1 ¡May kusachá umayqa unu p'uytu kanman! ¡May kusachá ñawiypas pukyu kanman, waqayniy unu hinaraq phawamunanpaq! Llaqtaypi wañuqkunamanta tuta-p'unchay mana thanispa waqanaypaq. 2 ¡May allinchá ñoqapaq kapuwanman ch'inneqpi huk cheqas qorpachakunaypaq, llaqtaymanta ripuspa paykunamanta karunchakunaypaq! Llapankun wasanchaqkuna kanku, paykunaqa hap'iykachiq t'aqakunan kanku. 3 Qallunkuqa wach'inapaq p'eqta hinan llullakuyta wach'inankupaq kashan. Suyupiqa llullakuymi q'oñirishan, cheqaq-kaytaq mana kanñachu. Aswan-aswantan mana allinwan mayt'uykakapunku, Señor Diostaqa manataq reqsinkuchu. 4 Reqsinakuq-masiykipipas aman suyakunkichu, wawqeykimanpas aman hap'ipakunkichu wawqe purapas q'otunakusqankurayku, runapurapas tumpanakusqanku hawa. 5 Hukmanta hukmi q'otunakunku, manataq pillapas cheqaq rimaqqa kanchu. Llullakuytan aswanta yachaykapunku, waqlliykapunkun, manan t'ikrakunkumanñachu. 6 Tukuy-atiyniyoq Señor Diosmi nin: Paykunaqa mana allintakamallañan ruwanku, paykunaqa q'otuytakamallañan q'otunku, paykunaqa manapunin Señor Diosta reqsikuyta munankuñachu. 7 Chayraykun Tukuy-atiyniyoq Señor Diosqa nin: ¿Imatañataq astawan ruwayman llaqtaywanqa? Paykunataqa qori ch'uyanchaq hinan ninapi ch'uyanchasaq. 8 Qallunkuqa wañuchiq p'eqtan, rimankuqa llullakuyllatan. Reqsinakuq-masinkutan tukuy sonqowan napaykuq tukunku, huk-hinamantataq misk'anata churashanku. 9 ¿Chay ruwasqankumantaqa manachu muchuchiyman? ¿Manachu tupaqninta chay hina millay llaqtaman qoyman? Ñoqa Señor Diosmi chayta nini. 10 Ñoqataq nirqani: Waqasaqmi, anchisaqmi orqokunamanta, harawisaqmi purun pastokunamanta, chay ruphaypa tuntichisqan pasto cheqastaqa manan pipas purinñachu, manataqmi uywakunaq waqasqanpas uyarikunñachu. Salqa uywakunapas phalaq animalkunapas lliwmi ayqekapunña, nispa. 11 Señor Diosmi nillantaq: Jerusalentaqa raqay-raqaymanmi tukuchisaq, chacal animalkunaq tiyanan t'oqoman. Judapi llaqtakunatapas purunyachisaqmi, manan pipas chaypi tiyanqañachu, nispa. 12 Ñoqataq tapurqani: ¿Pitaq allin yuyayniyoq kanman chaykunata sut'inchananpaq? ¿Pimantaq Señor Diosqa chayta sut'incharqan hukkunaman willananpaqri? ¿Imanaqtinmi kay suyuqa purun-purun kashan? ¿Imanaqtintaq tuntillaña mana piqpa chayanan kashan? nispa. 13 Señor Diostaq nirqan: Llaqtay runakunaqa yachachikuy simiykunatan wikch'upurqanku. Paykunaqa manan kasuwarqankuchu, manataq munasqaytapas ruwarqankuchu. 14 Paykunaqa sonqonkuq kamachisqantan ruwarqanku, Baal diosninkuta yupaychaspanku, imaynachus ñawpa taytankuq yachachisqanman hina. 15 Chayraykun ñoqa Israelpa Diosnin Tukuy-atiyniyoq Señorqa kayta ruwasaq: Chay runamanmi ajenjota mikhuchisaq, venenota ukyachisaq. 16 Ñawpa taytankuqpas paykunaqpas mana reqsisqanku suyumanmi ch'eqerparichisaq, qatiykachachisaqtaqmi espada hap'intin runawan, llapankuta wañuchispa tukunankama, nispa. 17 Tukuy-atiyniyoq Señor Diosmi nin: Yaw, runakuna, waqyamuychis waqaqpaq churasqa warmikunata, pusachimuychis waqapakuy yachaq warmikunata, nispa. 18 Llaqtataq nirqan: Arí, usqhayllatapuni hamuchunku ñoqanchismanta qaparkachanankupaq, ñawinchismanta waqay sut'umunankama, qhechiphranchistaraq waqaywan wasapachinankama. 19 Sionmantapachan uyarikamun nanaymanta anananasqanku: ¡Imay sonqoraqmi raqay-raqaypi rikukunchis! ¡Ima p'enqaypin tukukunchis! ¡Llaqtanchistachá saqepusunchis, wasinchiskunapas lliwñan raqay-raqay! nispa. 20 Ñoqataq nirqani: Warmikuna, uyariychis Señor Diospa nisqanta, allinta uyariychis willakamusqanta. Ususiykichiskunamanpas yachachiychis llakiy waqayta, warmi-masiykichismanpas yachachiychis waqay harawita. 21 Wañuymi ventanankunata haykumun, palacionchismanpas haykumun. Callekunapin wawakunata sipiramushan, plazakunapitaq wayna-sipaskunata wañurachimushan. 22 Señor Diosmi nin: Runaq ayankunallan wikch'u-wikch'u kapushan, pampakunapi wanu hinaraq, ichhuqpa qhepanpi qhella usuq hinaraq, manataq pillapas hoqariq kanchu, nispa. 23 Señor Diosmi nillantaq: Yachayniyoqqa yachayniyoq kasqanmanta ama umata hoqarichunchu, atiyniyoqpas atiyniyoq kasqanmanta ama hatunchakuchunchu, qhapaqpas qhapaq kasqanmanta ama alabakuchunchu. 24 Pipas uma hoqariyta munan chayqa, umata hoqarichun ñoqa reqsiwasqanmanta, ñoqapuni Señor Diosqa kasqayta yachasqanmanta. Ñoqa Señor Diosmi kani khuyapayakuqqa, kay pachapi chaninchaqpas kuskachaqpas, chaytapunin ñoqaqa munani. Ñoqa Señor Diosmi chayta nini. 25 Señor Diosmi nin: Chayamushanñan p'unchaykuna aychanpi señalasqa mana señalasqa kaq llapan runakunata ñak'arichinaypaq. 26 Ñoqaqa ñak'arichisaqmi Egipto suyuta, Judá suyuta, Edom suyuta, Amón suyuta, Moab suyuta, llapan ch'inneqpi tiyaqta, ch'ipu chukchanta rutukuspa k'isukuq llapa runatawan. Llapan chay suyu runakunapas Israel runakunapas hinaña aychankupi señalasqa kanku chaypas, mana kasukuq sonqoyoqmi kanku, nispa.
