Job 15

1Temán llaqtayoq Elifazmi rimarqan: 2–Yachayniyoqri, ¿yanqa simiwanchu kutichinman? Yachayniyoqri, ¿k'arak simikunatachu rimanman? 3¿Rimayllachu rimanman? ¿Yanqa qasichu seqachinakunman? 4Qanqa Dios manchakuqtapas cheqaq hap'ipakuqtapas pantachishankin. 5Qanpa huchaykin chay hinata rimachisunki, q'otukuq simikunatan rimanki. 6Qanpa simiykin huchachasunki, manan ñoqachu, qanpa rimarisqaykin contraykipi sayarin. 7Qanri, ¿kay pachapi manaraq pipas kashaqtin karqankiñachu? Qanri, ¿paqarirqanki manaraq orqokuna kashaqtinchu? 8Qanri, ¿uyarirqankichu Diospa pakallapi yuyaykusqankunata? Qanri, ¿yuyankichu sapallayki kay pachapi yachayniyoq kasqaykita? 9¿Imatan qan yachanki ñoqaykuq mana yachasqaykuta? ¿Imatan qan reparanki ñoqaykuq mana reparasqaykuta? 10Soqo umayoq yuyaq taytakunan ñoqanchis ukhupi kashan. ¡Paykunaqa taytaykimantapas aswan yuyaqkunañan! 11¿Manachu saksanki kikin Diospa sonqochasqanwan? Ñoqaykupas paypa rantinpi llamp'u simiwanmi rimapayashaykiku. 12¿Imanaqtinmi sonqoykiwan q'otuchikunki? ¿Imanaqtintaq ñawiykipas ch'illmipakun? 13¿Imanaqtintaq Dios contra k'arakta phiñakunki? ¿Imanaqtintaq millay simi kacharisqata rimanki? 14¿Pi runallapas ch'uya kanmanchu? ¿Runamanta paqariqqa chanin kanmanchu? 15Manan angelninpipas Diosqa confiakunchu, ñawinpaqqa hanaq pachapas manan ch'uyachu. 16¡Imayna aswanraqchá millay waqllisqa runaqa! ¡Imayna aswanraqchá hucha ruwaywan misk'illikuq runaqa! 17Kunantaq hukta nisqayki, uyariykuway: Kawsayniypi yachaqasqaytan willasqayki. 18Kayqa yachaysapakunaq yachachisqanmi, kayqa ñawpa taytankumanta yachaqasqankuta mana pakaykuspa yachachisqanmi 19(chay ñawpa taytankumansi kay suyupas qosqa kasqa, manaraq wak llaqtayoqkunapas haykushaqtin). 20Millay runaqa tukuy kawsasqan p'unchaymi muchushallanpuni, awqa sonqo runaqa pisi p'unchayllan kawsan. 21Ninrinqa uyarishallanpunin llaksakuykunata, llat'anaqqa llakhi kashasqan horasmi phawaykun. 22Manan kanñachu suyakuynin wañuymanta ayqenanpaqqa, paytaqa huk puñalmi wañuchinanpaq suyamushan. 23Ayanpas suweq'araq mikhunanpaqmi kanqa, payqa yachakunmi thunikuyninqa llaksakuyraq kananta. 24Laqhayaqmi llaksakuywan hunt'aykushan, phutikuywan hatun llakiwantaqmi musphachishan, awqa-tinkuypi phawaykuq rey hinaraq. 25Kaykunan kan makinkuta Diosman haywariqkunapaqqa, Tukuy-atiyniyoqta atipayta yuyaykuqpaqqa. 26Phatu chuchu escudowan pakaykukuspan Dios contra manchanataraq phawaykun. 27Payqa kashan wirasapallañan, uyanpas wiksanpas hatunllañan. 28Chaytukuywanpas payqa tiyanqa purunyasqa llaqtapin, payqa tiyanqa thunisqa wasikunapin, ch'usaqyapunan patapi kashaq wasikunapin. 29Manañan qhapaqchu kapunqa, lliw kaqninpas ch'usaqyapunqan, manan llanthullanpas kay pachapi rikukunqañachu. 30Laqhayaqmantaqa manapunin ayqenqachu, ch'ikchin ruphasqa mallki hinan kanqa, Diospa phukurparisqan hinan kanqa. 31Pay kikinta q'otukuspa mana valeqpi suyakuqqa, manan imatapas chaskinqachu. 32Manaraq imanpin k'allmanqa naq'epunqa, manataqmi hayk'aqpas q'omeryanqañachu. 33Mana hayk'aq poqoq uvasniyoq yura hinan kanqa, t'ikan urmasqa olivos sach'a hinan kanqa. 34Millay runaqqa manapunin mirayninqa kanchu, lluk'iykuqkunaq tiyanan karpakunaqa ninaq ruphasqanmi kanqa. 35Chay millaykunaqa mana allinkaqtan wiksallikunku, paykunaqa mana chaninkaqtan wachakunku, llapan yuyaykusqankunapas hukkunata q'otunallapaqpunin, nispa.

will be added

X\