Job 10

1Manapuniñan kawsaymanchu, chayraykun quejakuspa ima atisqayta rimasaq, nanaymanta llakikuspaymi ima munasqayta rimasaq. 2Diosniytataq nisaq: ¡Ama huchachawaychu! ¡Willaway imamantapunin huchachawanki! 3¿Allinchu rikch'akusunki kay hinata muchuchiwayniyki? ¿Allinchu rikch'akusunki kamawasqaykita saqerpariwayniyki, millay runakunaq yuyaykusqantataq allinpaq hap'ispayki? 4¿Qanri runa hinachu qhawanki? 5¿Qanri runa hinallachu pisi p'unchayta kawsanki? ¡Manapunin! 6Chay hinari, ¿imanaqtintaq purinki pantasqayta maskhaspayki? ¿Imanaqtintaq purinki huchayta tapupakuspayki? 7Mana huchayoq kasqaytapas qanmi aswan allinta yachanki, manan pipas makiykimantaqa horqowanmanchu. 8Qanpunin makiykikunawan ruwawarqanki, kunanri, ¿ch'usaqyachiytañataqchu munashawanki? 9Yuyariy t'urumanta ruwawasqaykita, chayri, ¿wakmantachu ñut'u hallp'aman tukuchiwanki? 10Qanmi taytaywan churiyachiwarqanki, qanmi mamaypa wiksanpi wiñachiwarqanki. 11Hinaspataq aychawan qarapiwan churawarqanki, chaymantataq hank'ukunawan tulluyta allwiykurqanki. 12Munakuwaspaykin kawsayta qowarqanki, sumaqta qhawapayawaspan kawsachiwarqanki. 13Kunanqa yachashanin qanpa sonqoykipi pakasqa yuyaykuykunaraq kashasqanta: 14Imallapipas huchallikunaytan qhawapayashawarqanki pantasqaymanta huchachawanaykipaq. 15Huchayoqchus kani chayqa, chinkasqañan kani, mana huchayoqchus kani chaypas, manan wichayta qhawariymanchu, sinchi-sinchi p'enqasqa kasqay hawa, khuyay-khuyay llakisqa kasqay hawa. 16Hanaqta qhawariqtiyqa, león hinachá qatiykachawankiman, ¡imawanraqchá wañuchiwankiman! 17Wakmantan testigoykunata contraypi rikhurichishanki, aswan-aswantan ñoqawan phiñakushanki, soldadokuna hinan mana samaykuspa phawaykushawanki. 18¿Imapaqtaq hinata paqarichiwarqanki? Hina wañukapuyman karqan manaraq pipas rikushawaqtin. 19Mamaypa wiksanmanta hallp'aq sonqollanmanña ripuyman karqan, ahinapi manapas kaymanchu hina kayman karqan. 20Pisi kawsayllayoqtaq kani chayqa, ¡ratollapas samaraykachiway! Ratollapas hinata kusirikusaq, 21manaraq wiñay ripuyman puririshaspay manaraq laqha tutayaq suyuman puririshaspay, 22manaraq llanthuman ch'ampiqman puririshaspay, maypichus k'anchaypas tutayaqllataq kasqanman, nispa.

will be added

X\