1 Jeremiasqa Diosninku Señor Diospa willachisqanta lliwta paykunaman willayta tukuqtinmi, 2 Osaiaspa churin Azariasqa Careaq churin Johananpiwan wakin k'ankaykachaq runakunapiwan Jeremiasta nirqanku: –¡Llullakuspan chaytaqa niwankiku! Diosniyku Señor Diosqa manan chaykunata nimuy nisunkimanchu, aman Egiptoman rinkichischu, nispaqa. 3 Neriaspa churin Barucmi chaytaqa tanqasunki Caldea runakunaq makinman hap'ichisqa kanaykupaq, chay hinapi wañuchisqapas suyunkuman apachisqapas kanaykupaq, nispa. 4 Ahinapin Careaq churin Johananpas soldadokunaq umallinkunapas llapa runakunapas Señor Diospa kamachikusqanta mana kasukurqankuchu, Judapi mana tiyayta munaspanku. 5 Aswanraqmi Johananwan soldadokunaq umallinkunapiwan Egiptoman pusarqanku Judá suyupi llapan qhepaq runakunata, hinantinman ch'eqechisqamanta tiyakapunankupaq kutimuqkunata, 6 guardiakunaq umallin Nabuzaradanpa, Ahicanpa churin Gedaliaspa kamachinanpaq saqesqan qharikunata, warmikunata, erqekunata, reypa ususinkunatawan aparqanku, hinallataq Jeremiastapas, Baructapas aparqanku. 7 Hinaspan Señor Diospa kamachikusqanta mana kasukuspanku, llapallanku chay runakuna Egiptoman ripurqanku, Tafnes llaqtamantaq chayarqanku. 8 Chay Tafnespitaq Señor Diosqa Jeremiasta nirqan: 9 –Judá runakuna qhawashaqtinmi hatuchaq rumikunata hoqarispa rey Faraonpa wasinman haykunaq ñawpaqenpi ladrillowan ruwasqa p'alta patata hasp'ispa p'ampanki. 10 Hinaspan paykunata ninki, Israelpa Diosnin Tukuy-atiyniyoq Señormi nin: Babilonia rey kamachiy Nabucodonosortan pusamusaq, hinan kay p'ampasqay rumi patapi kamachikunan tiyananta karpantawan churasaq. 11 Pay hamuspanmi Egipto suyuman phawaykuspa chaqorqarinqa. Wañunanpaq churasqa kaqkunaqa wañullanqapunin, wak llaqtaman apanapaq kaqkunapas apasqallapunin kanqa, maqanakuypi wañunanpaq kaqkunapas maqanakuyllapipunin wañunqa. 12 Ninawanmi kanaykunqa Egipto suyuq diosninkuna yupaychana wasikunata, paymi chay dioskunata presotapas apanqa ruphachinqapas, Egipto suyutan usantaraq pallanqa imaynan oveja michiqpas p'achanmanta oveja usata pallakun hinata, hinaspataqmi ripunqa mana piqpa imanisqan. 13 Egiptopi kaq inti yupaychana wasipi saywakunatan thuninqa, hinallataq Egipto suyuq diosninku yupaychana wasikunatapas ninawan kanaykunqa, nispa.
