Job 16

1Chaymantataq Jobqa kutichirqan: 2–Askhatañan kikintakama rimasqaykichista uyarini, sonqochawanaykichistaqa ñak'arichiwankichismi. 3¿Mana tukukuqchu kanqa chay yanqa rimayri? ¿Imataq chay hinatari rimachisunkichis? 4Qankuna ñoqa hina rikukuwaqchis chayqa, ñoqapas chhaynallatataqmi rimayman, asipayakuq hina umaywan chhaphchipayaykichisman, k'arak simikunawantaq qhansaykuykichisman. 5Ñoqaqa kallpachariykichismanmi sumaqta rimaspa, kusirichispan qhaliyarichiykichisman. 6Rimaqtiypas manan nanayniyqa thaninchu, ch'inlla kaypas manallataqmi qhaliyachiwanchu. 7Diosmi kallpayta tukurqospa sayk'uchiwan, llapan wawaykunatapas lliwta ch'usaqyachipurqan. 8Paymi kay hina ch'akisqa qawi uyaman tukuchiwan, chaymi runakuna yuyanku huchaymanta muchusqayta, tulluyayniymi contraypi rimarin. 9Diosmi qatiykachashawan, phiñakuspataq llik'irqariwan, león hinan contraypi kiruntaraq k'utupakushan, awqaypas kanman hinan qhawapayashawan. 10Runakunan contraypi huk-hinamanraq tukunku, pisichawaspankun uyaypikama ch'aqlaykuwanku, askha runan contraypi huñuykakamun. 11Diosmi qaraykuwan yana alma runaq makinman, Diosmi wikch'uykuwan awqa sonqo runaq makinman. 12Allillanpuni kashaqtiymi, Diosqa much'uymanta hap'irqowan, q'apirqowaspan ñut'urqapuwan, ñoqamankaman wach'iykushawan. 13Tukuy ladoymantan wach'irqariwan, mana khuyapayaykuspan wiksayta sat'irqariwan, hayaqeytaraqmi t'oqyachiwan. 14K'iriykunatan aswantaraq k'iripaykuwan, maqanakuypi tupaq hinaraqmi phawaykuwan. 15Llakikuymantan qhasqa p'achawan ukhuyman churaykukuni, kallpa chiriyasqan hallp'api tiyapushani. 16Waqashaqtiy hinan uyaypas p'aspayan, ñawiypas t'oqoyarqapun. 17Manan pitapas ima mana chanintapas ruwarqanichu, mañakushanipas ch'uya yuyaywanmi. 18Hallp'a, yawarniyta ama pakaykuychu. ¡Waqyakusqayqa uyarisqapuni kachun! 19Hanaq pachapiqa kanpunin ñoqamanta rimariq, haqaypiqa kanpunin ñoqamanta sayarikuq. 20Diospa ñawpaqenpi waqashaqtiymi amigoyqa ñoqamanta mañapuwan. 21Paymi Diospa ñawpaqenpi hukkunapaq valepakun imaynan huk runa amigonpaq valepakun hinata. 22Pisi tiempollaña kawsanaypas tukurqakapushanñan, kunallanmi ripusaq mana kutimuqllaña.

will be added

X\