Jeremías 30

1Kay hinatan Señor Diosqa Jeremiasta nirqan: 2–Israelpa Diosnin ñoqa Señormi nini: Huk qelqa k'uyuman llapan qanwan rimasqaykunata qelqay. 3Chayamushanmi Israel llaqtayta Judá llaqtaytawan wakmanta kutichimpunay p'unchay ñawpa taytankuman qosqay hallp'aman chaypi kawsakapunankupaq, nispa. Ñoqa Señor Diosmi chayta nini. 4Kaykunan Israelpaq Judapaqwan Señor Diospa nisqan: 5Señor Diosmi nin: Llaksakuymanta qapariytan uyarini, sinchi manchakuymi, manataq thak-kay kanchu. 6Tapurikuychis, tapupakuychis, ¿qhariqa wawata wachakunmanchu? Chayri, ¿imanaqtintaq teqninku hap'intintakama sapanka qharita rikushani, wachakuy nanaywanpas q'ewikushanman hinata? ¿Imanaqtintaq llapankuri aya uya kashanku? 7¡Ay! ¡Qayllaykamushanñan llaksakuy p'unchay! ¡Chay p'unchay hinaqa manan hayk'aqpas kanchu! Jacobpa llaqtanpaqmi hatun llaki p'unchay kanqa, ñoqataqmi ichaqa chay p'unchaymanta paykunata qespichisaq, nispa. 8Ñoqa Tukuy-atiyniyoq Señor Diosmi nini: Chay p'unchaymi llaqtayta qespichisaq, kamachi kay yugotapas p'akispa, watasqakunatapas p'itispa, manaña huktawan wak llaqtakunaq kamachin kananpaq. 9Ahinapin ñoqa Diosninku Señor Diosllataña serviwanqaku, rey Davidtapas servinqaku, chay reytan ñoqa paykunapaq rikhurichisaq, nispa. 10Chay hinaqa, ñoqa Señor Diosmi nini: Kamachiy Jacob, ama manchakuychu, Israel llaqtalláy, ama musphaychu. Qantaqa karu llaqtamantan qespichisqayki, wawaykikunatapas apasqa kasqan llaqtamantaqa horqompusaqmi. Jacobqa kutimuspa llakhillan kanqa, mana piqpa muchuchisqan allillanmi kanqa. 11Qanwanmi kashani qespichinaypaq. Maykunamanchus qanta ch'eqechisqay suyukunatan llapanta thunisaq, qantataqmi ichaqa manaña thunisqaykichu. Chaywanpas huchaykimantaqa muchuchisqaykipunin, ahinapi wananaykipaq, nispa. Ñoqa Señor Diosmi chayta nini. 12Señor Diosmi nin: K'iriykiqa mana hampiy atiyñan, lliq k'iriykiqa mana thaniy atiyñan. 13Qanqa mana piniyoq hinan kanki, k'iriykitaqa manan pipas hampinmanñachu, manataqmi qhaliyanaykipaq hampi kanñachu. 14Munaqniykikunan qonqarqapusunki, manañan qantaqa yuyarillankupaschu. Ñoqan awqayki hina k'irirqayki, mana khuyapayaspan muchuchirqayki millay mana chanin huchaykimanta, mana yupay atiy huchaykikunamanta. 15¿Imanaqtintaq k'iriykimanta qaparkachanki? Mana hampiy atiymi nanayniykiqa. Millay mana chanin huchaykimantan, mana yupay atiy huchaykikunamantawanmi chay hinata ruwarqayki. 16Ichaqa lliw qan oqoqmi oqosqa kanqa, lliw awqaykitaqmi apasqallataq kanqa, llat'anaqniykikunapas llat'anasqallataqmi kanqa, suwaqniykikunapas suwasqallataqmi kanqa. 17Paykunaqa qanmantan rimaqku: Sionqa qonqasqa alman, Sionqa mana piniyoqmi, nispanku. Ñoqataq ichaqa k'iriykita hampisqayki, k'iriykiqa llullu aychan kapunqa, nispa. Ñoqa Señor Diosmi chayta nini. 18Señor Diosmi nin: Jacobpa ayllunkunatan kutichimusaq, sapanka ayllutan khuyapayasaq, Jerusalentan kikin raqay-raqay patapi sayarichinqaku, kamachikuqpa wasintapas maychus kananpin sayarichinqaku. 19Chaykunapin uyarikunqa gracias qoy takikuna, uyarikullanqataq kusikuymanta asikuykuna. Ñoqan askhayachisaq, manataqmi pisiyanqakuchu, ñoqan altoman hoqarichisaq, manataqmi pisichasqachu kanqaku. 20Jacobpa wawankunaqa ñawpaq hinan kapunqaku, llaqtanpas ñawpaqeypi allintan sayanqa, ñak'arichiqnintapas ñoqan ñak'arichisaq. 21Umallinkupas paykunamantan paqarinqa, kamachikuqninkupas kikin llaqtankumantan kanqa. Paywanmi qayllaykachikusaq, hinan qayllaykamuwanqa. Mana chayqa, ¿pi runataq atinman qayllaykamuwayta? 22Paykunan llaqtay kanqa, ñoqataq Diosninku kasaq. Ñoqa Señor Diosmi chayta nini. 23¡Qhawariychis Señor Diospa manchay kunununuyninta! Señor Diospa k'arak phiñakuyninmi tutuka hatun wayra hina phawanqa, millay runakunaq patanpin t'oqyanqa. 24Señor Diospa phiñakuyninqa manapunin thaninqachu paypa yuyaykusqanman hina hunt'akunankama. Qhepa p'unchaymanmi chaykunata entiendenkichis, nispa.

will be added

X\