Jeremías 46

1Hatun suyukunamanta Jeremiasman Señor Diospa nisqan: 2Egiptomantan kay hinata nirqan: Judá rey Josiaspa churin Joacim tawakaq watapiña kamachikushaqtinmi, Eufrates mayu pata Carquemispi Babilonia rey Nabucodonosorqa Egipto rey Necaoq soldadonkunata atiparqan. Kay hinatan Señor Diosqa chay soldadokunata nirqan: 3¡Escudokunata wakichikuychis! ¡Maqanakuyman usqhaychis! 4¡Caballokunata caronaychis! ¡Phawaqkuna sillakuychis! ¡Cascoyoqkama wachuchakuychis! ¡Lanzaykichista ñawch'iyachiychis! ¡Qara unkuykichiswan churakuychis! nispa. 5Ñoqa Señor Diosmi ichaqa nini: Imatachá rikushani. Manchay llaksasqan kashanku, chaymi kutirikampunku, allin qharikunan sarunchachikapunku. Mana qhepata qhawarikuspan usqhaylla ayqerikampunku. ¡Hinantinpin kashan sinchi manchakuy! Ñoqa Señor Diosmi chayta nini. 6Allin phawaqkunan mana atipunkuchu, allin qhari kaqkunan mana ayqeyta atipunkuchu. Wichay lado Eufrates mayu patapi misk'akuspan kumpakunku, nispa. 7¿Pitaq chay Nilo mayu hinaraq, sinchi phoqchiq unuyoq mayu hina hamushan? 8Egipton chayqa, Nilo mayu hina askha unuyoq, sinchi phoqchiq unuyoq mayu hinaraq hamushan. Egiptoqa ninmi: Wiñaspan kay pachantinman llimp'aykusaq, llaqtakunatan runantinta thunisaq, nispa. 9¡Caballopi soldadokuna usqhaychis! ¡Carretapi kaqkuna ñawpaychis! ¡Soldadokuna puririllaychisña, Etiopiamanta Libiamantawan soldadokunaqa escudokunawan churarqarisqan, Lidiamanta soldadokunaqa allin wach'iy yachaqkunan! 10Chay p'unchaymi ichaqa Tukuy-atiyniyoq Señor Diospa p'unchaynin, ayni-kutichinan p'unchay, awqanman ayni-kutichinan p'unchay. Saksanankaman espadaqa wañuchinqa, yawarwanpas machanankamaraq. Arí, Tukuy-atiyniyoq Señor Diosmi wichay lado suyupi Eufrates mayu patapi paykunata wañuchinqa. 11Egipto llaqta doncella sipas, Galaadta wichay balsamota maskhaq. Askha hampikunawanña hampikunki chaypas yanqapaqmi kasunki, qanpaqqa manapunin hampi kanñachu. 12Suyukunaqa ñan yachanña k'umuykachisqa kasqaykita, llapan llaqtakunan uyarishankuña qaparisqaykita. Maqanakuqkunan paykunapura takanakuspa iskayninku pampaman urmanku. 13Babilonia rey Nabucodonosor Egiptoman phawaykunanpaq qayllaykushaqtinmi, Señor Diosqa profeta Jeremiasta nirqan: 14–Egiptopi kayta willaychis, Migdolpi, Menfispi, Tafnespiwan willaychis, muyuriqniykichistañan espadaqa tukurqamushan, chayrayku wakichisqallaña sayashaychis. 15¿Imanaqtinmi Apis diosniykichisqa ayqekun? ¿Imanaqtinmi toroykichisqa mana allin takyasqatachu sayan? Chaytaqa ñoqa Señor Diosmi thunirqani. 16Soldadokunan misk'akuspa urmapunku, kukkuna-kukkunataq ninakunku: Haku kaymanta llaqtanchisman kutipusun, paqarisqanchis suyunchisman, atipaq espadamanta ayqesunchis, nispa. 17Chaypin qaparirqanku: Egipto rey Faraonta sutichaychis, rimaylla-rimaq mana ima ruwaq, nispa. 18Ñoqan kawsaq Reyqa kani, sutiytaqmi Tukuy-atiyniyoq Señor Dios. Sutiypin jurani: Imaynan Tabor orqo wakin orqokunamanta aswan hatun, imaynan Carmelo orqopas lamar-qochamanta aswan hatun, chay hinan awqaqa hamunqa. 19Egiptopi tiyaqkuna, q'epiykichista wakichikuychis kamachi-kayman apachikapunaykichispaq, Menfisqa purunyapunqan, mana piqpa tiyanan ch'usaqmi kapunqa. 20Egiptoqa munay wirayasqa malta wakan, ichaqa wichay ladomanta hamuspan tankayllu k'utunqa. 21Paywan kashaq pagasqa mink'a soldadokunapas wirayasqa torillokuna hinallataqmi, paykunapas phawashaspan kutirikampunku mana qhari hinachu sayaspanku, paykunaqqa qaqapananmi chayamun, ñak'arinanku p'unchaypiwan. 22Egiptoqa q'osñiyoqraqmi mach'aqway hina silbakuspa ayqen, soldadokuna qayllaykamushaqtin, mallki wit'uq hina hachakunantin hamushaqtin. 23Paykunan mallkikunata wit'unku, mana haykuy atina mallki-mallki kashaqtinpas. Langosta hina askhallañan kanku, mana piqpa yupay atinanraq. Ñoqa Señor Diosmi chayta nini. 24Egipto llaqtataqmi p'enqachisqa kashan, wichay ladomanta hamuq llaqtaman hap'ichisqan kashan. 25Israelpa Diosnin Tukuy-atiyniyoq Señormi nin: Ñak'arichisaqñan Tebas llaqtaq Amón diosninta, Egiptotapas llapan diosnintinta, reynintinta, Faraontapas payman hap'ipakuqkunatawan. 26Wañuchiy munaq Babilonia rey Nabucodonosorpa runankunantinpa makinmanmi urmaykachisaq. Ichaqa qhepa p'unchaymanqa Egipto suyupi tiyaqqa wakmantan ñawpaq hina kanqa. Ñoqa Señor Diosmi chayta nini. 27Señor Diosmi nin: Kamachiy Jacob, ama manchakuychu, Israel llaqtalláy, ama musphaychu. Qantaqa karu llaqtamantan qespichisqayki, wawaykikunatapas apasqa kasqan llaqtamantaqa horqompusaqmi. Jacobqa kutimuspa llakhillan kanqa, mana piqpa muchuchisqan allillanmi kanqa. 28Kamachiy Jacob, ama manchakuychu, qanwanmi ñoqaqa kashani. Maykunamanchus qanta ch'eqechisqay suyukunatan llapanta thunisaq, qantataqmi ichaqa manaña thunisqaykichu. Chaywanpas huchaykikunamantaqa muchuchisqaykipunin ahinapi wananaykipaq, nispa.

will be added

X\