Jeremías 36

1Israel suyu rey Josiaspa churin Joacimqa Judá suyupi tawakaq watapiña kamachikushaqtinmi, Señor Diosqa Jeremiasta nirqan: 2–Josiaspa rey kasqan tiempopi chayllaraq rimapayarqayki, kunankamataqmi rimapayashallayki, chay hinaqa huk qelqana k'uyuta hap'iy, hinaspa Israel suyumanta, Judá suyumanta, wakin suyukunamantawan qanman nisqayta chaypi llapallanta qelqay. 3Ichapaschá Judá runakuna lliw imaymana hatun llakikuna chayachinayta yachaspa, millay mana allin ruwayninkuta wikch'unkuman, ñoqataq millay mana chanin huchankuta pampachayman, nispa. 4Hinan Jeremiasqa Neriaspa churin Baructa waqyarispa Señor Diospa lliw nisqanta payman qelqananpaq willarqan, Baructaq huk qelqana k'uyupi qelqarqan. 5Chaymantataq Jeremiasqa Baructa nirqan: –Qhawariy hark'asqa kasqayta, chaymi Señor Dios yupaychana wasiman haykunayta hark'awan. 6Chayrayku, ayunananku p'unchay Señor Dios yupaychana wasiman riy, hinaspa Señor Diospa siminta qelqachisqay qelqata leempunki, llapan chaypi runakunaman Judá llaqtakunamanta hamuq runakunamanwan. 7Ichapaschá Señor Diosmanta mañakunkuman, hinaspataq millay ruwayninkuta saqepunkuman, Señor Diospa k'arak phiñakuyninwan kay llaqtata amenazasqanqa mancharikuymi kashan, nispa. 8Hinan profeta Jeremiaspa lliw kamachisqanta Barucqa ruwarqan, Dios yupaychana wasita rispataq Señor Diospa simin qelqa k'uyuta leemurqan. 9Josiaspa churin Joacimqa Judá suyupi tawa wata isqon killaña kamachikushaqtinmi, Jerusalenpi llapan runakunata Judá llaqtakunamanta hamuq runakunatawan Señor Diospa qayllanpi ayunanankupaq kamachirqanku. 10Baructaq yupaychana wasiman haykurqan reypa qelqaqnin Safanpa churin Gemariaspa wasinman, chay wasin karqan yupaychana wasi aswan ukhu patiopi “Mosoq Punku” nisqa qayllapi. Chaymantapachan payqa llapan runaman leemurqan Jeremiaspa rimasqan qelqa k'uyuta. 11Señor Diospa simin qelqa k'uyupi Barucpa leesqantataq Safanpa churin Gemariaspa churin Micaiasqa lliwta uyarirqan, 12paymi rirqorqan reypa wasinpi kaq qelqaqpa wasinta. Chaypin llapan umallikuna huñuykusqa kasharqanku: Reypa qelqaqnin Elisama, Semariaspa churin Delaía, Acborpa churin Elnatán, Safanpa churin Gemarías, Hananiaspa churin Sedequías, wakin umallikunapiwan. 13Hinan Micaiasqa llapan runaman qelqa k'uyumanta Barucpa leesqan uyarisqanta willarqan. 14Chaymi umallikunaqa Netaniaspa churin Jehudita kacharqan Baructa nimunanpaq: Runaman leesqayki qelqa k'uyuta aparikuspa hamuy, nispa. Jehudiqa karqan Cusiq churin Selemiaspa nietonmi. Baructaq qelqa k'uyuta aparikuspa qayllankuman rirqan, 15paykunataq nirqanku: –Tiyaykuy, hinaspa qelqa k'uyuta leepuwayku, nispa. Chaymi Barucqa leeykapurqan, 16uyarispanku hinataq sinchi mancharisqa qhawapunakuspa ninakurqanku: –Kaytaqa llapantan reyman willananchis, nispa. 17Chaymantataq Baructa nirqanku: –Willawayku: ¿Imaynatan kayta qelqarqanki? ¿Jeremiaschu qelqachirqasunki? nispa. 18Baructaq willarqan: –Arí, Jeremiaspunin llapanta qelqachiwarqan, chaytan ñoqaqa tintawan qelqa k'uyupi qelqarqani, nispa. 19Chaymi paykunaqa Baructa nirqanku: –Chay hinaqa, Jeremiaspiwan phawaspa pakakamuychis mana piqpa rikunanman, nispa. 20Chay umallikunataq qelqa k'uyuta reypa qelqaqnin Elisamaq wasinpi waqaychaspa, reypa wasinta rirqanku lliw chaykunata reyman willaq. 21Reytaq Jehudita qelqa k'uyuman kutirichimurqan, hinan qelqaqnin Elisamaq wasinmanta qelqa k'uyuta apaspa reyman chaypi kashaq umallikunamanwan leerqan. 22Chiri killa kaqtintaq reyqa q'oñikunan wasipi nina rawraypa qayllanpi tiyasharqan. 23Jehudiqa kinsa tawa cheqastaña leeshaqtintaq, reyqa huk cuchillowan kuchurqarirqan, hinaspataq nina rawrayman wikch'uykurqan ruphananpaq. Chay hinatan ruwarqan qelqa k'uyuta tukunankama. 24Chay leesqata uyarispataq mana mancharikullarqanpaschu, manallataq p'achankutapas llakikuymanta llik'ikurqankuchu reypas umallinkunapas. 25Hinaña Elnatanwan Delaiawan Gemariaspiwan ama qelqa k'uyuta kanananpaq reyta hark'akurqanku chaypas, reyqa manan uyariqpas tukurqanchu, 26aswanmi kamachirqan paypa churin Jerameelta, Azrielpa churin Seraiastawan Abdeelpa churin Selemiastawan profeta Jeremiasta qelqaqnin Baructawan hap'imunankupaq. Señor Diostaq ichaqa paykunata pakaykurqan. 27Jeremiaspa Barucwan qelqachisqan qelqa k'uyutan reyqa kanachirqan, chay qhepatan Señor Diosqa Jeremiasta nirqan: 28–Mosoq k'uyuman qelqay Judá rey Joacimpa kanasqan qelqa k'uyupi kaq simikunata. 29Hinallataq reyta ninki, Señor Diosmi nisunki: Qanmi qelqa k'uyuta kanarqanki, Jeremiastapas k'amirqanki, ¿imanaqtinmi qelqarqanki: Cheqaqtapunin Babilonia reyqa hamunqa kay suyuta thuniq, runantinta uywantinta ch'usaqyachiq, nispayki? nispa. 30Chaymi Señor Diosqa nillasunkitaq: Qan Joacimpa mirayniykiqa manan Davidpa kamachikuy tiyananpi tiyanqachu. Qanpa ayaykiqa wikch'usqan kanqa, p'unchay ruphaypi tutataq qasapi. 31Qantapas mirayniykitapas umalliykikunatapas huchaykichiskunamantan ñak'arichisqaykichis. Qanpas aylluykikunapas Jerusalenpi tiyaq runakunapas Judá runakunapas manan uyariwarqankichischu, chayraykun lliw hatun llakikunata llapaykichisman chayachimusaq, nispa. 32Hinan Jeremiasqa mosoq k'uyuta hap'ispa Barucman qorqan. Chaypitaq wakmanta qelqachirqan Joacimpa kanachisqan k'uyupi kaq simikunata, hinallataq payqa yapachirqan chayman rikch'akuq askha simikunatawanraq.

will be added

X\