¿maytaq suyakuyniyqa? ¿Maypitaq kapun allin-kayniyqa? 16¿Ñoqawan kuskachu Wañuy-pachaman uraykunqaku? ¿Ñoqawan kuskachu hallp'aq sonqonman haykupunqaku? nispa.

will be added

X\