Jeremías 7

1Señor Diosmi Jeremiasta nirqan: 2Ñoqata yupaychawananku wasi punkupi sayaykuy, hinaspa kay willakuyta willay: Señor Diosta yupaychaq haykuq llapan Judá runakuna, Señor Diospa siminta uyariychis. 3Israelpa Diosnin Tukuy-atiyniyoq Señormi nisunkichis: Kawsayniykichista ruwayniykichista allinman t'ikraychis, chaymi kay hallp'api tiyakullankichispuni. 4Amaña k'askakuychischu chay q'otukuqkunamanqa, paykunan yanqalla ninku: ¡Kayqa Señor Dios yupaychana wasi! ¡Kayqa Señor Dios yupaychana wasi! ¡Kayqa Señor Dios yupaychana wasi! nispa. 5Kunan imayna kawsayniykichistachus ruwayniykichistachus allichankichis, hukkuna hukkunawan chaninta ruwanakunkichis, 6manataq sarunchankichischu wak llaqtayoqkunata, mana tayta-mamayoqkunata, viudakunatapas, manataq mana huchayoq runata wañuchinkichischu, manataq wak dioskunata yupaychankichischu chayqa, 7ñoqan ñawpa taytaykichisman qosqay hallp'api kashallasaqpuni. 8¡Qhawariychis! Qankunaqa llullakuspa rimasqallamanpunin k'askakunkichis. 9Suwakunkichismi, runatan wañuchinkichis, wasanchay huchatan ruwankichis, ñoqaq sutiytan yanqa qasi hoqarinkichis, Baal diosniykichismanmi sacrificiota ruphachinkichis, mana reqsisqaykichis dioskunatan yupaychankichis. 10Chaymantataq qankunaqa wasiymanpas ñawpaqeymanpas hamuspa ninkichis: Kaypiqa allinmi kashanchis, nispa. Chaywanpas cheqnikusqay ruwanakunallatan ruwayta yuyashankichis. 11¿Qankunaqa yuyankichischu ñoqa yupaychawanaykichis kay wasiqa suwakunaq pakakunan t'oqo kananpaq? Ñoqaqa llapantan rikurqani ima ruwasqaykichistapas. Ñoqa Señor Diosmi chayta nini. 12Huk cheqastan Silo llaqtapi akllakurqani chaypi yupaychawanaykichispaq, chay cheqasta rispaykichis Israel llaqtaypa mana chanin ruwasqanmanta imatachus ruwasqayta rikumuychis. 13Señor Diosmi nin: Hinaña kuti-kutirispa nirqaykichis ruwasqaykichismanta chaypas, qankunaqa manapunin uyariqpas tukurqankichischu, waqyamurqaykichismi manataq kutichiwarqankichischu. 14Chaymi imaynatachus Silopi yupaychana wasita ruwarqani, chay hinallatataq ruwasaq qankunaq hap'ipakusqaykichis yupaychana wasitapas. Kayqa wasiymi, ñoqan qorqani ñawpa taytaykichisman qankunamanwan. 15Qankunatapas ñawpaqeymanta qarqopusqaykichismi imaynan ñawpaqeymanta wawqeykichis Efraín mirayta qarqorqani hinata, nispa. 16Señor Diosmi niwarqan: Qan Jeremiasqa, aman mañakuwankichu kay llaqtapaq, aman pituchakuwankichu, amallataq paykunapaqqa valekuwankipaschu. Amapuniñan: Hinatayá, niwankiñachu. Ñoqaqa manan uyarisqaykiñachu. 17¿Manachu rikunki Judá llaqtapi Jerusalenpa callenkunapipas ruwasqankuta? 18Erqekunan llant'ata pallamunku, taytankutaq ninawan kananku, warminkutaq masata q'apispanku tortata ruwanku. Hanaq pacha “reina” nisqa diosaman haywanankupaq. Hinallataq paykunaqa wak dioskunamanpas vino ch'uyata haywanku ñoqata phiñachiwanankupaq. 19Señor Diosmi nin: Chay ruwasqankuri, ¿ñoqatachu muchuchiwan? ¡Manan! Paykuna kikillankutaqmi muchunku, chaymi p'enqaypi rikukunku. 20Chayraykun ñoqa Apu Señor Diosqa k'arak phiñakuyniyta ñoqa yupaychana wasiman chayachisaq, kaqllataq runakunamanpas, uywakunamanpas, mallkikunamanpas, chakra llank'asqankumanpas. Phiñakuyniyqa rawrarinqa mana piqpa thasnuy atinantan, nispa. 21Israelpa Diosnin Tukuy-atiyniyoq Señormi llaqtanta nin: ¡Phawaychis! Ruphachina sacrificioykichisman wakin sacrificioykichista yapaykuspa chay aychata mikhukampuychis, manan imapas qokuwanchu. 22Egiptomanta ñawpa taytaykichiskunata horqomuspayqa, manan ima nillarqanipaschu ruphachina sacrificiomantapas wak ofrendakunamantapas. 23Aswanpas ñoqaqa kamachirqanin: Ñoqata kasuwaychis, ñoqan Diosniykichis kasaq, qankunataq llaqtay kankichis. Llapa kamachikuyniyman hina puriychis, chay hinapin allillan kasunkichis, nispa. 24Paykunan ichaqa mana kasuwarqankuchu, manataq uyariwarqankupaschu, aswanmi paykunaqa millay mana chanin sonqonkuq kamachinta ruwarqanku, ñawpaqman rinankutaqa qhepamanmi aswanta kutirqanku. 25Egiptomanta ñawpa taytaykichiskunaq lloqsimusqanmanta kunankaman qankunaman kamachiy profetakunata mana thanispa sapa p'unchay kachamurqaykichis, 26qankunataq ichaqa mana uyariqpas tukuwarqankichischu, manallataq kasuwarqankichispaschu, ñawpa taytaykichiskunamantapas aswan rumi sonqomanmi tukupurqankichis, nispa. 27Jeremiastataq nirqan: Paykunamanmi tukuy chaykunata ninki, manan uyarisunkikuchu. Qanmi waqyanki, manataqmi kutichimusunkikuchu. 28Chaymi paykunaman ninki: Qankunaqa Diosniykichis Señor Diostapas mana uyariq suyun kankichis, wanachisqantapas manan chaskirqankichischu. Hunt'aq-kayqa chinkapusqan, chaytaqa manañan rimakullasqapaschu, nispa. 29Jerusalén llaqta, llakikuymanta phutikuy, chukchaykita rutukuspa wikch'uy, ch'in nisqa orqokunapi waqay-waqayta takimuy, llaqtayki runapaq Señor Diospa phiñakusqanmanta wikch'upuspa qonqarparisqanmantawan, nispa. 30Señor Diosmi nin: Judá runakunan ñawpaqeypi millay mana munasqayta ruwarqanku, cheqnikusqay idolokunata wasiyman churaykuspan qhellicharqanku. 31Ben-hinom wayq'opipas Tofet nisqa yupaychana cheqastan ruwarqanku qharitaraq warmitaraq wawankuta chaypi ruphachinankupaq. Manan hayk'aqpas chay ruwaytaqa kamachirqanichu, manapunin yuyallarqanipaschu chaytaqa. 32Chayraykun huk p'unchay chayamunqa, hinan chay wayq'ota manaña: Tofet, ninqakuchu, manallataq: “Ben-hinom wayq'o”, ninqakupaschu, aswanmi ninqaku: “Runa Wañuchina wayq'o”, nispa. Chay Tofetpin ayankunata p'ampanqaku, mana huk cheqasllapas qasi kanankama. 33Chay ayakunatataqmi ankakuna salqa animalkunapiwan mikhupunqaku, manataqmi pillapas hark'akuq kanqachu. 34Hinan Judá llaqtakunamanta Jerusalén callekunamantawan kusikuyta, q'ochukuyta casarakuypi qhaswaykunatawan chinkachisaq. Suyuntintan purun-purunman tukuchipusaq.

will be added

X\