Jeremías 37

1Babilonia rey Nabucodonosormi Judapi rey kananpaq churarqan Josiaspa churin Sedequiasta, Joacimpa churin Jeconiaspa rantinpi. 2Señor Diospa Jeremiaswan willachisqantaqa manan kasurqankuchu Sedequiaspas oficialninkunapas llaqta runakunapas. 3Chaywanpas rey Sedequiasqa kacharqan, Selemiaspa churin Jucalta, Maasiaspa churin sacerdote Sofoniastawan profeta Jeremías valekuqta: Diosninchis Señor Diosmanta ñoqaykupaq mañapuwayku, nispa nimunankupaq. 4Jeremiasqa manan wisq'asqaraqchu karqan, payqa llaqta ukhupi maytapas riyta atillarqanmi. 5Babilonia soldadokuna Jerusalenta phawaykunanpaq muyupayashaqtinmi, rey Faraonpa soldadonkunaqa Egipto suyumanta lloqsimurqanku Sedequiasta yanapaq, chayta uyarispan Babilonia runakunaqa chaymanta kutipurqanku. 6Hinan Señor Diosqa Jeremiasta rimaykurqan, 7Israelpa Ñoqa Señor Diosninmi nini: Judá rey Sedequiaspa kachamusqankunaman niychis, Egiptomanta rey Faraonpa soldadonkuna yanapaqniykichis lloqsimuqkunaqa kaqtan Egiptoman kutipunqaku. 8Babilonia soldadokunaqa wakmantan kutimunqaku Jerusalén llaqtaman phawaykunankupaq, haykuspataq ninawan kanaykunqaku. 9Ñoqa Señor Diosmi willashaykichis: Ama yanqa kikiykichista q'otukuspa yuyaychischu: Babilonia soldadokunaqa cheqaqtapunin ripunqa, nispaykichis, chayqa manan hinachu kanqa. 10Hinaña qankuna Babilonia soldadokunata llapanta maqanakuypi atipawaqchis chaypas, karpankupi iskay kinsa k'irisqakuna qhepankuman, chaykunan sayarimuspa llaqtaykichista ninawan kanaykunkuman, nispa. 11Babilonia soldadokunataq Jerusalén muyuykusqankumanta kutipurqanku, Faraonpa soldadonkuna hamushasqanta yacharqospanku. 12Hinan Jeremiasqa Benjamín aylluta risharqan hallp'a rakiyman, chaypi tupaqnin hallp'a chaskikapuq. 13Benjamín Punku nisqaman chayaqtintaq, hap'irqapurqan Hananiaspa churin Selemiaspa churin Irías. Paymi karqan chaypi kaq guardiakunaq umallin, nirqantaq: –Caldea runakunamanmi qanqa rishanki, nispa. 14Jeremiastaq nirqan: –Yanqan chaytaqa niwanki, manan Caldea runakunamanchu rishani, nispa. Iriastaq ichaqa mana uyariq tukuspa umallikunaq qayllanman apamurqan. 15Paykunataq Jeremiasta sinchita phiñarikuspa suq'achirqanku, hinaspan reypa qelqaqnin Jonatanpa wasinman wisq'achirqanku. Chay wasin carcelman tukuchisqa karqan. 16Ahinapin Jeremiasqa cárcel wasiq pachan t'oqoman wisq'asqa karqan unay p'unchaykunapaq. 17Rey Sedequiastaq kamachirqan tiyasqanman Jeremiasta pusamunankupaq, payta pusamuqtinkutaq reyqa pakallapi tapuykurqan: –¿Señor Diosqa icha imallatapas rimaykurqasunkichu? nispa. Jeremiastaq nirqan: –Arí, kashanmi. Qanmi Babilonia reyman hap'ichisqa kanki, nispa. 18Rey Sedequiastataq Jeremiasqa tapuykukurqan: –¿Ima mana allintan contraykitapas umalliykikunaq contrantapas llaqta runaq contrantapas ruwarqani carcelman wisq'achiwanaykichispaq? 19¿Maytaq chay: Manan Babilonia reyqa hamunqachu qanmanpas suyumanpas, nispa profetizaqkunarí? 20Kunanqa reyníy, ama hinachu kay, mañakusqayta uyariykuway: Amaña wakmanta apachiwayñachu qelqaqniyki Jonatanpa wasinmanqa, ama chaypi wañunaypaq, nispa. 21Chaymi rey Sedequiasqa kamachikurqan Jeremiasqa guardiakunaq patiollanpiña waqaychasqa kananpaq. Hinaspan sapa p'unchay t'antata qochirqan callemanta rantichimuspa, ahinatan rantichimurqan llaqtapi t'anta kanankama. Ahinapitaqmi Jeremiasqa patiollapi waqaychasqa qhepakapurqan.

will be added

X\