Jeremías 4

1Señor Diosmi nin: Yaw, Israel, kutimpuyta munanki chayqa, ñoqamanmi kutirikampuwanayki. Millay idoloykikunatachus wikch'unki chayqa, ñoqamantapas manataq t'aqakuwankichu chayqa, 2sutiytapas hoqarinkitaq chayqa, cheqaqta allinta chanintataq purinkipas chayqa, suyukunan mañakamuwanqa: Saminchawayku, nispa, hinaspan yupaychawanqaku, nispa. 3Señor Diosmi Judá runakunatapas Jerusalén runakunatapas nillantaq: Mana tarpusqa purunkunata chakmaychis, amaña khiska-khiskapi tarpuychischu. 4Judá runakuna, Jerusalén runakuna, ñoqawan rimanakusqaykichista hunt'aychis, ñoqapaq sonqoykichista señalakuychis, qhelli kaqtataq wikch'upuychis. Paqtataq huchaykichiskuna hawa phiñakuyniy nina hinaraq rawrarinman, mana piqpapas thasnuy atinankamaraq rawrarinman, nispa. 5Señor Diosmi nin: Judapi kayta willamuy, Jerusalenpitaq kayta uyarichimuy: ¡Trompetata suyuntinpi tocamuy! nispa. Kunkayoqta qaparimuy: ¡Huñukusunchis! ¡Allin perqasqa llaqtakunaman haykusunchis! 6Banderaykichista Sión ladoman hoqariychis. ¡Ayqekuychis pakakuna cheqaskunaman! ¡Amaña sayaykuychischu! Wichaymantan hatun llakita apamushani, sinchi ch'usaqyachiqtan chayachimushani, nispa. 7Ñan leonqa t'oqonmanta lloqsimunña, suyukunata thuniqqa purimushanñan, hallp'anmantaqa lloqsimunñan suyuykita thuninanpaq, llaqtaykikunata raqay-raqayta ruwaspa purunyachinanpaq. 8Chayrayku qhasqa p'achawan p'achakuychis, waqaychis, llakikuymanta anchiychis, Señor Diospa k'arak phiñakuyninqa manaraqmi ñoqanchismanta anchhurinchu. 9Señor Diosmi nin: Chay p'unchay chayamuqtinmi reykunapas umallikunapas chiriyanqaku, sacerdotekunapas khatatatanqaku, profetakunapas pasaqta llaksakunqaku, nispa. 10Ñoqataq nirqani: ¡Ay, Apu Señor Diosníy! ¿Imapaqtaq kay llaqtata Jerusalentawan q'oturqanki? Allillanmi kankichis, nirqankin riki, ñataq espadaqa patankupiña kapushasqa, nispa. 11Chaypachan kay llaqtata Jerusalentawan ninqaku: Aqo-aqo ch'in pampamantan ruphakuq wayra wayramushan, munasqay llaqta cheqasmanmi phukumushan, manan trigota wayrachispa ch'uyananapaq hina wayrachu, 12wayrachinapaqqa sinchi kallpayoq wayran kayqa, kay wayraqa ñoqaq kachamusqay wayran. Kunanqa paykunatan hatun taripaywan muchuchisaq, nispa. 13Señor Diosmi nin: ¡Qhawariychis! Awqaqa phuyu hinaraqmi qayllaykarqamushan, carretankupas tutuka hatun wayra hinaraqmi hamushan, caballonkupas ankamanta aswan phawaqraqmi. Llaqta runataq nin: ¡Ikiraqmi ñoqanchismanta, kunankamallachá karqanchis! nispa. 14Jerusalén llaqta, mana allinmanta sonqoykita ch'uyanchakuy, chay hinapiqa qespikunkin. ¿Hayk'aqkamataq umaykiqa yuyanqa millay mana chaninkunallatapuni? 15Kaytañan Dan llaqtamanta willakuq hamushan, Efraín orqo-orqomantan llaki willakuyta apamushan. 16Willariychis suyukunaman awqaq hamushasqanta, willariychis Jerusalenmanpas. Karu llaqtamantan hamushan muyuykuspa thuninanpaq, Judapi llaqtakuna contran qaparkachamushanku. 17Judatan chakra cuidaqkuna hinaraq muyuykushanku, ñoqa contra sayarisqanmantan muyuykushanku. 18Millayta purispayki ruwasqaykikunamantan kay imaymana qatisunki. Huchaykikunamantan kay hatun llakikunaqa chayamusunki, chaykunan sonqoykita k'irisunki. Ñoqa Señor Diosmi chayta nini. 19Jeremiasmi nirqan: ¡Ay! ¿Imanarqosaqmi kay nanayta? ¡Sonqoymi llakikuymanta phatarqoshawanña! ¡Ay, sonqolláy! ¡Manan takyarqoshaniñachu! Trompetaq waqasqantan uyarishani, hatun maqanakuy ch'aqwaytan uyarishani. 20Llaqta-llaqtapin hatun llakillaña kaykushan, llapa suyuntinmi raqay-raqayman tukuykapushan. Hukpaqkama thunisqañan karpaykunapas, astaykachakunay toldoykunapas imaynañachá kapushan. 21¿Hayk'aqkamapunitaq orqokunapi banderata rikusaq? ¿Hayk'aqkamapunitaq trompetaq waqasqantapas uyarisaq? nispa. 22Señor Diostaq nirqan: Llaqtayqa uma muyusqan kashan, manan reqsiwanchu, mana yuyayniyoq runakunan kanku, mana yuyaykukuqmi kanku. Mana allin ruwaypaqqa kusallañan kanku, allin ruwaytataqmi mana yachankuchu, nispa. 23Qhawarirqanin kay pachata, rawisqa ch'usaqmi kashasqa, qhawarirqanin hanaq pachata, manataq k'anchayqa kapusqachu. 24Qhawarirqanin orqokunata, chhaphchiykukushasqakun, llapan moqokunapas kuyuykushasqakun. 25Qhawarirqanin, manañataq huk runallapas kasqachu, phalaq animalkunapas lliwmi phalarikapusqaku. 26Qhawarirqanin imaymana mikhuypa wiñanan purunyapusqanta, qhawarirqanin llapan llaqtakuna raqay-raqay kashasqanta. Señor Diosmi k'arakta phiñakuspa chaykunata ruwarqan. 27Señor Diosmi nin: Llapan hallp'an purunyachisqa kanqa, ichaqa manan llapantachu thunisaq. 28Kay kikin hallp'an llakikuymanta waqanqa, hanaq pachapas llakikuymantan tutayanqa. Ñoqan nirqani: Yuyaykusqaytaqa hunt'asaqmi, rimarisqaytaqa manan p'akisaqchu, nispa. 29Caballopi phawaq soldadokunaq qaparisqanta uyarispan wach'iqkunaq qaparisqanta uyarispan, llapan runakunaqa ayqerikapunku. Sach'a-sach'apin pakarqokunku, wakintaq sallakunaman k'askarqokunku. Llapa llaqtakunan wikch'usqa kashan, manataq pillapas tiyaqqa kanñachu. 30Qan thunisqa llaqtari, ¿imapaqñataq llawlli-puka p'achawan churakunki? ¿Imapaqñataq qorimanta alhajakunawan warkukunki? ¿Imapaqñataq ñawiykitapas yanawan llusikunki? K'achanchakusqaykiqa manan imapaqpas valenñachu, munaqniykikunaqa wikch'upusunkikuñan, paykunaqa wañunaykitan munashanku. 31Uyarishanin phiwi wawata wachakuy nanaywan qapariq warmita hina waqashaqta, chayqa Sionpa qaparisqanmi. Makinkunata mast'arispanmi waqashan: ¡Ikiraqmi ñoqamanta! ¡Runa sipiqkunan wañuchiwanqa! nispa.

will be added

X\