1 Señor Diosmi Amonmanta nin: ¿Israelqa mana churiyoqchu? ¿Israelpaqa manachu pillanpas kan? Chay hinari, ¿imanaqtintaq Amón runakunaq Milcom diosninri Gad aylluq hallp'anta hap'ikapun? ¿Imanaqtinmi Gadpa llaqtankunapi Amón runakunaqa tiyanku? 2 Chayamunqan huk p'unchay, ninmi Señor Diosqa. Amón runakunaq llaqtan Rabá contra phawaykamunankupaq qaparkachasqankuta uyarichinay. Rabá llaqtaq raqay-raqayman tukupunan, muyuriq llaqtachankunapipas ninallaña rawraykapunan. Hinan Israel runakunaqa paykuna qarqoqta qarqollanqakutaq. Ñoqa Señor Diosmi chayta nini. 3 ¡Hesbón runakuna, qapariychis Hai llaqtaq thunikusqanmanta! ¡Rabá warmikuna, nanaymanta qaparkachaychis! ¡Qhasqa p'achawan churakuspa qhasqoykichista takakuychis! Phawaychis waq'a hina cuerpoykichista k'irikuspa, Milcom diosniykichistan karu suyuman apanqaku sacerdotentinta allichachaq runakunantinta. 4 Yaw, mana chanin llaqta, ¿imanaqtinmi qhari-qhariman tukunki? Kallpaykiqa pisi-pisimantan chiriyashanña, huñusqayki qhapaq kayniykipi suyakuspan ninki: ¿Pitaq atinman ñoqa contra hamuyta? nispayki. 5 Allinta yachakuy, hinantinmanta kachaykamuspan q'aqchasqaykichis, sapankaykichismi mana qhawarikuspa phawarikapunkichis, manañataqmi kanqachu wakmanta huñuykuqniykichis. 6 Chaymantañan ichaqa Amón suyuta wakmanta t'ikarichisaq. Ñoqa Señor Diosmi chayta nini. 7 Tukuy-atiyniyoq Señor Diosmi Edommanta nin: ¿Manañachu Temanpi yachayniyoqqa kan? ¿Manañachu yuyaysapakunaqa yuyaychayta atin? ¿Yachayninchu waqllirqapun? 8 Dedanpi tiyaqkuna, Esaú llaqtataqa thunisaqñan, muchuchinay p'unchaymi chayamushan, chayrayku kutirispa ayqekuychis, qaqa wasikunapi pakakamuychis. 9 Uvasta pallaqkunapas wakin uvas ch'ampataqa saqenmi. Tuta suwa hamuspapas ima munasqallantan apan. 10 Ñoqan ichaqa Esaú llaqtata ch'usaqta ruwasaq, tarisaqmi pakakunanku cheqastapas, manapuniñan pakakuyta atinqakuchu. Wawanku, ayllunku, wasi-masinkupas llapallanmi thunisqa kanqa. Manan pipas ninqañachu: 11 Wakcha wawaykikunata saqeway, uywapushasqayki, viudaykikunatapas ñoqaña qhawaripushasqayki, nispa. 12 Señor Diosmi nin: Phiñakuyniywan hunt'aykusqa vasomanta manaña ukyananpaq kaqpas ukyanmi, ¿chaychu qanqa chay vasomanta mana ukyawaq? Manapunin hinallaqa kawaqchu, aswanpas ukyankipunin. 13 Ñoqa Señor Diosmi sutiyrayku jurani: Bosra llaqtapas purunyachisqan kanqa, hinallataq k'amisqa ñakasqa llaksakuyraq kanqa, llapan llaqtakunapas lliwpunin purunyapunqa, nispa. 14 Señor Diosmantan willakuyta uyarini, huk willakuqmi suyukunaman willamunanpaq kachasqa: ¡Huñukuychis! ¡Edom contra puririychis! ¡Sayarispa maqanakuq phawariychis! nispa. 15 Ñoqan lliw llaqtakunamanta aswan huch'uyman tukuchisqayki, llapan runakunaq pisichasqantaq kanki. 16 Yaw, qaqa k'akllukunapi tiyaqkuna, uyariychis qaqa ñawch'ikunapi tiyaqkuna, wak runakuna manchachiq kasqaykichiswanmi uma hoqariq kasqaykichispiwan q'otuchikurqankichis. Hinaña anka hina sinchi alto ranrapi tiyankichis chaypas, chaymantan urmaykachimusqaykichis. Ñoqa Señor Diosmi chayta nini. 17 Señor Diosmi nillantaq: Edompa thunikuyninqa sinchi mancharikuymi kanqa. Lliw chayninta puriqkunan muchusqanta rikuspanku manchakuymanta: ¡Ay, imaraqmi, ikiraqmi! ninqaku. 18 Sodoma llaqta Gomorra llaqta muyuriqninpi llaqtakuna hinan thunisqa kapunqa. Manan pipas chaypi tiyanqañachu, manataqmi wasichakunqapaschu. Ñoqa Señor Diosmi chayta nini. 19 Jordán mayu pata sach'a-sach'amanta q'achu-q'achuman lloqsiq león hinan Edom suyu runakunata hallp'ankumanta qatirparisaq kaq ratopacha, pi munasqaytataq rantinpi churasaq. ¿Pin ñoqa hina kanman? ¿Pin ñoqawan churanakunman? ¿Mayqen michiqmi hark'ayta atiwanman? 20 Chayrayku uyariychis ñoqa Señor Diospa Edom contra yuyaykusqayta, Temanpi tiyaqkuna contra unanchasqayta: Huch'uy uñakunatapas aysanqakun, waylla-wayllatapas chaqonqakun. 21 Edompa thunikuyninqa pasaqtan kununununqa, pacharaqmi khatatatanqa, qaparisqanpas Puka Qochamanraqmi uyarikunqa. 22 Awqanqa hanaqmanta phalaykamuq anka hinan Bosra pataman raphracharikuspan phawaykunqa. Chay p'unchaytaqmi Edompa soldadonkunaqa khatatatanqaku wachakuy nanaywan kashaq warmi hinaraq. 23 Señor Diosmi Damascomanta nin: Hamat llaqtawan Arfad llaqtawanmi khuyay llakisqa kashanku, mana allin willakuykunata uyarispa. Lamar-qochaq aytiynin hinan sonqonkuqa mana tiyanchu. 24 Damascoq kallpanmi chiriyarqapun, ayqekunanpaq kutirispan llaksakurqan, nanaywan phutikuywanmi lliwta q'aqcharqan wachakuy nanaywan kashaq warmi hina. 25 ¡Allin mentasqa llaqtan, kusisqalla kakuq llaqtan wikch'urparisqa kapun! 26 Chay p'unchaymi waynankuna plazankunapi sinku-sinku kanqa, llapan maqanakuqkunataq wañuranqaku. 27 Damasco muyuriq perqataqa ninawanmi kanaykusaq, rey Ben-Hadadpa qhapaq wasinkunatapas ruphaykunqan. Ñoqa Tukuy-atiyniyoq Señor Diosmi chayta nini. 28 Babilonia rey Nabucodonosorpa atipasqan Cedar ayllumanta Hazorpa umallinkunamantawan Señor Diospa nisqan: ¡Usqhaylla Cedarman phawaykuychis! ¡Chay inti haykuy ch'inneqpi tiyaq runakunata thuniychis! 29 Qechumuychis karpankuta uywankutawan, cortinankuta, camellonkunatawan, lliw imaymanankunatawan. Qapariychistaq: ¡Muyuriqniykichispin sinchi manchakuy kashan! nispa. 30 Señor Diosmi nin: Qankuna Hazorpi tiyaqkuna, ¡usqhaylla ayqeychis! ¡Allin-allinta pakakamuychis! Babilonia rey Nabucodonosormi qankuna contra yuyaykun, qankuna contra unanchaspan nin: 31 Hakullaña phawaykusun chay llakhi tiyaq runakunaman, paykunaqa tiyanku yanqa pampapin, mana imata yuyarispa, sapallanku mana piniyoq. 32 Camellonkunata qechusunchis, mana yupay atiy uywankunata apasunchis, nispa. Señor Diosmi nin: Hinantinmanmi ch'eqeykachisaq chay ch'ipu chukchan rutukuq runakunata, hinantinmantataqmi thuniqniykita apamusaq. 33 Hazormi wiñaypaq purunyapunqa, chaypin chacal animalkuna tiyanqa, manan pillapas tiyanqañachu, manataqmi pipas wasichakunqachu. Ñoqa Señor Diosmi chayta nini. 34 Judá suyupi kamachikuyta Sedequías qallarishaqtinmi, Señor Diosqa Jeremiasta Elammanta kayta nirqan. 35 Ñoqa Tukuy-atiyniyoq Señor Diosmi nini: Uyariy, Elampa wach'iqninkunatan chiriyachisaq, chaykunallawanmi payqa kallpayoq kashan. 36 Elam llaqta contran hinantinmanta wayrachisaq, hinantinmanmi ch'eqechisaq, manan kanqachu huk suyullapas Elam runakunaq mana chayasqanqa. 37 Elamtan awqanpa ñawpaqenpi khatatatachisaq, paykuna wañuchiy munaqpa ñawpaqenpin q'aqchasaq. Hatun llakikunatan chayachimusaq, paypin phiñakuyniyta thasnukusaq, pasaqta thuninaykaman maqanakuywan kachaykusaq. Ñoqa Señor Diosmi chayta nini. 38 Elampin kamachikuy tiyanayta churasaq, reyninkuta umallinkunatawanmi lliwta wañuchisaq. 39 Qhepamanmi ichaqa Elamta wakmanta t'ikarichisaq. Ñoqa Señor Diosmi chayta nini.
