Jeremías 39

1Judá rey Sedequiaspa isqonkaq wataq chunkakaq killanpi kamachikushaqtinmi Babilonia rey Nabucodonosorqa llapan soldadokunantin Jerusalenman hamurqanku, hinaspataq llaqtata muyuykurqanku. 2Sedequías chunka wata tawa killaña kamachikushaqtinmi, killaq isqon p'unchayninpi llaqta muyuriq perqata q'asarqanku. 3Jerusalén hap'isqa kaqtintaq Babilonia reypa llapan umallinkuna haykuspa “Chawpi Punku” nisqapi kamachikuq tiyaykurqanku. Chaykunan karqan Nergal-sarezer, Samgar-nebo, qollana Sarsequim, hatun qollana hukkaq Nergal-sarezer, wakin umallikunapiwan. 4Chaykunata rikuspataq, rey Sedequiasqa soldadonkunantin llaqtamanta ayqekapurqanku. Reypa huerta kanchan cheqasnintan tutapacha rispa iskaynin perqa tupay punkunta lloqsirqorqanku, hinaspataq Jordán wayq'oman puririykapurqanku. 5Paykunaq qhepanta phawarispataq, Babilonia soldadokunaqa Jericó pampaman Sedequiasman tariparqorqanku. Hap'irqospataq Hamat suyupi Ribla llaqtapi kaq rey Nabucodonosorman aparqanku. Chaypin rey Nabucodonosorqa kamachikurqan paypaq imachus kananta. 6Hinaspan Sedequías qhawakushaqtin ñawpaqenpi churinkunata Judamanta llapan umallikunatapas nak'arqarichirqan. 7Sedequiaspa ñawinkunatataq horqochirqan, hinaspan bronce cadenawan watasqata Babiloniaman apachirqan. 8Babilonia soldadokunataq runakunaq wasintapas reypa palaciontapas llaqtatapas ninawan kanaykurqanku, hinaspan Jerusalén perqata thunirqanku. 9Chay qhepatañataq reypa guardiankunaq umallin Nabuzaradanqa Babiloniaman kamachi-kaypaq apapurqan llaqtapi llapan qhepaq runakunata, Caldea runakunaman chimpakapuqkunatawan. 10Judá suyupitaqmi wakin mana imayoq wakchakunata saqespa, paykunaman qorqan uvas chakrakunata, chakra llank'ana hallp'akunatawan. 11Babilonia rey Nabucodonosortaq guardiakunaq umallin Nabuzaradanta Jeremiasmanta kamachirqan: 12Jeremiastaqa horqomuspan allinta uywanki, amataq ima mana allintapas ruwankichu, aswanmi tukuy ima munasqanta ruwanki, nispa. 13Hinan Nabuzaradanqa, qollana Nabusazbanwan, hatun qollana Nergal-sarezerwan wakin Babilonia reypa umallinkunapiwan 14kamachirqanku guardiakunaq pationmanta Jeremiasta horqomunankupaq. Hinaspataq Safanpa churin Ahicampa churin Gedaliasman qorqanku kikin Jeremiaspa wasinman pusanankupaq. Ahinapin Jeremiasqa llaqtan runawan tiyaspa qhepakapurqan. 15Jeremiasqa guardiakunaq patiollanpiraq wisq'asqa kashaqtinmi Señor Diosqa payta rimapayasqa: 16“Phaway, Etiopía runa Ebed-melecta nimuy: Israelpa Diosnin Tukuy-atiyniyoq Señormi nin: Kay llaqtamanta rimasqaytaqa hunt'asaqpunin, allinnintaqa manan munanichu aswanpas thunisaqpunin. Rikushaqtiykin chaykunaqa hunt'akunqa. 17Chay p'unchaymi ichaqa ñoqa waqaychasqayki, ahinapin manchakusqayki runaman mana hap'ichisqachu kanki. Ñoqa Señor Diosmi chayta nini. 18Ñoqan qespichisqayki, chaymi paykuna mana wañuchisunkikuchu, kawsallankipunin ñoqaman hap'ipakuwasqaykirayku”, nispa. Ñoqa Señor Diosmi chayta nini.

will be added

X\