Jeremías 29

1Profeta Jeremiasmi, Jerusalenmanta cartata qelqarqan Babiloniapi qhepaq kurak taytakunaman, sacerdotekunaman, profetakunaman, llaqta runakunamanwan. Paykunan karqan rey Nabucodonosorpa Jerusalenmanta Babiloniaman preso apachisqan. 2(Chaykunan karqan: Jerusalenmanta rey Jeconías, maman reina, oficialninkuna, Jerusalenmanta Judamantawan umallikuna, artesanokuna, fierro takaqkuna, wakin runakuna apasqa qhepata). 3Judá rey Sedequiasmi Babilonia rey Nabucodonosorman kacharqan Safanpa churin Elasata Hilciaspa churin Gemariastawan, paykunamanmi Jeremiasqa apachirqan preso apasqa kaqkunapaq cartata. Chay cartapin nirqan: 4Israelpa Diosnin Tukuy-atiyniyoq Señormi Jerusalenmanta Babiloniaman lliw preso apasqakunaman nin: 5Wasikunata ruwakuychis, chaypitaq tiyakuychis. Chakrakunata llank'akuychis mikhunaykichispaq. 6Casarakuychis wawakunayoq kanaykichispaq, wawaykichiskunapas casarakuchunku wawakunayoq kanankupaq. Chaypi askhayaychis, amataq pisiyaychischu. 7Llank'aychis apaqniykichis llaqtaq allinninpaq, chay llaqtapaqtaq ñoqamanta mañakunkichis, chay llaqta allin kaqtinqa qankunapas allillantaqmi kankichis. 8Ñoqa Israelpa Diosnin Tukuy-atiyniyoq Señormi niykichis: Aman q'otuchikunkichischu qankuna ukhupi kaq profetakunawanpas watuqkunawanpas, aman uyarinkichischu mosqoykunata willakuqtinkupas. 9Sutiypi paykunaq willasqankuqa llullan, ñoqaqa manan hayk'aqpas kachamurqanichu. Ñoqa Señor Diosmi chayta nini. 10Señor Diosmi nillantaq: Babiloniapi kasqaykichis qanchis chunka wata hunt'akuqtinmi, qankunaq allinniykichista ruwasaq, rimasqaytapas hunt'asaqpunin Babiloniamanta kayman kaqta kutichimpuspay. 11Ñoqaqa yachanin qankunapaq yuyaykusqayta, allinniykichispaqmi yuyaykushani, manan mana allinniykichispaqchu. Suyasqaykichis kawsaytan ima sumaqta qhepaman qosqaykichis. Ñoqa Señor Diosmi chayta nini. 12Chay p'unchaypin qankuna waqyakuwankichis, qayllaykamuwaspan mañakuwankichis, ñoqataq uyarisqaykichis. 13Maskhawaspan tariwankichis, tukuy sonqowan maskhawasqaykichisrayku. 14Arí, qankunaqa tariwankichispunin, wakmantan t'ikarichisqaykichis. Hinantin suyuman ch'eqechisqaytan huñuykampusqaykichis, wikch'usqa kasqaykichis Jerusalén llaqtaman kutimpunaykichispaq, nispa. Ñoqa Señor Diosmi chayta nini. 15Qankunataqmi ninkichis: Kay Babiloniapipas Señor Diosqa qowanchismi profetakunata, nispa. [ 16Tukuy-atiyniyoq Señor Diosmi nin: Davidpa kamachikuy tiyananpi tiyaq reymanta, Babiloniaman apasqa runakunaq ayllun Jerusalenpi kashaq mana apasqa runakunamanta, 17paykunamanmi maqanakuyta, yarqayta, onqoytawan kachaykusaq. Ismusqa higosta hinan mana mikhuy atiyta paykunata ruwasaq. Ñoqa Tukuy-atiyniyoq Señor Diosmi chayta nini. 18Paykunatan maqanakuywan, yarqaywan, onqoypiwan qatiykachasaq, chayta rikuspan llapa suyukuna manchakuymanta khatatatanqaku. May suyumanña apachisqaypipas pisicharparisqan kanqaku hatun p'enqaypi rikukuspa, runakunataq paykunaq sutinta hoqarispa hukkunata ñakanqaku. 19Chay hinan kanqa sapa kuti hina kamachiy profetakunawan willachishaqtiy mana kasukusqankumanta mana uyarikusqankumanta. Ñoqa Señor Diosmi chayta nini.] 20Jerusalenmanta Babiloniaman apachisqa runakuna, uyariychis Señor Diospa nisqanta: 21Ñoqa Israelpa Diosnin Tukuy-atiyniyoq Señormi Colaiaspa churin Ahabmanta, Maasiaspa churin Sedequiasmantawan niykichis: Paykunan llullakuspa ñoqaq sutiypi nisunkichis. Paykunatan rey Nabucodonosorman hap'iykachisaq, qayllaykichispin paykunata wañuchinqa. 22Chaymi Judamanta Babiloniaman apasqa kaqkunaqa pitapas ñakayta munaspaqa ninqaku: Imaynan Sedequiasta Ahabtawan Babilonia reyqa ninapi q'aspachirqan, ahinata qantapas Señor Diosqa ruwachun, nispa. 23Paykunan millay mana ruwanata Israel llaqtapi ruwarqanku, runa-masinkuq warminwan wasanchay huchata ruwaspa, llullakuspataq sutiypi rimarqanku ñoqaq mana kamachisqayta. Chay ruwasqankutaqa ñoqa kikiymi yachani, rikunitaq. Ñoqa Señor Diosmi chayta nini. 24Israelpa Diosnin Tukuy-atiyniyoq Señormi Jeremiasta kamachirqan Nehelam llaqtayoq Semaiasman ninanpaq. 25Chay Semaiasmi Babiloniamantapacha Jerusalenpi kaq llapan runakunaman Maasiaspa churin sacerdote Sofoniasman wakin sacerdotekunamanwan pay kikin qelqamuspa nimusqa: 26Señor Diosmi qanta churarqasunki sacerdote Joiadaq rantinpi kanaykipaq. Yupaychana wasipiqa qanmi kurak kanki. Huk waq'aña profetaman tukuspa rimaqtinpas, qanmi carcelman kunkanmanta fierro cadenawan wataspa churanaykipaq kamachisqa kanki. 27¿Imanaqtintaq Anatot llaqtayoq Jeremiastari mana anyankichu, qankunaq qayllaykichispi profeta hina rimashaqtin? 28Babiloniakamapas qelqataraqmi apachimuwarqanku, chaypitaq nimusqa: Preso apasqa runakunaqa unaytan kamunkichis, wasita ruwakuspa tiyaychis, chakrata llank'aychis mikhunaykichispaq, nispa. 29Chaytataq sacerdote Sofoniasqa Jeremiasman leeykurqan. 30Hinan Señor Diosqa Jeremiasta nirqan: 31–Willachiy llapan preso apasqa runakunaman, Señor Diosmi Nehelam llaqtayoq Semaiasmanta nin: Semaiasmi mana ñoqa kamachishaqtiy nirqasunkichis, yanqataq q'otuspa suyarayachirqasunkichis. 32Chay hawan ñoqa Señor Diosqa Semaiasta miraynintawan muchuchisaq. Paypa mirayninqa manan kay llaqtapi kapunqachu, manataqmi llaqtayman allin kawsay qosqaypipas kawsaysikunqachu, llaqtayman rimaspa ñoqa contra sayarichisqanmanta, nispa. Ñoqa Señor Diosmi chayta nini.

will be added

X\