Jeremías 31

1Señor Diosmi nin: Chay p'unchaypin llapan Israel ayllukunaq Diosnin kasaq, paykunataq llaqtay kanqa, nispa. 2Señor Diosmi nin: Ch'in pampapin khuyapayaykurqani maqanakuypi mana wañuchisqa llaqtata. Israel ayllukuna samakuyta maskhashaqtinkun 3karullamanta paykunaman rikhurispa nirqani: Ñoqaqa mana hayk'aq tukukuq munakuywanmi munakurqayki, chayraykun wiñay khuyapayakuyniyta mast'arimurqayki. 4Munasqay Israel llaqtalláy, wakmantan allintapuni sayarichisqayki. Wakmantan panderetata hoqarispa kusikuymanta tusukuspa purinki. 5Wakmantan Samaria orqokunapi uvas chakrata ruwanki, chakra llank'aqkunan tarpunqaku, ruruntataq mikhunqaku. 6Chayamunqañan huk p'unchay Efraín orqo-orqopi qhawaqkunaq waqyakunan: ¡Hamuychis! ¡Haku Sionta! ¡Haku Diosninchis Señor Diosman! ninanku, nispa. 7Señor Diosmi nin: ¡Jacobmanta kusisqa takiychis! ¡Llapan suyuq qollanan suyuta hatunchaspa qapariychis! ¡Qaparkachaychis! Yupaychaspa niychis: Llaqtantaqa Señor Diosmi qespichin, Israelmanta puchuqtaqa Señor Diosmi qespichin, nispa. 8¡Uyariychis! Kaqtan wichay suyumantaqa kutichimpusaq, kay pachaq lliw k'uchunmantan huñuykampusaq. Kutimullanqakutaqmi ñawsakunapas wist'ukunapas, wiksayoq warmikunapas chayllaraq wachakuq warmikunapas. ¡Askhallañan kutimpunqaku! 9Waqakuspan kutimpunqaku, pusamushaqtiytaqmi ñoqamanta mañakuwanqaku. Sumaq mayu patantan pusasaq, sumaq ñannintan mana urmanankupaq pusasaq, Israelpa taytan kasqayrayku, Efrainpas phiwi churiy kasqanrayku, nispa. 10Suyukuna, Ñoqa Señor Diospa nisqayta uyariwaychis, karu qocha patapi suyukunaman kayta willamuychis: Israel runakunatan Señor Diosqa ch'eqechirqan, ichaqa wakmanta huñuykuspan ovejata hina michinqa, nispa. 11Arí, ñoqa Señor Diosmi Jacobta kacharichipuni, paymanta aswan atiyniyoq suyuq makinmanta. 12Sión orqo pataman wichaspan kusisqa takinqaku, ñoqaq wakichipusqaywanmi anchatapuni kusikunqaku, trigota, vinota, aceiteta qoqtiymi q'ochukunqaku, ovejakunata, wakakunata qoqtiymi kusikunqaku. Sonqonkupas huerta hinaraqmi llanllanqa, manataq kallpankupas chiriyanqachu. 13Sipaskunan kusikuymanta tusunqaku, waynakunapas machukunapas tusunqaku. Waqayninkutan kusikuyman tukuchisaq, llakikuyninkumantan sonqochaspa kusichisaq. 14Sacerdotekunamanpas allinnin mikhunatan mikhuchisaq, wakichipusqaywanmi llaqtayqa saksaykunqa, nispa. Ñoqa Señor Diosmi chayta nini. 15Señor Diosmi nin: Ramá llaqtapin huk kunka uyarikun, sonqo nanay waqasqan uyarikun. Raquelmi wawankunamanta waqashan, llapan wawankunaq wañusqanmantan sonqonpas mana tiyanñachu, nispa. 16Ichaqa Señor Diosmi nin: Amaña waqaychu, Raquel, waqayniykita ama usuchikuychu, wawaykirayku ruwasqaykitaqa chaskinkin, paykunaqa awqaq suyunmantaqa kutimpunqan. 17Kanraqmi suyakuyniyki qhepa p'unchaypaq, churiykikunaqa suyuman kutimpullanqakun, nispa. 18Señor Diosmi nin: Uyarinin Efraín llaqtaq waqasqanta: ¡Ikiraqmi! ¡Imaraqmi! nispa. Wanachinawaykipaqmi muchuchiwarqanki mana llank'ay yachaq torillota hina. Wakmanta sayarichiway, hinan qanman kutimpusaq, qanpunin Diosniy Señor Diosqa kanki. 19Qanmanta t'aqarikusqay qhepatañan yuyayniyta hap'ikurqani. Huchay reqsikusqay qhepatañan qhasqoyta takakurqani, p'enqakuymantan yanaraq oqeraq tukurqani wayna kaspa huchaypa ñit'iykusqan kasqaymanta, nispa. 20Efraín llaqtaqa munasqay wawaypunin, Efraín llaqtaqa luylusqay churiypunin. Anyaspayñapas manapunin paytaqa qonqanichu, sonqoyraqmi ch'allaq niwan, cheqaqtapunin paytaqa khuyapayasaq, nispa. Ñoqa Señor Diosmi chayta nini. 21Señor Diosmi nin: Munasqay Israel llaqtalláy, risqayki ñanta señalaykuy, purisqayki ñanta tuyruykuy, chay ñantaqa allintapuni reqsiykuy. Munasqay doncella sipas Israel llaqtalláy, kutimpuy, llaqtaykikunaman kutimpuy. 22¿Hayk'aqkaman iskayrayanki hatun sonqo sipas hina? Ñoqa Señor Diosmi mosoq kaqta kay pachapi ruwarqani, casarasqa warmiqa qosanman kutipunqapunin, nispa. 23Israelpa Diosnin Tukuy-atiyniyoq Señormi nin: Apasqa kasqankumanta paykunata kutichimpuqtiymi, Judá suyupipas llaqtankupipas wakmanta ninqaku: Señor Diosmi saminchasunki, Jerusalenpa ch'uya orqon, chanin Diospa tiyanan orqo, nispa. 24Runakunan tiyakapunqa Judá suyupi llaqtankunapiwan, paykunan kanqaku chakra llank'aqkuna uywa michiqkunapiwan. 25Sayk'usqa kaqkunamanmi mosoq kallpata qosaq, pisipasqa kaqkunatan yanapasaq, nispa. 26Chayllamanmi rikch'arirqani misk'i puñusqaymanta. 27Señor Diosmi nin: Chayamunqan huk p'unchay Judamanwan Israelmanwan runakunatapas uywatapas hunt'achinay. 28Imaynan ñoqa kikiy yuyaywan paykunata t'irarqani, kumparqani, wikch'urqani, thunirqani, k'irirqani, ahinallatataqmi yuyaywan sayarichisaqpas wiñachisaqpas. Ñoqa Señor Diosmi chayta nini. 29Chay p'unchaypin manaña wakmanta ninqakuchu: Taytanmi p'osqo uvasta mikhun, churinpa kiruntaqmi “chhuk” nin, nispa. 30Aswanpas pichus p'osqo uvasta mikhuqpa kirunmi “chhuk” ninqa, sapankataqmi kikinpa huchanmanta wañunqa, nispa. 31Señor Diosmi nin: Kanqan huk p'unchay Judawan Israelwan mosoqmanta rimanakuy. 32Kay rimanakuyqa manan ñawpa taytankuwan rimanakusqay hinachu kanqa. Makinkumanta hap'iykuspan, paykunata Egiptomanta horqomurqani, paykunaq qosan hina kashaqtiypas rimanakusqaytaqa p'akirqankun. Ñoqa Señor Diosmi chayta nini. 33Chay p'unchay chayamuqtinmi Israelwan rimanakuyniy kay hina kanqa: Sonqonkumanmi kamachikuyniyta churasaq, yuyayninkumantaq qelqasaq. Ñoqan Diosninku kasaq, paykunataq llaqtay kanqa. Ñoqa Señor Diosmi chayta nini. 34Manañan hukmanta hukchu ñoqata reqsiwanankupaq yachachinakunqaku amigontinpas aylluntinpas, aswanmi huch'uymanta hatunkama lliwlla reqsiwanqaku. Ñoqan pampachasaq mana allin ruwasqankuta, manañataqmi yuyarisaqñachu huchankutapas. Ñoqa Señor Diosmi chayta nini. 35Señor Diosmi p'unchay k'anchananpaq intita churan, tuta k'anchananpaqtaq killata ch'askakunatawan churan. Qochatapas kuyurichin phoqchiqespa qaparinanpaq, Tukuy-atiyniyoq Señor Diostaqmi sutinqa. 36Paymi nin: Chay churasqaykunachus ñawpaqeymanta chinkanman chayqa ñawpaqeypi Israel miraypa suyu-kayninmi wiñaypaq chinkapunman. Ñoqa Señor Diosmi chayta nini. 37Ima p'unchaychus hanaq pachata tupunkuman, kay pachatapas teqsinmantapacha qhawarankuman, chay p'unchaymi ñoqapas Israel miraytaqa wikch'upusaq tukuy mana allin ruwasqankunamanta. Ñoqa Señor Diosmi chayta nini. 38Señor Diosmi nillantaq: Kanqan huk p'unchay llaqtay sayarichisqa kanan Hananeel Torremanta “K'uchu Punku” nisqakama. 39Qorpantaq rinqa cheqanta, chaymanta Garebpa patankama, chaymantataq muyunqa Goa cheqasman. 40Aya wikch'unanku uspha hich'ananku wayq'opas Cedrón mayupi pata-pata chakrakunapas inti lloqsimuy ladopi “Caballo Punku” nisqakaman ñoqapaq t'aqasqa kanqa. Lliw chaykunataq mana hayk'aqpas thunisqachu kumpasqapaschu kanqa, nispa.

will be added

X\