Jeremías 44

1Señormi Jeremiasta nirqan, llapan Egipto suyupi tiyaq judío runakunapaq. Paykunan tiyarqanku Migdol llaqtapi, Tafnes llaqtapi, Menfis llaqtapiwan, kaqllataq uray lado Patros cheqaspipas. 2Israelpa Diosnin Tukuy-atiyniyoq Señormi nin: Qankunaqa rikurqankichismi Jerusalenman Judapi kaq llapan llaqtakunamanwan hatun llakita chayachisqayta. Kunantaq chaykunaqa mana piqpa tiyasqan raqay-raqay kashan, 3mana chanin ruwasqankumanta. Paykunan phiñachiwarqanku paykunaqpas qankunaqpas ñawpa taytaykichispapas mana reqsisqanku wak dioskunaman sacrificiota ruphachispa yupaychaspanku. 4Sapa kutinmi kamachiy profetakunata kachamurqaykichis: Ama ruwaychischu ñoqaq millakusqay mana chanin ruwaykunataqa, nispa niqta. 5Qankunataq ichaqa mana uyarikuspa mana kasuwarqankichischu, manallataq millay ruwayniykichistapas wak dioskunaman sacrificio ruphachiyniykichistapas saqerqankichischu. 6Chayraykun k'arak phiñakuyniyqa nina hinaraq rawrarirqan Judá llaqtakunapi Jerusalén callekunapi, hinaspan pasaqta purunyaykapurqan raqay-raqay kanankama, nispa. 7Ahinatan ñoqa Israelpa Diosnin Tukuy-atiyniyoq Señorqa nini: ¿Imanaqtinmi qankuna kikiykichista kay hatun mana allinta ruwakunkichis? ¿Imanaqtinmi wañuranankuta hinallata qhawawaqchis llapan Judá runakunata, qharikunata, warmikunata, erqekunata, qholla wawakunatapas, manaña huk runallapas kanankama? 8¿Imanaqtinmi ruwayniykichiswan phiñachiwankichis kay Egipto suyupi tiyasqaykichispi wak dioskunaman sacrificiota ruphachispaykichis? Chaywanqa qankuna kikiykichismi ch'usaqyachisqa kanaykichispaq maskhakushankichis kay pachantin runakunataqmi pisichasunkichis ñakasunkichispas. 9¿Qonqapunkichisñachu ñawpa taytaykichispapas Judá reykunaqpas warminkunaqpas mana allin ruwasqankunata, kaqllataq qankunaqpas warmiykichispapas Judá suyupi Jerusalén callekunapi ruwasqaykichistapas? 10Kunankamapas manapunin ñawpa taytaykichiskunapas qankunapas llakirikunkichisraqchu, manallataq manchakunkichispaschu, manallapunitaq kamachisqay simikunatapas unanchasqay simikunatapas kasukunkichischu. 11Chayraykun ñoqa Israelpa Diosnin Tukuy-atiyniyoq Señorqa niykichis: Yuyaykukunin qankunaman mana allinta chayachimuspa Judá runakunata llapantapuni ch'inyachinaypaq. 12Judá runakuna puchuqmanta Egiptoman tiyakapuq riy yuyaykukuqkunataqa llapantan hap'isaq, wañunqakutaq. Egiptopin huch'uypas hatunpas llapanku wañunqaku maqanakuypi, yarqaypi, hinaspataqmi lliwpa k'amisqan, millakusqan, ñakasqan, manchakuyraq kanqaku. 13Ñak'arichillasaqtaqmi Egiptopi tiyaqkunata, Jerusalenpi ñak'arichisqayta hina maqanakuywan, yarqaywan, onqoypiwan. 14Manapunin pillapas chay Judá runakuna puchuqmanta Egiptoman ripuspa tiyamuqkunaqa ayqenqakupaschu kawsanqakupaschu. Judamanña tiyakapuq kutimuyta munanqaku chaypas, manapunin kutimunqakuñachu, hinaña huk pisi ayqekuqkuna kanqaku chaypas, nispa. 15Chaypin askha runakuna kasharqan, warmikunaq wak dioskunaman sacrificiota haywashasqanta yachaq qharikuna, warmikunapas, Egipto uray ladopi tiyaq judío runakunapas. Paykunan Jeremiasta nirqanku: 16–Señor Diospa sutinpi niwasqaykikutaqa manan uyariyta munaykuchu. 17Aswanpas imatachus rimarirqayku chayllatapunin hunt'asaqku. Judá llaqtakunapi Jerusalén callekunapipas ñawpa taytaykupas, reyniykupas, llaqtayku umalli runakunapas ñoqaykupas Hanaq Pacha Reina nisqa diosamanqa sacrificiota ruphachishallaqpunin kayku, kaqllataq vino hich'asqa ofrendatapas haywashallaqpuni kayku, chayllatapunin ruwasaqku. Chayta ruwaqtiykun ñawpaqqa allin mikhuyniykupas kawaqku, lliw imapas allillanpuni kawaqku, manataq ima hatun llakikunapas kawaqkuchu, 18ichaqa Hanaq Pacha Reina nisqa diosaman sacrificio ruphachiyta hich'aykunapaq vino ofrenda haywaytawan saqepusqaykumantapachan mana imaykupas kanñachu, yarqaypi maqanakuypiwan wañupushayku, nispa. 19Warmikunapas nillarqankutaq: –Ñoqaykun Hanaq Pacha Reina nisqa diosaman sacrificiota haywarqayku, vino ofrendata hich'arqayku, t'antamantapas Reina nisqa diosaq rikch'ayninta ruwarqayku. Lliw chaykunataqa qosaykuq yachasqanmi ruwarqayku, kunanpas ruwallasaqkupunin, nispa. 20Hinan Jeremiasqa llapan chay rimaq qharikunata warmikunata nirqan: 21–Qankunapas, ñawpa taytaykichiskunapas, reyniykichispas, llaqta umalli runaykichispas, suyu runakunapas, Judá llaqtakunapi Jerusalén callekunapi sacrificiota haywarqankichis, ¿chaykunamantari yuyankichischu Señor Diospa mana reparasqantapas mana yuyarisqantapas? 22Señor Diosqa manapuniña millay mana chanin ruwasqaykichista hinata qhawayta munaspan suyuykichista mana runaq tiyananman raqay-raqay purunman tukuchirqan, chaymi kunan p'unchay ñakasqa kashan. 23Qankunaqa sacrificiota haywarqankichis, Señor Dios contran huchallikurqankichis, simintapas manan kasukurqankichischu, manallataq kamachikuy siminkunata, unanchasqa siminkunata, chaninchasqa siminkunatapas kasukurqankichischu, chaymantan kay hatun llakikunataqa ñak'arishankichis, nispa. 24Chaymantapas Jeremiasqa lliw runakunata, aswantaqa warmikunata nillarqantaq: –Uyariychis Señor Diospa kay willakuyninta, llapallaykichis kay llaqtapi tiyaq Judá runakuna, 25Israelpa Diosnin Tukuy-atiyniyoq Señormi nin: Qankunapas warmiykichiskunapas simiykichiswan rimasqaykichistan makiykichiswan ruwarqankichis. Qankunan rimarirqankichis: Ñoqaykun rimarirqayku Hanaq Pacha Reina nisqa diosaman sacrificiota haywanaykupaq, vino ofrendata hich'anaykupaq, chaytaqa hunt'asaqkupunin, nispa. ¡Allinmi! ¡Kusan! ¡Hunt'allaychis rimarisqaykichistaqa! ¡Ruwallaychis! 26Ichaqa ñoqa Señor Diospa nisqayta uyariwaychis, kay Egiptopi tiyaq judío runakuna: Ñoqan jurani hatun atiyniyoq sutiypi, manapunin Egiptontinpi tiyaq mayqen Judá runapas sutiyta rimarinqachu: “Señor Diospa sutinrayku” nispaqa. 27Ñoqaqa makillan qhawashaykichis mana allinta qankunata ruwanaypaq. Egiptopi llapa tiyaq judío runakunaqa yarqaywan, maqanakuywan wañunqaku, manan hukllapas qhepanqachu. 28Sinchi pisillan maqanakuypi mana wañuspa Egiptomanta Judaman ayqeqqa kanqa. Chaymantataq Judá runakunamanta puchuq Egiptopi tiyaq hamuqkuna yachanqaku paykunaq rimasqanchus cheqaq, icha ñoqaq rimasqaychus cheqaq kasqanta. 29Ñoqa Señor Diosmi nini: Kay suyupin ñak'arichisqaykichis, qankunata mana allin ruway rimarisqaytan hunt'asaqpuni. Chaykuna qankunapaq ancha sut'i kananpaqtaqmi, kayta ruwasaq: 30Ñoqan Egipto rey Hofrata qaraykusaq wañuchiy munaq awqanman, imaynatan hap'iykachirqani Judá rey Sedequiasta wañuchiy munaq awqan Babilonia rey Nabucodonosorman hinata, nispa.

will be added

X\