Jeremías 51

1Señor Diosmi nin: Kachamusaqmi thuniq wayrata Babilonia suyupaq runankunapaqwan. 2Wak llaqtayoq runakunatan Babiloniaman kachamusaq, paykunan chaypi tiyaqkunata trigota hina wayrachinqaku, hallp'antapas ch'usaqyachinqaku. Mana allin p'unchay chayamuqtinmi hinantin cheqasmanta phawaykunqaku. 3Aman hinata qhawankichischu p'eqtanku wakichikunankutapas, qara unkunkuwan churakunankutapas. ¡Babilonia waynakunataqa ama khuyapayaychischu, soldadonkunatapas llapanta wañuchiychis! 4Caldea runakunaq suyunpiqa wañunqakun, callenkunapipas t'urpusqan wañunqaku. 5Tukuy-atiyniyoq Señor Diosninkuqa Israeltapas Judatapas manan saqerparinqachu, hinaña Caldea runakuna suyunkuta Israelpa Ch'uya Diosnin contra huchawan hunt'aykachirqanku chaypas. 6¡Ayqekuychis Babiloniamanta! ¡Kawsanaykichispaq phawaychis! ¡Ama paypa huchan hawachu wañuychis! Kunanmi chayamun Señor Diospa aynita kutichinan, chaskikapunan kaqtapunin qopushan. 7Babiloniaqa qori vason karqan Señor Diospa makinpi lliw pachantinta machachinanpaq. Suyukunan chay vinota ukyarqanku, yuyayninkutataq chinkachikapurqanku. 8Qonqayllan Babiloniaqa ñut'ukunankama urmaykapun. ¡Paymanta waqaychis! K'irinpaq balsamota apamuychis, ichapaschá qhaliyanman. 9Hampiykuñan Babiloniata manataq qhaliyanchu. ¡Hina kachun! Haku ripusun sapanka llaqtanchismankama, huchachasqa-kayninmi hanaq pachamanraq chayan, muchuchisqa-kayninmi phuyukamaraq aypan. 10Señor Diosmi chaninchawanchis allin kashasqanchista, hakuchis Sionpi willamusunchis Diosninchis Señor Diospa ruwasqankunata. 11Señor Diosmi Babiloniata thuniyta yuyaykun, chaymi Media suyu reykunata kallpachaspa tanqarimurqan. Chayqa Señor Diospa ayni-kutichiyninmi pay yupaychana wasita thunisqankumanta. ¡Wach'inaykichista ñawch'iyachiychis! ¡Escudoykichista hoqariychis! 12¡Babiloniaq perqankunaman phawaykunanpaq banderata hoqariychis! ¡Waqaychaq soldadokunata askhata churaychis! ¡Qhawaqkunata churaychis! ¡Pakakunata ruwakuychis! Señor Diosmi yuyaykusqanta hunt'an, Caldea runakuna contra nisqantan hunt'an. 13Babilonia, qanqa askha mayukunayoqmi kanki, askhataq qhapaq kayniykipas, p'uchukayniykin chayamun, kawsanaykiq tukukuyninmi chayamun. 14Tukuy-atiyniyoq Señor Diosmi sutinrayku jurarqan: Langostata hinaraqmi phawaykuqniykita kachamusaq, paykunan atipasqa kasqaykimanta takinqaku, nispa. 15Atiyninwanmi Señor Diosqa kay pachata ruwarqan, yachayninwanmi teqsimuyuntinta takyachirqan, yuyayninwanmi hanaq pachatapas mast'arirqan, 16kunununuq kunkanwanmi hanaq pacha unupas qaparin, hinantinmantan pacha phuyutapas sayarichin, paraqtinpas illapata t'oqyachin, waqaychasqa ukhumantan wayratapas horqomun. 17Lliw runataq mana yuyayniyoq uma muyusqakuna, metal unuyachiq runaqa ídolo ruwasqanmantan uyanta mana maymanpas churayta atinchu, ídolo ruwasqanqa mana kawsaq q'otulla kasqanmanta. 18Mana imapaq valeq pukllana kasqanmi kanku, p'uchukay p'unchaypin Señor Diosqa chaykunata thunipunqa. 19Jacobpa Diosninqa manan chaykuna hinachu, payqa tukuy imaymanakuna kamaqmi, paymi Israelta paqarichirqan kaqnin kananpaq, Tukuy-atiyniyoq Señor Diosmi sutinqa. 20Babilonia, qanmi ñoqaq q'asunay kanki, qanmi maqanakuypi maqanay kanki. Qanwanmi suyukunata q'asuni, llaqtakunatapas thunini. 21Qanwanmi caballokunatapas sillakuqkunatapas q'asuni, carretakunatapas phawachiqninkunatapas q'asuni. 22Qanwanmi qharitapas warmitapas q'asuni, machutapas waynatapas q'asuni, maqt'atapas sipastapas q'asuni. 23Qanwanmi michiqtapas uywatapas q'asuni, llank'aqtapas torokunatapas q'asuni, kamachikuqtapas atiyniyoqtapas q'asuni, nispa. 24Señor Diosmi nin: Ñawiykichispa qhawashasqanmi Babiloniaman, llapan Caldea runakunamanwan kutichipusaq Sionta llapa mana allin ruwasqankumanta, nispa. 25Señor Diosmi nin: Yaw, thuniq orqo, qan contran kani, lliw pachantin chhalluqmi kanki. Makiywanpunin muchuchisqayki, ranramantan tanqaykamusqayki, ruphasqa orqomanmi tukuchisqayki. 26Rumiykitaqa manapunin pipas munanqachu wasi teqsi ruwakunankupaqqa, wiñaypaqpunin purunyapunki. Ñoqa Señor Diosmi chayta nini. 27Banderata suyuntinpi maywiychis, trompetata suyukunapi tocaychis. Pay contra maqanakunankupaq suyukunata huñuychis. Suyukunata contranpi waqyaychis Ararat suyuta, Mini suyuta, Askenaz suyutawan. Hatun kamachikuqta churaychis soldadokunata kamachinanpaq, caballoyoqkunata kachaychis phiñasqa langostata hinaraq. 28Pay contra maqanakunankupaq suyukunata huñuychis, Media suyuq reyninkunata, kamachikuqninkunata, oficialninkunata, llapan kamachisqanku suyukunatapas. 29Babilonia contra Señor Diospa yuyaykusqanqa kaqllapunin kashan, paymi ch'inneqman tukuchinqa mana piqpa tiyanan suyuman, chayraykun hallp'aqa kuyurinraq t'ikrakunraq. 30Babilonia soldadokunaqa manan maqanakapunñachu, kaq pukarankupin kapushanku. Kallpankun chiriyarqapun, warmi hinaraqmi tukurqapunku. Llaqta punkunkun lliw chhallusqa kapun, wasinkutan nina ruphaykapushan. 31Qati-qatiraqmi chaskikuna phawashanku, qati-qatiraqmi reyman willaqkuna rishanku: Llapantapunin llaqtanchista hap'ikapunku, 32mayu chimpakunatapas hark'arqapunku, t'otorakunatapas kanarqapunku, soldadokunapas lliwmi manchakapunku, nispanku. 33Israelpa Diosnin Tukuy-atiyniyoq Señormi nin: Babiloniaqa eranapaq allin sarusqa pampa hinan, ichhuna p'unchaypas chayamushanñan, nispa. 34Jerusalén llaqtan nin: Babilonia rey Nabucodonosormi oqorqapuwarqan, pasaqtaraqmi q'aqchawarqan, ch'usaq p'ukuta hinan saqerpariwarqan. Lamar-qochapi hatun wak'a animal hinan oqorqowarqan, sumaqta mikhuykuwaspan saksaykurqan, chaymantataq aqturpariwarqan. 35Sión llaqta nichun: K'iriwaqniy Babilonia llaqta ñak'arichun, nispa. Jerusalén llaqta nichun: Yawarninchismanta Caldea runakuna pagachun, nispa. 36Chayraykun Señor Diosqa paykunata nin: Ñoqaq chaninchasqaymi lloqsinkichis, awqaykimanmi aynita kutichisaq. Qochantaqa pasaqtan ch'akichipusaq, pukyunkunataqa lliwtan ch'akichipusaq. 37Chaymi Babiloniaqa raqay-raqayman tukupunqa, chaypin chacal animalkuna tiyanqa. Manan pipas chaypi tiyanqañachu, qhawarispan: ¡Ikiraqmi! ninqaku. 38Llapankun león hinaraq qaparinku, uña leonkuna hinaraq hiriririnku. 39Mikhunayaqtinkun hatun mikhunata wakichisaq, paykunatan machachisaq kusisqa kanankupaq, chaymantataqmi mana rikch'ariqllaña wiñaypaq puñupunqaku. 40Hinan paykunata uywa nak'anaman apapusaq, borregotapas, orqo cabratapas, ovejatapas apanku hinata. Ñoqa Señor Diosmi chayta nini. 41¡Imaynaraqmi Babiloniaqa hap'isqa kapun! ¡Imaynaraqmi pachantinpa mentasqan llaqtaqa hap'isqa kapun! ¡Imaynaraqmi Babiloniaqa llapaq llaksakunanman tukupun! 42Qochan Babiloniata millp'urqapun, manchay phoqchiqeyninmi p'amparqapun, 43llaqtankunaqa musphana ch'usaqmanmi tukupun, yanqa ch'aki aqo-aqomanmi tukupun, mana piqpa tiyasqanpas kanman hinamanmi tukupun, mana piqpa purisqanpas kanman hinamanmi tukupun. 44Babiloniapin ñak'arichisaq Bel diosninta, aqtuchisaqmi lliw rakrasqanta, manañan payman suyukunapas hunt'aykunqañachu. Ñan thunikunña Babiloniaq perqanqa. 45¡Llaqtalláy, chaymanta lloqsiy! Sapankaykichis wañuymanta ayqekapuychis, Señor Diospa rawrashaqraq phiñakuyninmanta phawaychis. 46Suyuntinpi rimay q'oñiriqtinqa, ama q'aqchakuychischu, amataq mancharikuychischu. Sapa wata hinan rimayqa q'oñirin, maqanakuymanta rimaykuna, kamachikuqpura hap'inakusqanmanta rimaykuna. 47Cheqaqtapunin chayamunqa p'unchaykuna, Babiloniaq idolonkunata ñak'arichinay tiempokuna. Lliw suyuntinmi k'umuchisqa kapunqa, ayakunawan hunt'aykusqa kanqa. 48Hanaq pachapas kay pachapas lliw imakunapas llapallanmi kusikunqa Babilonia thunikuqtin, wichay ladomanta thuniq haykuykamuqtin. Ñoqa Señor Diosmi chayta nini. 49Imaynan pachantinpi runakunata Babilonia wañuchirqan, ahinallataqmi Babiloniapas Israel runakunata wañuchisqanmanta urmallanqataq. 50Señor Diosmi nin: ¡Qankuna wañuymanta ayqeqkuna, ayqekapuychis ama sayaykuspa! Karupiña kaspaykichistaq Señor Diosmanta yuyariychis, Jerusalenmantapas yuyarillaychispuni, nispa. 51Paykunan ichaqa ninku: P'enqasqan kashayku k'amiwasqankurayku, khuyay p'enqasqan kashayku Señor Dios yupaychana wasiq Ch'uya Cheqasninkamaraq wak llaqtayoq runaq haykusqanmanta, nispa. 52Señor Diosmi ichaqa nin: Chayamunqan p'unchaykuna Babiloniaq idolonkunata muchuchinay, lliw suyuntinpi k'irisqakunaq waqaranan. 53Cielokamaña Babilonia wichaspa pukaranta perqanqa chaypas, kachaykusaqpunin pay contra thuniqta. Ñoqa Señor Diosmi chayta nini. 54Babiloniaq nanaymanta qaparisqanmi uyarikun, Caldea runakunaq suyunmantan manchay thunikusqan uyarikun. 55Chayqa Señor Diosmi Babiloniata thunishan, sinchi ch'aqwaynintan p'uchukachipushan. Awqanmi qocha hinaraq phoqchiqeshan, phoqchiqeyninmi manchanatapuni uyarikushan. 56Babilonia thuniqmi hamusqa, hap'irqapunkuñan soldadonkutapas, p'akirqarinkuñan p'eqtankutapas. Señor Diosqa huchamanta muchuchiq Diosmi, sapankamanpas tupaqnintapuni qoq Diosmi. 57Tukuy-atiyniyoq Señor Diosmi nin: Ñoqan macharqachisaq Babilonia suyuq umallinkunata, yachaysapankunata, kamachikuqninkunata, oficialninkunata, soldadonkunatapas, hinan mana hayk'aq rikch'ariq wiñaypaq puñupunqaku, ñoqa Reymi chaytaqa nini, ñoqan kani Tukuy-atiyniyoq Señor Diosqa. 58Babilonia llaqtaq muyuriq ancho perqanpas pasaq pampa thunisqan kanqa, hatuchachaq punkunkunapas ninawan kanaykusqan kanqa. Chay hinaqa, yanqapaqmi suyukunaqa llank'arqanku, paykunaq sayk'uyninkuqa ninapin tukukun, nispa. 59Maasiaspa churin Neriaspa churin Seraiasqa Judá rey Sedequiaspa oficialninmi karqan, paypa ruwanantaq karqan reypa qorpachakunan wasi allichay. Sedequías Judapi tawakaq watapiña kamachikushaqtinmi, Seraiasqa Sedequiasta Babiloniaman riysirqan, hinan Jeremiasqa huk willakuyta Seraiasman apachirqan. 60Jeremiasqa huk qelqa k'uyupin qelqasqa llapan ima llakikunachus Babiloniata qatinanta. 61Seraiastataq nirqan: –Babiloniaman chayaspaykiqa aman qonqankichu kay qelqata alto kunkapi leeyta. 62Chaymantataq ninki: Señor Dios, qanmi nirqanki kay llaqtata thuninaykita, chay hinapi mana runapas uywapas kaypi tiyananpaq. Wiñaypaqmi kay cheqastaqa purunyachinki, nispa. 63Kay qelqa leeyta tukuspaykitaq, rumiman watarqospa Eufrates mayuman wikch'uykunki. 64Hinaspataq ninki: Kay hinatan Babiloniaqa chinkaykapunqa, manapuniñan hatarimuyta atinqañachu Señor Diospa hatun llaki churasqanmantaqa, nispa. Kaypin tukukun Jeremiaspa rimasqan.

will be added

X\