Job 13

1Lliw kaykunatan rikunipuni, ninriykunawanpunin uyarini. 2Qankunaq yachasqaykichistaqa ñoqapas yachallanitaqmi, qankunamantaqa manan imapipas pisichu kani. 3Aswanmi Dioswan rimayta munani, Tukuy-atiyniyoqwanmi churanakuyta munani. 4Qankunaqa llullakuywanmi cheqaqkaqta pakashankichis, qankunaqa hampiq purispa mana qhaliyachiqkunan kankichis. 5¡Qankunachus ch'inyaykuwaqchis ratollapas chayqa, yachaysapa runaman yupasqan kawaqchis! 6Ama hinachu kaychis, uyariykuwaychispuni, allinta uyariykuwaychis defendekusqayta. 7¿Yuyankichischu llullakusqaykichiswan Diosman sayapakusqaykichista? ¿Yuyankichischu q'otuq simikunawan Diosta servisqaykichista? 8¿Qankunari Diospa rantinpi churakuwaqchischu? ¿Qankunari Diosman sayapakuytachu munankichis? 9Ichaqa, ¿imaynataq kankichis Diosninchis t'aqwisuqtiykichis? Runata hina, ¿Diosninchista q'otuyta atiwaqchischu? 10Llullakuspachus Diosman sayapakunkichis chayqa, cheqaqtapunin Diosqa anyasunkichis. 11¿Diospa hatun kayninri manachu llaksasunkichisman? ¿Qankunari manachu q'aqchakuwaqchis? 12Ñawpaq thawtisqaykichisqa uspha hinallan, ch'ampa perqa qhepamanta hark'apakuy hinallan. 13¡Kunanqa upallaychis! Ñoqapas rimaytan munani, ¡imapas hayk'apas kawachun! 14Kawsayniytan churani, hina wañusaqpas, kawsayniytaqa makiypin hap'iykusaq. 15Manan suyakuyniy kanñachu, hina wañuchiwachunpas, chaytukuywanpas uya-uyapuran tupapakuyta munani. 16Chay hinapichá qespikuyta atiyman, millay runaqa manataqmi Diospa qayllanman haykunmanchu. 17Uyariwaychis rimasqayta, qankunaman rimapayasqayta. 18Ñoqapas rimarikuytan munani, allintan yachakuni chaninchasqa kanayta. 19¿Pipas hamushanchu ch'atawananpaq? Chay hinaqa, ch'inllan uyariykuspa wañukapusaq. 20Diosnilláy, huk iskay cosasllatawanmi munani qowanaykita, manataqmi qanmanta pakakunichu. 21Amañayá ñak'arichiwaychu, amapuniñayá kay hinata llaksawayñachu. 22Rimapayamuway, ñoqataq kutichimusqayki, icha, ¿ñoqaraqchu rimapayasqayki qantaq kutichimuwanki? 23Diosníy, ¿imakunaraqmi huchay? Willaykuway huchallikusqaykunata. 24¿Imanaqtinmi mana qhawariwankichu? ¿Imanaqtinmi awqaykita hina rikuwanki? 25Wayraq apanan ch'aki raphi hinallan kani, chayri, ¿imanaqtintaq ch'usaqyachiyta munawanki? Chhapa hinallan kashani, ¿imanaqtintaq qatiykachawanki? 26Imaymana muchuywanmi ñak'arichiwanki, wayna kasqaymantaraqmi hoqariwanki. 27Chakiykunatan thunkuwanki, purinaykunatan makilla qhawanki, manan kuyurinayta munankichu. 28Runaqa ismusqa k'ullu hinan wanurikapun, thutaq k'utusqan p'acha hinan ñut'urikapun.

will be added

X\