1 Chaymantataq Careaq churin Johanán, Osaiaspa churin Azarías, soldadokunaq umallinkuna, llapan runapas hatunpas huch'uypas Jeremiasman qayllaykuspa 2 nirqanku: –Ama hinachu kay, valekuqmi hamushaykiku, ñoqaykupaqyá Señor Diosniykimanta mañaykapuwayku kay pisilla qhepaq runakunapaq. Ñawpaqqa askhan karqayku, kunantaq rikushawankiku hinapas pisillaña qhepakuyku. 3 Diosniyki Señor Diosmanta mañapuwayku paypuni maynin purinata yachachiwanankupaq imatachus ruwanaykutapas willawanankupaq, nispa. 4 Niqtinkutaq Jeremiasqa nirqan: –Allinmi. Diosniykichis Señor Diosmanta mañapusqaykichismi valekuwasqaykichisman hina, lliw imachus niwasqantapas mana pakaykuspan willasqaykichis, nispa. 5 Hinan paykunaqa Jeremiasta nirqanku: –Manataqchus ñoqayku kasusaqku Diosniyki Señor Diospa qanwan nichiwasqankuta chayqa, kikin Señor Diospuni ñoqayku contra cheqaq chaninta sayarispa rimariq kachun. 6 Munasaqkuña manaña munasaqkuchu chaypas mañapuwanaykikupaq kachashaykiku chay Diosninchis Señor Diospa nisqantaqa kasukullasaqkupunin, ahinapi allillanpuni kawsanaykupaq, paypa simintaqa hunt'allasaqkupunin, nispa. 7 Chunka p'unchaymantañataq Señor Diosqa Jeremiasta rimaykurqan, 8 hinan payqa waqyarqan Careaq churin Johananta, puriqmasin soldadokunaq umallinkunata, hatuntapas huch'uytapas lliw runakunatapas. 9 Hinaspan nirqan: –Kachawarqankichismi Diosmanta qankunapaq mañanpunaypaq, Israelpa Diosnin Señormi nin: 10 Kay suyupichus qhepakunkichis chayqa, ñoqan allinta wiñarichisqaykichis, manañan thunisqaykichisñachu, saphichisqaymantaqa manan t'irasqaykichisñachu, chay hatun llaki kachamusqaymantaqa llakikunipunin. 11 Manchakusqaykichis Babilonia reytaqa ama manchakuychisñachu. Amapuniña manchakuychisñachu. Ñoqan qankunawan kashani, ñoqataqmi qespichisqaykichis, paypa makinmanta qechuspa. 12 Ñoqaqa khuyapayasqaykichismi, paywanpas khuyapayachillasqaykichistaqmi, hinan llaqtaykichisman kutichimpusunkichis, nispa. Ñoqa Señor Diosmi chayta nini. 13 Ichaqa Señor Diosniykichista mana kasukuspachus ninkichis: Kay suyupiqa manan qhepaykumanchu, 14 aswanpas Egipto suyuman rispa tiyakampusaqku, chaypiqa manan rikusaqkuchu maqanakuytapas, manataq uyarisaqkuchu maqanakunapaq huñuq trompeta waqaqtapas, manallataq yarqaymantapas wañusaqkuchu, nispa chayqa, 15 qankuna Judapi qhepaqkuna uyariychis, Israelpa Diosnin Tukuy-atiyniyoq Señorpa nisqanta: Qankunachus Egiptopi tiyaq ripuyta munashankichispuni chayqa, 16 manchakusqaykichis maqanakuypas yarqaypas chay kikinpin taripasunkichis, chaypitaqmi wañunkichispas. 17 Cheqaqtapuni Egiptopi tiyaq ripuyta munaqkunaqa maqanakuypin, yarqaypin, onqoypin tukukapunqaku. Manan hukllapas kawsanqachu, manapunin ayqenqachu ñoqaq kachamusqay hatun llakimantaqa, nispa. 18 Israelpa Diosnin Tukuy-atiyniyoq Señormi nillantaq: Imaynan phiñakuyniykuna rawrarirqanraq Jerusalenpi tiyaqkunapaq hinallataqmi qankunapaqpas rawrarinqa Egiptomanpuni ripunkichis chayqa. Qankunan kankichis millay ñakasqa, k'amisqa, llaksakuypaq, manañataqmi kay suyutaqa rikunkichisñachu, nispa. 19 Yaw, Judá suyupi qhepaqkuna, Señor Diosmi kamachisunkichis: Ama Egipto suyuman riychischu, nispa. Allinta yachaychis, kunanmi ñoqa willashaykichis 20 qankunaq sinchi pantasqaykichista. Qankunan Diosniykichis Señor Diosmanta mañakuqta kachawaspa niwarqankichis: Diosninchis Señor Diosmanta mañaykapuwayku. Willaykuwaykutaq lliw ima nisqantapas, chayman hina ruwanaykupaq, nispa. 21 Kunantaqmi ñoqa willaykichis Diosninchis Señor Diospa “ninki” niwasqanta, qankunataq ichaqa mana kasukuyta munankichischu. 22 Chayrayku allinta yachakuychis, maqanakuypi, yarqaypi, onqoypiwanmi wañumunkichis maychus tiyaq ripuy munasqaykichis suyupi, nispa.
