Jeremías 47

1Manaraq rey Faraonqa Gaza llaqtaman phawaykushaqtinmi, Señor Diosqa Jeremiasman Filistea runakunamanta willarqan. 2Kay hinatan Señor Diosqa nin: Qhawariy, wichay suyumantan unu haykumushan, wasapashaq mayumanmi tukushan, lloqllaykunqan lliw suyuta chaypi kaqkunatawan, llaqtakunata lliw runakunantinta qhochunanpaq. Chay suyupi lliw tiyaqkunan qaparinqaku, runakunan nanaymanta ananananqaku 3caballokunaq phawasqanta uyarispanku, carretakunaq chhaqllallallasqanta uyarispanku, ruedanpa k'irkikisqanta uyarispanku. Taytakunan wawankutaraq wikch'ukapunqaku, kallpanku makinkupi manaña kapuqtin. 4Filistea runakuna thunina p'unchaymi chayamun, Tiro llaqtamanta Sidón llaqtamantawan llapan yanapaqkunata qechuna p'unchaymi chayamun. Arí, Señor Diosmi Filistea runakunata thuninqa, Creta islamanta puchuq runakunata thuninqa. 5Gaza runakunan llakikuymanta chukchankuta rutukunqa, Ascalón runakunataqmi uparaq qhepakapunqa. Filisteamanta puchuq pisi kallpakuna, ¿hayk'aqkamataq llakikuymanta cuerpoykichista mat'akunkichis? 6Qankunan qaparishankichis: ¡Ay! ¡Señor Diospa espadanqa! ¿Hayk'aqraqtaq sayaykunqa? ¡Waqaychanaykiman kutiykapullayña! ¡Hinallaña kapuy! ¡Thanillayña! nispa. 7¿Imaynataq hinallari kapunman Señor Diospuni kamachikushaqtinqa? Kamachisqataqmi kashan Ascalonman lliw qocha patakunamanpas phawaykunanpaq.

will be added

X\