1 Warmimanta paqariq runaqa pisi p'unchaynillayoqmi, askha sasachayniyoqmi, 2 t'ika hina phanchiriq, chaymantataq ch'akirqapuq, llanthu hina chinkaripuq. 3 ¿Chay hina runatachu qhawaykuwanki? ¿Chay hina runatachu ñawpaqeykipi taripawanki? 4 ¿Pitaq atinman qhellita ch'uyaman tukuchiyta? ¡Manapunin pipas! 5 Runaq p'unchayninkunaqa yupasqallañan, hayk'a killa kawsanantapas qanmi unancharqanki, kawsaypa qorpan churasqaykitaqa manan wasapanmanchu. 6 Amaña qhawaykuyñachu, thak-kaypi saqepuy, llank'apakuq hina tutallapas samaykuchun. 7 Sach'ata wit'uqtinkuqa kanraqmi ch'ikchin kutimunan, manapunin mana ch'ikchispaqa qhepapunmanchu. 8 Mullphaña saphin kashanman chaypas, saphiña hallp'api ismupushanman chaypas, 9 unuq ch'aqchuykusqanwanqa q'omeryarillanqapunin, qholla sach'a hinaraqmi sumaqta raphicharikunqa. 10 Runan ichaqa hukpaqkamallaña wañukapunqa, wañukapuspari, ¿maypitaq kashan? 11 Qochapi unuqa waksirinraqmi, mayukunapas ch'akipunmi, 12 chay hinan runaqa wañuspa mana sayarinqachu, hanaq pachaq kashanankamaqa puñusqanmanta manan rikch'arinqachu. 13 May kusachá kanman phiñakuyniykiq thaninankama Wañuy-pachapi pakaykuwankiman chayqa, ñoqamanta yuyarikunaykipaqtaq huk p'unchayta churawaq chayqa. 14 Runari, ¿wañuspa kawsarinñachu? Ñoqaqa suyakusaqmi muchusqay p'unchaykuna tukukunankama, suyallasaqpunin kacharisqa kanay p'unchaykama. 15 Waqyamuwaqtiykiqa kutichimusqaykin, kamasqayki runamanta sonqoykita “ch'allaq” nirichinki. 16 Chaypachan llapan sarusqayta qhawanki, qhawawaspaykiqa manañan huchachawankiñachu. 17 Pantasqaykunatapas manañan yuyarinkiñachu, huchaykunatapas llapantan p'ampapunki. 18 Orqokunapas pisi-pisimanta urmaspan thunikun, qaqakunapas chinkapunmi wak ladoman sinkukuspa. 19 Rumitapas unuqa thantanmi, hallp'atapas paraqa qhochunmi, chay hinatan, Diosníy, runaq suyakuynintaqa chinkachinki. 20 Qanmi runataqa hukpaqkamallaña atipanki, hinan ripunqa, qanmi runata aya uyaman tukuchispa kachapunki. 21 Wawankunaña allinpaq hap'isqa kaqtinpas, wañuqqa manañan yachanchu, hatun llakipi wawan kaqtinpas, wañuqqa manañan rikunchu. 22 Pay kikillanñan nanayta reparakun, pay kikillanmantañan llakikun, nispa.
