Jeremías 3

1Señor Diosmi nin: Huk qhari warminwan t'aqanakapun, warminpas paymanta t'aqakapuspa huk qhariwan casarakapun chayqa, ñawpaq qosanqa manan wakmanta paywan tiyakapuyta atinchu. Chayqa llaqtata qhellichaymi kanman. Chaywanpas qan Israelqa askhawanmi qhelli huchapi purirqanki, kunanqa ñoqawanñataq tiyarqoyta munashanki. Ñoqa Señor Diosmi chayta nini. 2Allintapuni qhawariy q'ara orqokunata. ¿Maypiraqmi honraykita mana t'akakurqankichu? Ch'in pampapi tiyaq Arabia runa hina, ñan patakunallapiña munaqniykikunata suyarqanki. Kay suyutapas millay qhelli huchapi puriyniykiwanmi qhellichaykurqanki. 3Chayraykun tiemponpi parapas mana pararqanñachu, poqochiq parapas mana chayarqanñachu, chaywanpas qanqa rabona warmi hina mana p'enqakuqmi kanki. 4Kunallanmi nishawanki: Taytalláy, sipas kaspa reqsinakuq-masilláy, 5¿phiñasqallapunichu kanki? ¿Hinallapunichu phiñakuyniyki rawranqa? nispa. Chay hinataña nishaspapas ima munasqaykitan mana allinkaqta ruwashallarqankipuni, nispa. 6Josías rey kashaqtinmi Señor Diosqa niwarqan: ¿Rikurqankichu mana kasukuq Israelpa wasanchawasqanta? Paymi hinantin orqo patakunapi llapa q'omer sach'aq llanthunkunapi qhelli huchapi puriq warmi hina huchallikurqan. 7Ñoqataq yuyarqani: Chaykunata ruwasqanmantaqa kutimpullawanqachá, nispa, ichaqa manan kutimunñachu. Chaytan mana hunt'aq ñañan Judaqa rikurqan, 8rikullarqantaqmi mana kasukuq Israelta qatirparipusqayta. Israelmantaqa t'aqakapurqani wasanchawasqan hawan. Chaywanpas Israelpa mana hunt'aq ñañan Judaqa manan mancharikullarqanpaschu, aswanraqmi paypas qhelli huchapi puriyman haykuykapurqan. 9Qhelli huchapi puriynintaqa yuyarqan ruwanalla kasqanpaqmi, chaywanmi ichaqa suyuyta qhellicharqan qaqakunatapas mallkikunatapas yupaychaspa. 10Chaywanpas mana hunt'aq Judaqa manan tukuy sonqonwanchu kutirikamuwarqan, aswanmi q'otullawan kutirimuwarqan. Ñoqa Señor Diosmi chayta nini. 11Señor Diosmi niwarqan: Mana kasukuq Israelqa pisi huchayoqraqmi mana hunt'aq Judamantaqa. 12Riy, hinaspa wichay ladota qhawarispa willamuy, Señor Diosmi nin: Yaw, mana kasukuq Israel runakuna, ñoqaman kutirikamuwaychis, ñoqaqa khuyapayakuqmi kani, manan qanwan phiñakusaqchu, manan tukuy p'unchaychu qanwan phiñalla kashasaq. Ñoqa Señor Diosmi chayta nini. 13Qanqa huchallaykita reqsikuy, ñoqa Diosniyki Señor Dios contra sayarisqaykita reqsikuy, llapa q'omer sach'aq llanthunpi wak dioskuna munakusqaykita, mana kasuwasqaykitapas willakuway. Ñoqa Señor Diosmi chayta nini. 14Mana kasukuq runakuna, kutirimpuwaychis, qankunaqa ñoqaqmi kankichis, sapanka llaqtamantan huk runatakama hoqarikapusqaykichis, sapanka familiamantataq iskay runatakama hoqarikapusqaykichis, hinaspan Sionman kutichipusqaykichis. Ñoqa Señor Diosmi chayta nini. 15Ñoqaq munasqayman hina michiqkunatan qosqaykichis, paykunan sumaq yachaywan allin yuyaywan kamachisunkichis. 16Qankuna suyuykichispi miraspa askhayaqtiykichisqa manan pipas rimanqañachu Señor Diospa rimanakuynin arcamantaqa, manan pipas chaymanta yuyarinqañachu, manataqmi yuyanqapasñachu, manan pipas watukunqañachu, manallataqmi mosoq arcatapas ruwakunqakuñachu. Ñoqa Señor Diosmi chayta nini. 17Jerusalentan chay p'unchayqa sutichanqaku: “Señor Diospa Kamachikuy Tiyanan”, nispa. Llapan suyukunan chayman huñukunqaku yupaychawanankupaq, manañan mana kasukuq k'ullu sonqo hinaqa ruwanqakuchu. 18Chay p'unchay chayamuqtinmi Judaqa Israelwan huñuykakapunqa, wichay lado suyupi kamachi-kaymantataq kutimpunqaku ñawpa taytankuman herenciapaq qosqay hallp'aman, nispa. 19Señor Diosmi nin: Israel llaqtalláy, ñoqaqa maytan munarqani: Qankunata wawaypaq hap'ikapuyta, sumaq munapayana hallp'ata qonaypaq, lliw pachantinmanta aswan sumaq hallp'ata qonaypaq. Ñoqaqa yuyarqani: Taytáy, niwanaykitan, mana hayk'aqpas t'aqakuwanaykitan. 20Ichaqa, qosanta wasanchaq warmi hinan qankunaqa wasanchawarqankichis, nispa. Ñoqa Señor Diosmi chayta nini. 21Señor Diosmi nin: Q'ara orqokunapin waqasqa uyarikun, chayqa Israel runakunaq khuyapayanata munaspa waqasqanmi, huchankuwan waqllipusqankuraykun waqashanku, ñoqa Diosninku Señor Diostapas qonqapuwasqankuraykun waqashanku. 22Ñoqan waqyakuni: Hampuwaychis ñoqaman, mana kasukuq wawaykuna, ñoqan mana kasukuq-kayniykichista hampisqaykichis, nispa. Qankunataq niwankichis: Arí, wakmantan kutimpusaqku, qanmi Diosniyku Señor Diosqa kanki. 23Cheqaqtapunin yanqa kasqa orqo patakunapi yupaychayniykuqa, yanqapaqmi q'ara moqokunapi waqamusqaykupas, sapan Diosnillayku Señor Diospuni Israelpa qespichiqnin kashaqtiyki. 24Millay p'enqakuy Baal diosta yupaychaspaykun pasaqta chinkachikapuyku, may pachamantaraq ñawpa taytaykuq tarisqan ovejakunatapas uywakunatapas churikunatapas ususikunatapas. 25Chhaynaqa, p'enqakuymanta huch'uyyaykukusaqku honrayku t'akasqaykuwan pakaykukuspa. Ñoqaykuqa ñawpa taytaykumantapachan qan Diosniyku Señor Dios contra huchallikurqayku, manan hayk'aqpas kamachikuyniykitaqa kasurqaykupunichu, nispa.

will be added

X\