1 Chaymi Jobqa kutichirqan: 2 –¡Arí, qankunaqa llaqta taytakunapunin kankichis! ¡Wañuqtiykichisqa manan ima yachaykunapas kanqachu! 3 Ichaqa ñoqapas yuyaynillayoqtaqmi kani, imapipas manan sullk'achu qankunamantaqa kani. ¿Pitaq mana yachanchu lliw chaykunatari? 4 Diosta waqyakuqtiyqa uyariwarqanmi, chaywanpas amigoykunaqa burlakuwanmi. Ñoqaqa mana huchachana chaninmi kani, chaywanpas runakunaqa asipayawanmi. 5 Qhali kashaqkunaqa onqosqataqa pisichanmi, urmaq hina kaqtapas tanqarparinmi. 6 Suwakunaqa thakmi wasinkupi tiyakushan, Diosta phiñachiqkunapas llakhillan kawsakushan, paykunaqa kallpankumanpunin hap'ipakunku. 7 Tapukuy uywakunata, paykunan yachachisunki, tapukuy phalaq animalkunata, paykunan willasunki. 8 Tapukuy hallp'a pachata, paymi yachachisunki, tapukuy lamar-qochapi challwakunata, paykunan willasunki. 9 Icha, ¿mayqenninkupas kanmanraqchu llapanta Diospa ruwasqanta mana yachaq? 10 Diospa makinpin animalkunaq kawsayninqa kashan, paypa munayninpin runakunaq kawsayninqa kashan. 11 Ninriwan uyarispan allinta mana allinta reparan, mikhunata malliykuspan sumaq mana sumaq kasqanta yachan. 12 Kurak taytakunapin yachayqa kashan, askha watayoq runakunapin yuyayniyoq kayqa kashan. 13 Diosllan yachayniyoqpas atiyniyoqpas, paymi yuyaychan, lliwtataq entienden. 14 Diospa thunisqantaqa manan pipas wakmanta perqanmanchu, Diospa wisq'asqantaqa manan pipas kicharinmanchu. 15 Dios mana parachimuqtinmi llapa hallp'a ch'akirqapun, Dios parata kacharimuqtinmi lliw hallp'aman llinp'aykun. 16 Diosmi kallpayoqqa, paytaqmi imapipas atipaqqa, Diospa munayninpin kashan q'otusqakunapas yukaqkunapas. 17 Diosmi yuyaychaqkunaq umanta muyurichin, juezkunatapas waq'ayachin. 18 Paymi reykunaq atiyninta qechupun, kamachimantaq tukuchipun. 19 Sacerdotekunatan llank'ananmanta p'enqayta wikch'upun, allin takyasqa kamachikuqkunatan qarqopun. 20 Lliwpa hap'ipakunan allin kunaykukuqtapas manan rimarichinchu, allin yuyayniyoq kurak taytakunatapas musphachinmi. 21 Allin wiraqochakunatapas mana imapaqmi qhawarin, allin kallpayoqkunatapas kallpantan chiriyachin. 22 Mana piqpa rikusqan pakasqakunatapas sut'imanmi horqomun, ch'ampiq laqhakunatapas sut'imanmi tukuchin. 23 Diosmi suyukunataqa hatunchanpas thuninpas, hatunyachinpas chinkachinpas. 24 Kay pachapi umalli runakunaq yuyaynintapas qechunmi, ch'inneq ch'usaqpi purishaqtapas tumaqayachinmi. 25 Laqha tutayaqpi purishaspan llamipakunku, machasqata hinan thampiykachachin.
