Job 11

1Naamat suyumanta Zofarmi chay simikunaman kutichirqan: 2–¿Chay hina thawtisqaman manachu kutichikunman? Manan pipas askha rimasqanwanchu allinpaq hap'isqa. 3¿Qan, yuyankichu thawtisqaykiwan ñoqayku ch'inyachiyta? ¿Chanzakusqaykita ch'inllachu uyariykuman? 4Qanmi ninki: Yachachikuyniyqa cheqaqmi, Diospa ñawpaqenpiqa ch'uyan kani, nispa. 5¡May kusachá kanman Dios kutichimusunkiman chayqa! ¡May kusachá kanman qan contra rimarimunman chayqa! 6¡May kusachá kanman Diosqa pakasqa yachaymanta rikuchisunkiman chayqa! Yachayqa ancha musphanan, iskay uyayoqmi, hukkaq uyallantan reqsinki, hukkaq uyantaqa manan reqsinkiraqchu. Allinta yachakuy: Diosqa manan llapan huchaykiman hinaraqchu muchuchishasunki. 7¿Diospa pakasqa yuyayninman aypayta atiwaqchu? ¿Tukuy-atiyniyoqpa hatun-kayninta entiendeyta atiwaqchu? 8Chaykunaqa hanaq pachamantapas aswan alton, qanqa, ¿imatan yachawaq? Chaykunaqa Ukhu-pachamantapas aswan ukhun, qanqa, ¿imatan yachawaq? 9Chaykunaqa hallp'a pachamantapas aswan hatunpunin, chaykunaqa lamar-qochamantapas aswan anchopunin. 10Diosqa hamuspan carcelman wisq'asunkiman, juzganamanmi chaninchanankupaq apasunkiman, ¿pitaq Diostari hark'ayta atinman? 11Payqa yachanmi mayqenchus llulla kasqanta, payqa rikunmi mana chaninkunata, icha, ¿hinallatachu qhawarinman? 12Mana yuyayniyoq runaq, yuyayniyoq kayninqa may sasan, salqa asnomanta runaq naceyninpas sinchi sasan. 13Chaytukuywanpas yuyaykukuy cheqaqkaq yuyayta, Diosmanta mañakuy yanapanasuykipaq, 14hucha q'epintin kashaspaqa wikch'upuy, ama munaychu mana chanin ruwaykuna wasiykipi kananta. 15Chay hinapin, ch'uya kaspayki wichayman qhawariyta atinki, mana imata manchakuspataq qaqata sayanki. 16Muchusqaykikunatapas pasaqta qonqapunki, unu chinkaykapuqta hinallañan yuyarinki. 17Kuskan p'unchaypi inti k'anchariy hinan kawsayniyki k'ancharinqa, laqhayaqmi pacha illariyman tukupunqa. 18Suyakuy kasqanrayku sonqopas-sonqo kawsakunki, Diospa waqaychasqanpunin misk'ita puñukunki. 19Manapuniñan pipas mancharichisunkichu samakuqtiyki, askha runan amigoyki kayta munanqaku. 20Millay runaqqa ñawinpas tutayanqan, ayqenanpaqpas manan maypas kanqachu, payqa wañuyllatañan suyakunqa, nispa.

will be added

X\