Jeremías 33

1Cárcel patiollapiraq wisq'asqa Jeremías kashaqtinmi, Señor Diosqa wakmanta nimurqan: 2Ñoqan kani kay pacha ruwaqqa, maychus kasqanpi allin takyachiqqa, ñoqan Señor Diosqa kani. 3Waqyakamuway uyarisqaykin, mana reqsisqayki hatun musphanakunatan rikuchisqayki. 4Ñoqa Israelpa Señor Diosninmi nini: Kay llaqtapi tiyaq runakunaq wasinkunata, Judá reykunaq wasinkunatawan thunirqanku, chaykunawantaqmi hark'achikunata ruwakurqanku espadawan phawaykuq Babilonia soldadokunamanta tupapakunankupaq. 5Caldea runakunan hamurqanku llaqta perqaman seqanakunata ruwaspa phawaykunankupaq. Manchana k'arak phiñakuyniywantaq chay maqanakuq runakunata wañuchirqani, chay thunisqa kaq wasikunapas ayakunawan hunt'aykusqan karqan. Millay mana chanin huchakuna ruwasqankumantan kay llaqtataqa manaña qhawarirqanichu. 6Chaywanpas ñoqan kay llaqtata hampispa qhaliyachisaq, paykunataqa hampisaqpunin, hinaspan paykunaman rikuchisaq thak-kay cheqaq kawsayta, mana imata manchakuspallan tiyanqaku. 7Judata Israeltawanmi wakmanta t'ikarichisaq, hinaspan sayarichisaq imaynan ñawpa karqan hinata. 8Ñoqa contra huchallikusqanmantapas ch'uyanchasaqmi, lliw mana allin ruwasqanmantapas, ñoqa contra sayarisqanmantapas pampachasaqmi. 9Llapan suyukunan uyarinqaku Jerusalenta allin ruwasqayta, chay hinapin kay llaqta ñoqapaq kanqa kusikuy, mentasqa kay, yupaychasqa hatunchasqa kaypiwan. Kay llaqtaman thak-kaytawan allinyaytawan qosqayta rikuspan, huk suyukuna manchakuspa khatatatanqaku, nispa. 10Señor Diosmi nin: Qankunan ninkichis: Kay cheqasqa ch'usaqmi mana runayoq mana uywayoq, nispa. Chay hinapunin Jerusalenpa callenkunapas, Judá suyu llaqtakunapas purun-purun, manataq tiyaq kanchu runapas uywapas, 11ichaqa wakmantan chay cheqaskunapi uyarikunqa kusikuypas q'ochukuypas, casarakuq wayna-sipaspa takinpas, uyarikullanqataqmi ñoqa yupaychana wasiman rispa gracias qoy ofrenda apaqmantapas: Tukuy-atiyniyoq Señor Diosman graciasta qoychis, Señor Diosqa allinmi, munakuyninqa wiñaypaqmi, nispa nisqata. Arí, kay suyutan wakmanta t'ikarichisaq ñawpaq hina kananpaq, nispan nin Señor Diosqa. 12Tukuy-atiyniyoq Señor Diosmi nillantaq: Kay ch'usaq kashaq mana runayoq mana uywayoq suyupin llapan llaqtankunapiwan wakmanta kanqa pastokuna michiqkuna ovejanta mikhuchinanpaq. 13Orqo-orqopi kaq llaqtakunapi, Shefela moqo-moqopi kaq llaqtakunapi, Neguev ch'inneqpi kaq llaqtakunapi, Benjamín hallp'api, Jerusalenpa muyuriqninpi, Judá suyu llaqtakunapipas wakmantan rikunqaku makinwan ovejanta yupashaqta. Ñoqa Señor Diosmi chayta nini. 14Payqa nillantaqmi: Kanqan huk p'unchay Israel llaqtaman Judá llaqtamanwan prometesqayta hunt'anay. 15Chay tiempopin Davidpa mirayninmanta chanin runata sayarichisaq, paymi kay pachantinpi allinta ruwanqa chaninchanqataq. 16Chay p'unchaypin Judaqa qespichisqa kanqa, Jerusalenpas allillanpuni kawsanqa, kay sutiwantaqmi churanqaku: “Señor Diosmi ñoqanchismanta chaninchaspa sayaqqa”, nispa. 17Ñoqa Señor Diosmi nini: Manan hayk'aqpas tukukunqachu Davidpa mirayninmanta Israel kamachikuy tiyanapi tiyaqqa. 18Manallataq chinkanqachu Leví miray sacerdotekunapas ruphachina ofrendakunata, ruru ofrendakunata, wak ofrendakunatapas ñoqaman haywamuwananpaq, nispa. 19Señor Diosmi Jeremiasta nillarqantaq: 20Ñoqan nini: –Tutatapas p'unchaytapas rimanakuspaymi unancharqani iman kaq horasllapipuni chayamunanpaq, chay rimanakusqayqa manan imaynamantapas p'akisqa kanmanchu. 21Chay hinallatataqmi kamachiy Davidwanpas rimanakurqani mirayninpuni paypa kamachikuy tiyananpi tiyananpaq, kaqllataqmi Leví ayllu sacerdotekunawanpas rimanakurqani paykunallapuni serviwananpaq. Chay rimanakusqaykunapas manallataqmi p'akisqa kanmanchu. 22David kamachiypa miraynintaqa kamachiy ruwaq Levipa miraynintawanmi mana yupay atiyta mirachisaq, hanaq pachapi ch'askakunata hinaraq, qocha patapi aqota hinaraq, nispa. 23Señor Diosmi Jeremiasta nillarqantaq: 24–¿Manachu uyarinki chay runakunaq rimasqanta? Paykunan nishanku: ¡Akllakusqan Judawan Israelwanqa iskaynin llaqtan Señor Diospa saqerparisqanña! nispa. Chay runakunan llaqtayta pasaqta pisichaspa mana suyupaqñachu qhawarinku. 25Chaymi ñoqa Señor Diosqa nini: Ñoqan tutawanpas p'unchaywanpas rimanakurqani, kay pachamanpas hanaq pachamanpas churarqani mana p'akinankupaq kamachikuyniyta. Imaynan chaykunapas allin-allin churasqaña, 26chay hinallataqmi Jacobpa mirayninwan kamachiy Davidwanpas rimanakusqayqa hunt'akunqapuni. Davidpa mirayninmantapunin akllasaq Abrahampa, Isaacpa, Jacobpa mirayninta kamachinanpaq. Paykunata khuyapayaspaymi wakmanta kay suyuman kutichimpusaq, nispa.

will be added

X\