Jeremías 52

1Sedequiasqa kamachikuyta qallarishaspa iskay chunka hukniyoq watayoqmi karqan, hinaspan chunka hukniyoq watata Jerusalenpi kamachikurqan. Mamanmi karqan Hamutal sutiyoq, Libna llaqtayoq Jeremiaspa ususin. 2Sedequiasqa manapunin Señor Diospa munayninman hinachu ruwarqan, aswanpas ñawpaq rey Joacimpa ruwasqanta hinan ruwarqan. 3Chayraykun Judá suyupi Jerusalenpiwan millay ruwasqanku Señor Diosta sinchita phiñachirqan, chay hawan Señor Diosqa ñawpaqenmanta paykunata wikch'upurqan. Sedequiasmi Babilonia rey contra hatarirqan. 4Chayraykun Sedequiaspa isqonkaq wata kamachikusqan chunka killaq chunka p'unchayninpi rey Nabucodonosorqa llapan soldadonkunantin Jerusalén contra puririmurqan. Ñawpaqenpi karpaykukuspankutaq mana ayqenanpaq hark'achita llaqtaq muyuriqninpi ruwarqanku. 5Paykunataq llaqtata muyuykusharqanku Sedequiaspa chunka hukniyoq wata kamachikunankama. 6Chay wataq tawa killanpa isqon p'unchayninpitaq llaqtapi aswan yarqay karqan, runakunaqpas manañan ima mikhunankupas karqanñachu. 7Chaypachan Babilonia soldadokuna llaqta perqata t'oqorqorqanku, chaymi Sedequiasqa soldadokunantin tuta ayqekapurqanku, hinaña awqa soldadokuna llaqta muyuriqpi kasharqanku chaypas. Reypa huertan qaylla iskaynin perqa tupay punkunta lloqsirqospanku, Jordán wayq'oman ayqekapurqanku. 8Paykunaq qhepanta phawarispanmi, Babilonia soldadokunaqa Jericó pampapi Sedequiasman tariparqorqanku. Llapan soldadonkunataq hinantinman ch'eqeripurqanku. 9Babilonia soldadokunataq reyta hap'irqospa Hamat suyupi Ribla llaqtapi kaq Babilonia reyman aparqanku. Chaypin rey Nabucodonosorqa kamachikurqan paypaq imachus kananta. 10Hinaspan pay kikin qhawakushaqtin churinkunata Judamanta llapan umallikunatapas nak'arqarichirqan. 11Sedequiastañataq ñawinkunata horqochirqan, hinaspan bronce cadenawan watasqata Babiloniaman apachirqan. Chaypitaq preso karqan wañupunankama. 12Babilonia rey Nabucodonosor chunka isqonniyoq watapiña kamachikushaqtinmi, phisqakaq killaq chunka p'unchayninpi reypa guardiankunaq umallin Nabuzaradanqa Jerusalenman chayamurqan, payqa reypa yanapaqninmi karqan. 13Paymi kanaykurqan Dios yupaychana wasita, reypa wasinta, llapan allichachaqkunaq wasinta, llapan wasikunatawan. 14Paywan kuska hamuq soldadokunataq Jerusalenpa muyuriq perqanta llapanta thunirqanku. 15Chaymantataq Nabuzaradanqa Babiloniaman kamachi-kaypaq apapurqan llaqtapi lliw qhepaq runakunata, wakin artesanokunata, Babilonia runakunaman huñukapuqkunatawan. 16Wakin wakcha runakunallatan saqepurqan uvas chakrakunatapas hallp'akunatapas llank'anankupaq. 17Babilonia runakunataq Dios yupaychana wasipi broncemanta ruwasqa tusakunata, carretakunata, broncemanta hatun qochatawan p'akispanku Babiloniaman aparqanku. 18Chaymantapas apallarqankutaq uspha churana mankakunata, palakunata, pábilo allichanakunata, puruñakunata, pocillokunata, Dios yupaychana wasipi broncemanta llapan kaqkunatawan. 19Guardiakunaq umallinpas apakullarqantaq qorimanta, qolqemanta llapa ruwasqa p'ukukunata, incienso q'apachinakunata, puruñakunata, uspha churana mankakunata, candelerokunata, pocillokunata, vino ofrenda hich'aykunapaq vasokunatawan. 20Dios yupaychana wasipaq rey Salomonpa broncemanta ruwachisqan iskay tusakuna, carretakuna, hatun qocha, qochaq tiyanan chunka iskayniyoq torokunapiwanmi sinchi llasallaña karqan mana pesay atiyraq. 21Iskaynin tusakunan karqan pusaq metro sayayniyoqkama, rakhunmantaq phisqa metro kuskan muyuriqniyoq, ch'usaq sonqoyoqtaq karqan, bronceq phatukaynintaq karqan tawa dedo. 22Sapanka tusaq umantaq iskay metro kurak karqan, broncemanta sumaq awasqapi granadakunawan k'achanchasqa. 23Muyuriq awasqapitaq karqan pachak granadakuna, isqon chunka soqtayoqtaq kaqkama t'aqasqa karqan. 24Guardiakunaq umallinmi apapurqan uma sacerdote Seraiasta, qatiqnin sacerdote Sofoniasta, Dios yupaychana wasiq punkunta qhawaq kinsa runakunatawan. 25Llaqta runakunamantataq aparqanku soldadokunaq umallinta, reypa yuyaychaqnin qanchis runakunata, soldadopaq huñuq hatun kamachikuqta, soqta chunka runakunatawan. 26Lliw chaykunatan Nabuzaradanqa Hamat suyupi Ribla llaqtapi kaq Babilonia reyman aparqan. 27Chaypitaqmi reyqa hasut'ichirqan, chaymantataq wañuchipurqan. Ahinapin Judá runakunaqa suyunkumanta apasqa karqanku. 28Nabucodonosorpa apasqan runakunan kaykuna karqan: Qanchiskaq watapiña kamachikushaspan Judamanta kinsa waranqa iskay chunka kinsayoq runata aparqan. 29Chunka pusaqniyoq watapiña kamachikushaspataq Jerusalenmanta pusaq pachak kinsa chunka iskayniyoq runata aparqan. 30Iskay chunka kinsayoq watapiña kamachikushaqtintaq, Nabuzaradanqa Judamanta qanchis pachak tawa chunka phisqayoq runata aparqan. Llapanpitaq tawa waranqa soqta pachak runakuna apasqa karqan. 31Evil-merodacmi Babiloniapi kamachikuyta qallarisqan watapi Judá rey Joaquinta carcelmanta horqorqan. Chaymi karqan kinsa chunka qanchisniyoq wataq chunka hukniyoq killan, iskay chunka phisqayoq p'unchayña kamachipaq apasqa kashaqtin. 32Rey Evil-merodacqa Joaquinta sumaqtan rimapayarqan, Babiloniapi kashaq wakin reykunamantapas aswan chaniyoqpaqmi qhawarirqan. 33Ahinapin Joaquinqa carcelpi p'achanta ch'utirparirqan, reywantaq mikhullaqpuni kawsanankama. 34Sapa p'unchaymi Babilonia reyqa Joaquinman kawsananpaq mikhunata qollaqpuni wañukapunankama.

will be added

X\