1 Señor Diosmi nin: Chay p'unchaykunan aya p'ampanamanta tullukunata hasp'inqaku, Judá reykunaq tullunta, umalli runakunaq tullunta, sacerdotekunaq tullunta, profetakunaq tullunta, Jerusalenpi tiyaqkunaq tulluntapas. 2 Hinaspan intiq ñawpaqenpi, killaq ñawpaqenpi, llapa ch'askakunaq ñawpaqenpiwan chay tullukunata wisñinqaku. Chay runakunaqa intita, killata, ch'askakunatawanmi munakusqaku, servisqaku, qatikusqaku, tapukusqaku, yupaychasqaku ima. Manapunin pillapas chaykunaq tulluntaqa wakmanta p'ampanqakuchu, hinallan qhepapunqa hallp'aq wanunpaq. 3 Chay millay suyu runakunamanta puchuqqa maymanña ch'eqechisqaypipas kawsananmantaqa wañuytan astawan mañakunqaku. Ñoqa Tukuy-atiyniyoq Señor Diosmi chayta nini, nispa. 4 Qan, Jeremías, kayta llaqtaman willamuy: ¿Manachu huk runa kumpakuspaqa wakmanta sayarin? ¿Manachu ñanta pantaspaqa kaq ñanman kutimun? 5 Chay hinari, llaqtalláy, ¿imanaqtintaq qhepaman kutirinki, mana ñoqaman kutirimuspa? Qankunaqa waktasqaykichistan q'otukuyman k'askakunkichis, manapuni ñoqaman kutimuyta munaspa. 6 Makillan uyarimusharqani, manataqmi pillatapas uyarirqanichu mana chanin ruwasqanmanta llakikuywan: ¿Imatataq kaytari ruwarqani? nishaqta. Llapallanmi ñanninkuta phawashanku, maqanakuyman phawaykuq caballo hina. 7 Cigüeñapas yachanmi wak cheqasman rinan tiempota, kullkupas, khallwapas, ch'ayñapas yachankun hayk'aqchus wak cheqasman rinankuta. Llaqtaymi ichaqa mana yachanchu kamachikuy simiykunata. 8 ¿Imaynataq qankunari ninkichis: Yachaysapan kayku, Señor Diospa kamachikuynintapas hap'ishaykun, nispa? Qhawariychis, kamachikuy qelqa yachaqkunan llullakuspa waqllichirqanku. 9 Yachayniyoq runakunan p'enqachisqa kanku, toqllaman urmaykuq animal hinan mancharisqa kanku. Qhawariychis, paykunaqa simiytan pisicharqanku. Chay hinari, ¿maytaq yachayniyoq kasqanku? 10 Chayraykun warminkutapas wak qharikunaman qoykapusaq, hallp'ankutapas wak runakunaman qoykapusaq. Llapanmi hatunpas huch'uypas yuyaykunku runata q'otuspa qhapaqyayta, profetakunapas sacerdotekunapas q'otuqkunallan kanku. 11 Llaqtaypa k'irintan patallanta hampipayanku: Allillanmi kanqa, nispa, tukuy imapas mana allinkama kashaqtin. 12 ¿Chay millay ruwasqaykichismanta p'enqakurqankichischu? ¡Manan! Manan yachankichischu imachus p'enqakuy kasqanta, manan uyallaykichispas pukayarirqanchu. Chayraykun qankunapas wakinkuna hina urmallankichistaq, ñoqa muchuchiqtiyqa pasaqtan ch'inyapunkichis. Ñoqa Señor Diosmi chayta nini. 13 Señor Diosqa nillantaqmi: Llaqtaytan hukpaqkama tukupusaq, chaymi mana k'atay ruruyoq uvas yura hina kapunqa, mana k'atay higosniyoq higos sach'a hina kapunqa, aswantaraqmi raphinkunapas ch'akiykapunqa. Chayraykun wak llaqtayoq runakunaman kaqninkupaq qopusaq, nispa. 14 Paykunataqmi ninku: ¿Imapaqñan kayllapi tiyashanchis? Huñuykukuspa hakuchis allin perqakunayoq llaqtakunaman, chaypi wañukapunanchispaq. Diosninchis Señor Diosmi wañuyman hap'iykachiwanchis, venenotan ukyaykachiwanchis, pay contra huchallikusqanchismanta. 15 Suyakurqanchismi allin kawsayta, manataq ima allin kawsaypas kawarqanchischu, qhaliyaytan suyakurqanchis, q'aqchasqa kaytataq tarirqanchis. 16 ¡Awqanchisqa ñan hamushanña! Danmantapachan caballonkuq samaqesqanpas uyarikushanña, caballonku waqariqtinpas kay pacharaqmi kuyurishanña. Kay suyuta kaqninkunatawan thuniqñan hamushanku, llaqtakunata llapan chaypi tiyaqkunatawan thuniqñan chayamushanku, nispa. 17 Señor Diosmi nillantaq: Kunanqa, wañuchikuq mach'aqwaytan qankuna contra kachamushani, manan pipas chay hark'ayta atinqachu, chay mach'aqwaykunaqa k'utusunkichispunin, hinan wañunkichis, nispa. 18 Hatun llakin ñit'iykuwan, sonqoypas phatarqoshawanñan. 19 ¡Uyariychis! Hinantin suyupin uyarikushan llaqtaypa nanaymanta qaparisqan: ¿Sionpiri manañachu Señor Dios kapun? ¿Reyninpas manañachu chaypi kapun? nispa. Reyninku Señor Diosmi kutichimun: ¿Imapaqtaq phiñachimuwankichis idolokunata yupaychaspaykichis? ¿Imapaqtaq phiñachimuwankichis mana valeq dioskunata yupaychaspaykichis? nispa. 20 Llaqtaymi qaparillantaq: Chiraw mitan tukukapun, mikhuy hoqariytapas tukuykuñan. ¡Ñoqanchisqa manan qespichisqapunichu kanchis! nispa. 21 Llaqtaypa muchusqanwanmi muchushani, llaqtaymantaqa wañuqniyoq hinaraqmi kashani, sinchi khuyayllañan kashani. 22 ¿Manapunichu ima hampillapas Galaad hap'iypi kanman? ¿Manapunichu pillapas chaypi hampiykuq kanman? Chay hinari, ¿imanaqtintaq llaqtayqa manapuni qhaliyanchu?
