Jeremías 34

1Babilonia suyu rey Nabucodonosor llapan paypa munayninpi kashaq suyukunamanta soldadokunantin, Jerusalén contra qayllanpi llaqtakuna contra phawaykushaqtinmi, Señor Diosqa Jeremiasta nirqan: 2–Ñoqa Israelpa Diosnin Señormi niyki Judá rey Sedequiasman rispa nimunaykipaq. Señor Diosmi nin: Ñoqan Babilonia reyman kay llaqtata hap'iykachisaq, paytaq ninawan kanaykunqa. 3Qantaqmi mana ayqekuspalla makinman urmaykunki, hap'irqospankun payman qoykusunkiku. Uyapura paywan tupaspan ima ruwasqaykitapas willakapunki, Babiloniamantaq apasqa rinki, nispa. 4Chaytukuywanpas, rey Sedequías, Señor Diospa simintaqa uyarillay, paymi qanmanta nin: Manan espadawan sipisqachu wañunki, 5aswanpas thak-kaypin wañupunki. Sumaq q'apaqkunawanmi q'apachisunkiku, imaynan qanmanta ñawpaq kamachikuq taytaykikunamanpas sumaqta q'apachirqanku, ahinatan wañuqtiykipas q'apachisunkiku. Waqanqakutaq: ¡Ay, ikiraqmi, imaraqmi, wiraqocháy! nispanku. Ñoqa kikiymi prometeyki, nispa. Ñoqa Señor Diosmi chayta nini. 6Hinan Jeremiasqa rey Sedequiasman Jerusalenpi lliwta willarqan. 7Chaykamataq Babilonia reypa soldadonkunaqa Jerusalenta, Judapi qhepaq llaqtakunata, Laquis llaqtata, Azeca llaqtatawan muyuykusharqanku, chay iskaynin llaqtallañan allin perqakunayoq llaqtakunamanta qheparqan. 8Rey Sedequiasmi Jerusalenpi tiyaq lliw runakunawan rimanakurqan kamachinkupi kaq runakunata kacharipunankupaq. Chay qhepatataq Señor Diosqa Jeremiasta rimaykurqan. 9Kay rimanakuyqa ruwasqa karqan warmiña, qhariña kamachinku kaqtinpas llaqta-masinkutaqa kacharipunankupaq, manataq pipas llaqtamasinta kamachinpaq hap'inanpaq. 10Chay hinaqa, llapan rimanakuq umallikunan runakunapiwan yuyaykurqanku qhariña warmiña kamachinku kaqtapas kacharipuspa manaña huktawan servichikuyta, paykunaqa kasukuspan kacharipurqanku. 11Chaymantataq ichaqa huk-hinata yuyaykuspa wakmanta kamachi kacharisqankuta kamachi-kayman churaykullarqankutaq. 12Chaymi Señor Diosqa Jeremiasta nirqan: 13–Israelpa Diosnin ñoqa Señormi nini: Egipto suyumanta ñawpa taytaykichista horqomushaspaymi paykunawan rimanakuspa kamachirqani: 14Sapa qanchis watamantan kacharipunki pay kikinmanta qanman vendekuq mayqen Hebreo runaña kaqtinpas. Paymi qanpaq llank'apusunki soqta watantin, qanchiskaq watapitaqmi pasaqpaq kacharipunki, nispa. Ñawpa taytaykichistaqmi ichaqa mana kasukurqankuchu, manataq uyarikurqankupaschu. 15Manaraqmi unayraqchu qankunaq allinkaqta yuyaykuspa munasqayman hina ruwasqaykichisqa, qankunan kacharipurqankichis llaqta-masiykichis kamachiykichista, ñoqa yupaychana wasipiraqtaq qayllaypi rimanakurqankichis. 16Chaymantataq qankunaqa huk-hinata yuyaykurqospa sutiyta saruncharqankichis wakmanta kamachiykichiswan servichikuspa, paykunaqa kacharisqañan karqanku may munasqankuta ripunankupaq, qankunataq wakmanta hap'ispa servichikapushankichis. 17Chaymi ñoqa Señor Diosqa nini: Qankunaqa manan kasuwankichischu llaqta-masiykichis kamachita mana kacharispaykichis, chayraykun kunan ñoqaqa kachamusaq hatun maqanakuyta, onqoyta, yarqaytawan. Ñoqan qankunata wak suyukunaq qhawarispa manchakunankupaq ruwasqaykichis. 18Judá suyuq Jerusalén llaqtaq umallinkuna, reypa oficialninkuna, sacerdotekuna, llapan runakunapiwan ñawpaqeypi rimanakurqanku. Huk torota nak'aspataq kuskanmanta iskayman phasmirqanku, chaypa chawpintataq pasarqanku, ichaqa chay rimanakusqankuta p'akispan mana hunt'arqankuchu. Chaymi imaynan torota ruwarqanku chay hinallatataq paykunatapas ruwasaq. 20Paykunataqa wañuchiy munaq awqankumanmi qaraykusaq, ayankutaq kanqa salqa animalkunaq ankakunaqpas mikhunanpaq. 21Kaqllataq Judá rey Sedequiasta umallinkunatapas wañuchiy munaq awqanku Babilonia soldadokunaman hap'iykachisaq, hinaña kunan kaymanta paykuna wak ladoman rishanku chaypas. 22Ñoqan kamachimusaq wakmanta kutimuspa kay llaqtaman phawaykunankupaq. Hinan llaqtata ninawan hap'iykachinqaku. Ñoqan Judapi llaqtakunata purunyachisaq manan ch'ulla wasipas qhepanqachu. Ñoqa Señor Diosmi chayta nini.

will be added

X\