Jeremías 6

1Benjamín ayllu runakuna, Jerusalenmanta ayqekuychis, pakakuna cheqasta maskhakuychis, Tecoa llaqtapi putututa tocamuychis, Bet-haquerem llaqtapi ninata q'osñichimuychis, hatun mana allinmi wichay ladomanta qhawapayamushan, hatun manchana llakin hamushan. 2Sión llaqta, ¿manachu nirqayki: sumaq q'achuq wiñanan qhatan kanki, nispa? 3Michiqkunan ovejantinkama hamunku, muyuriqniykipin ch'ukllaykukunku, sapankan uywanta ñawpaqenpi michikun. 4Awqankunan ninku: ¡Llaqtawan maqanakunanchispaq wakichikusun! ¡Haku! ¡Kuskan p'unchayta phawaykusun! nispa. Chaymantan ichaqa ninku: ¡Ikiraqmi! Ch'isiyarqapunñan, llanthupas sinchitañan wikch'urqapun. 5Chay hinaqa, tutallaña phawaykusun. ¡Palacionkunatapas thunimusun! nispa. 6Tukuy-atiyniyoq Señor Diosmi kamachikun: Mallkikunata kumpaspa seqanata tawqakuychis Jerusalenman perqanta phawaykunapaq. Kay llaqtaqa muchuchinapaq nisqan kashan, pisichanakuymi, sarunchanakuymi chaypi kashan. 7Jerusalenmantan paqarimun millay ruwaykuna, pukyumanta unu phullpumuq hinaraq. Chaypiqa millay ruwaywan maqanakuyllawanmi uyarikushan, chaypiqa nanayllawan k'iriyllawanmi rikukushan. 8Jerusalén llaqta, kayta uyariway, paqtataq qanmanta t'aqarikuyman, paqtataq raqay-raqayman tukuchiykiman, paqtataq mana runaq tiyanan suyuman tukuchiykiman, nispa. 9Tukuy-atiyniyoq Señor Diosmi nin: Israel runakunamanta puchuqta qhellapay, uvas chakra qhellapaq hinaraq, huk kutimantawan k'allmankunamanta pallapay, uvas chakra pallapaq hinaraq, nispa. 10Ñoqataq nirqani: ¿Pitañataq nisaqri? ¿Piñataq uyariwanqa willaqtiyri? Señor Diosníy, paykunaqa mana ninriyoqmi kanku, manan uyarinkumanñachu. Willachiwasqaykiwanqa asikunkun, manan simiykita munankuñachu. 11Ñoqapas kay llaqtapaq phiñakuyniykiwan hunt'aykusqan kashani, manan hinalla kayta atiniñachu, nispa. Señor Diosmi niwarqan: Callepi puriq erqekunaman phiñakuyniyta chayachiy, huñunasqa wayna-sipaskunamanwan chayachiy. Qharintin warmintinmi muchunqaku, kurak runakunapas, yuyaq runakunapas muchunqaku. Kay suyupi tiyaqkunata muchuchiqtiymi, 12wasinkupas, hallp'ankupas, warminkupas wak runakunaq kapunqa. 13Llapanmi hatunpas huch'uypas yuyaykunku mana chaninpi qolqeta tarispa qhapaqyayta, profetakunapas sacerdotekunapas q'otuqkunallan kanku. 14Llaqtaypa k'irintan patallanta hampipayanku: Allillanmi kanqa, nispa, tukuy imapas mana allinkama kashaqtin. 15¿Chay millay ruwasqankumantaqa p'enqakurqankuchu? ¡Manan! Manan yachankuchu imachus p'enqakuy kasqanta, manan uyallankupas pukayarirqanchu. Chayraykun paykunapas wakinkuna hina urmallanqakutaq, ñoqa muchuchiqtiyqa pasaqtan ch'inyapunqaku. Ñoqa Señor Diosmi chayta nini. 16Señor Diosmi nirqan: Ñan palqariypi sayaykuspa qhawarikuychis, ñawpa ñankunata tapurikuychis, mayqenchá allin ñan kasqanta tapurikuychis, chaynintataq puriychis, chaypin allin kawsayta tarinkichis. Qankunataq ichaqa nirqankichis: Manan chaynintaqa puriykumanchu, nispa. 17Qankunapaq qhawaqniykichiskunata churaspan nirqani: Pututu tocaytan makilla uyarinkichis, nispa. Qankunataq ichaqa: Manan uyariykumanchu, nirqankichis. 18Chaymi nini: Uyariychis, suyukuna, imachus llaqtaypi kananta rikuychis. 19Kay pacha, uyariy, kay llaqtamanmi hatun llakita apamusaq, millay mana chanin yuyaykusqankuq rurunta, paykunaq manapuni kasuwasqankumanta, yachachisqayta pisichasqankumantawan. 20¿Imapaqñan qankunaqa Sabá suyumanta inciensotapas apamuwankichis? ¿Imapaqñan karu suyumanta misk'i cañatapas apamuwankichis? Ñoqaqa manan munaniñachu sacrificio ruphachimusqaykichistapas, manallataq wakin ofrendakunatapas, nispa. 21Chayraykun Señor Diosqa nin: Kay llaqtataqa misk'achispan urmachisaq. Taytantin churintinmi urmaykapunqaku, wasimasintin reqsinakuq-masintinmi kuskapacha wañupunqaku, nispa. 22Señor Diosmi nin: ¡Qhawariychis! Askha runan wichay llaqtamantapacha hamushan, sinchi atiyniyoq llaqtan karu suyumantapacha q'epichakamushan. 23Armankuqa p'eqtakunawan espadakunawanmi, awqa sonqo mana khuyapayakuqmi kanku, chay runakunaq qapariyninkupas lamar-qochaq phoqchiqeynin hinaraqmi uyarikun. Caballokunapin wakichisqa phawamushanku, Sión llaqta, qanwan maqanakuqmi hamushanku, nispa. 24Jerusalenpi runakunataq nishanku: Huk willakuytan yacharqoyku, manchakuymantan kallpaykuraq chiriyarqapun, sinchitapunin llakikuymanta nanachikushayku wachakuy nanayniyoq warmi hinapuni. 25¡Amaña hawata lloqsiychischu, amaña ñantapas puriychischu! Awqaykichismi armantinña kashan, manchakuywan muyuykusqan kashanchis, nispa. 26Ñoqataq nini: Llaqtalláy, qhasqa p'achawan llakikuymanta p'achakuychis, usphaman qhospaykuychis. Yana p'achawan p'achakuspa, sapallan wawamanta hina waqaychis, thuniqqa qonqayllan phawaykamuwasunchis, nispa. 27Señor Diosmi niwarqan: Ñoqan llaqtayman churayki allintapuni huchanmanta wanachinaykipaq, imaynachus purisqantapas qhawanaykipaq, nispa. 28Ñoqataq nirqani: Señor Diosníy, llapankun millay mana kasukuqkama kanku, simi apa waqllisqa runakunaraqtaqmi kanku, fierro hina, bronce hina mana sientiqmi kanku. 29Kallpawan fuelli ninata phukuqtinmi titiqa chullurin, qhoqayaynintaq ichaqa mana lloqsinchu. Yanqanpaqmi llaqtay ch'uyanchaytaqa yuyasqani, millay runakunaqa manapunin chinkankuchu. 30Aswanmi: Wikch'usqa sarroyasqa qolqe nisunman, qan Señor Dios paykunata wikch'upusqaykirayku, nispa.

will be added

X\