Jeremías 38

1Matanpa churin Sefatías, Pasurpa churin Gedalías, Selemiaspa churin Jucal, Malquiaspa churin Pasurpiwanmi llapa runaman Jeremiaspa rimasqanta uyarirqanku. Jeremiasmi kay hinata nirqan: 2–Señor Diosmi nin: Pillapas llaqta ukhupi qhepakuqqa wañunqan maqanakuypi, yarqaypi, onqoypiwan. Pillapas paymantakama lloqsispa Caldea runakunaman chimpapuqmi ichaqa mana wañunqachu, imaynallatapas kawsaynintaqa qespichinqan, nispa. 3Señor Diosmi nillantaq: Kay llaqtaqa cheqaqtapunin Babilonia reypa soldadonkunaq makinman urmaykapunqa, paykunataq hap'ikapunqa, nispa. 4Hinan umallikunaqa reyta nirqanku: –Kay runataqa wañuchisun. Chay hina rimasqankunawanmi kay llaqtapi qhepaq soldadokunatapas wakin runakunatapas pisi kallpayachin. Kay runaqa manan llaqtaq allinnintaqa maskhanchu, aswanmi mana allinnillantapuni munan, nispa. 5Rey Sedequiastaq nirqan: –Ruwaychis ima munasqaykichista, ñoqaqa manan qankunataqa hark'asqaykichischu, nispa. 6Hinan paykunaqa Jeremiasta hap'ispa guardiakunaq pationpi reypa ayllun Malquiaspa p'uytunman, waskhawan kachaykurqanku. P'uytupiqa manan unu karqanchu, aswanmi t'urulla, chay t'urumanmi Jeremiasqa chinkaykurqan. 7Huk Etiopía runan karqan Ebed-melec sutiyoq, payqa karqan reypa wasinpi oficialmi. Paymi Jeremiasta unu p'uytuman wikch'uykusqankuta yacharqorqan. Chaypachataqmi reyqa “Benjamín Punku” nisqapi huk huñunakuypi kasharqan. 8Chaymi Ebed-melecqa reypa palacionmanta lloqsirqospa reyman willaq phawarqan, 9nirqantaq: –Reyníy, chay runakunan sinchi mana allintapuni profeta Jeremiasta ruwaykunku, unu p'uytumanmi wikch'uykusqaku, chaypitaqmi yarqaymanta wañupushanña, manataqmi llaqtantinpi t'antapas kapunñachu, nispa. 10Hinan reyqa kaq ratopacha Ebed-melecta kamachirqan: –Kaymanta kinsa chunka runata pusarikuy, hinaspa Jeremiasta p'uytumanta horqochimuy manaraq wañurqoshaqtin, nispa. 11Ebed-melectaq runakunata pusarikuspa rirqan reypa palacionpi kaq p'acha waqaychana wasita, chaymantan aparikurqanku llik'i-llik'i thantakunata, chaytataq waskhapi kachaykurqanku Jeremiaspa kasqanman, 12nirqantaq: –Chay thantakunawan wallwak'uykikunaman churarqarikuy mana waskhaq nanachinasuykipaq, nispa. Jeremiastaq chay hinata ruwakurqan. 13Hinan runakunaqa patanmanta waskhawan chutarqanku chaymanta horqonankukama. Chay qhepatataq Jeremiasqa guardiakunaq pationpi qhepakurqan. 14Chaymantataq rey Sedequiasqa profeta Jeremiasta waqyachimuspa Señor Dios yupaychana wasiq kinsakaq punkunman pusachimurqan. Chaypitaq reyqa nirqan: –Huktan tapukuyta munashayki, ichaqa sut'inta willaykuwanki, nispa. 15Jeremiastaq nirqan: –Kutichiykimanña chaypas wañuchiwankimanmi. Imataña yuyaychaykiman chaypas manataqmi kasukuwaqchu, nispa. 16Rey Sedequiastaq ichaqa Jeremiasman pakallapi jurarqan: –Kawsay qowaqninchis Señor Diosmi yachan, manan wañuchisqaykichu, manataqmi wañuchiy munaqniykiq makinmanpas hap'iykachisqaykichu, nispa. 17Chaymi Jeremiasqa Sedequiasta nirqan: –Israelpa Diosnin Tukuy-atiyniyoq Señormi nin: Babilonia reypa oficialninkunaman k'umuykukunki chayqa manan wañunkichu. Kay llaqtapas manan ninawan kanasqachu kanqa. Qanpas aylluykikunapas kawsankichismi. 18Manataq paykunaman k'umuykunkichischu chayqa, Babilonia soldadokunan llaqtata hap'ikapunqaku, kanaykunqakuraqtaq, qanpas manataqmi ayqeyta atinkichu, nispa. 19Sedequiastaq nirqan: –Babilonia soldadokunaman huñukapuq llaqta-masinchiskunatan manchakushani, paykuna Babilonia soldadokunaman hap'ichiwaqtinqa, imataraqchá mana ruwawanqakuchu, nispa. 20Jeremiastaq nirqan: –Manan paykunaq makinmanqa chayankichu. Ñoqaq nisqayta kasukuspa Señor Diospa munayninta ruway, ahinapin allillan kasunki manataq wañunkichu. 21Señor Diosqa ñan rikuchiwanña imachus kananta, manataqchus qan asuykapunki chayqa. 22Kaytaqmi rikuchiwasqan: Llapan Judá reypa palacionpi qhepaq warmikunatan Babilonia reypa oficialninkuna horqonqaku. Chay warmikunataqmi qanta nisunkiku: ¡Chay hinan chay amigoykikuna! ¡Sumaqllata q'oturqosunki paykunaq yuyayninta kasuchikuspa! Chakiykipas t'urumanmi chinkaykapun, amigoykikunataq qheparparipusunkiku, nispa. 23Jeremiasqa nillarqantaqmi: –Llapan warmiykikunan wawaykikunapiwan Babilonia soldadokunaman qosqa kanqa, qanpas manan maymanpas ayqeyta atinkichu, aswanmi Babilonia reyqa hap'ichisunkipuni, llaqtatapas ninawanraqtaq kanaykunqa, nispa. 24Chaymi Sedequiasqa Jeremiasta nirqan: –Mana wañuyta munaspaqa, rimasqanchista ama pimanpas rimarinkichu. 25Umalliykunaña rimasqanchista yacharqospa tapuq hamusunkiman: Willawayku imatan rey nirqasunki, qanpas ima nispan reyta nirqanki chayta, mana willawankikuchu chayqa wañunkin, nispa chayqa, 26ninkin: Ñoqan valekusharqani amaña wakmantaqa Jonatanpa wasinman apachiwananpaq, ama chaypi wañunaypaq, nispayki. 27Chay nisqanman hinapunitaq umallikunaqa Jeremiasman hamuspa tapurqanku, paytaq kutichirqan reypa yachachisqanta hinapuni. Chaymi mana imanipurqankupaschu, rimasqankuta mana pillapas uyarisqan hawa. 28Jeremiasqa guardiakunaq pationpin qhepakapurqan Babilonia soldadokunaq Jerusalenta hap'ikapunanku p'unchaykama.

will be added

X\