Jeremías 27

1Josiaspa churin Sedequías Judapi kamachikuyta qallarishaqtinmi, Señor Diosqa Jeremiasta nirqan: 2–Lazokunata yugotawan ruwakuy, chaytataq kunkaykiman watakuy. 3Hinaspan Edom suyu reyman, Moab suyu reyman, Amón suyu reyman, Tiro llaqta reyman, Sidón llaqta reymanwan willachimunki paykunaq sutinpi Jerusalenpi kaq rey Sedequiasman hamuq runakunawan. 4Kamachinkitaq reyninkuman kayta willanankupaq, Israelpa Diosnin Tukuy-atiyniyoq Señormi nin: 5Ñoqan hatun atiyniyoq kallpaywan kay pachata runantinta uywantinta ruwarqani, chaytaqa pi munasqaymanmi qoni. 6Kunantaq llapa suyukunata Babilonia rey kamachiy Nabucodonosorpa kamachin kanankupaq qoni, salqa animalkunatawanpas qollanitaq payta servinankupaq. 7Llapa suyukunan payta servinqaku, wawanpa wawankamaraq, Babilonia suyuq atipasqa kanan p'unchay chayamunankama. Hinan Babilonia runakunaqa askha suyukunaq hatuchaq reykunaq atipasqan kanqaku. 8Mayqen suyupas mayqen reypas Nabucodonosorta mana serviyta yugontapas mana apayta munaqtaqa ñoqan muchuchisaq hatun maqanakuywan yarqaywan onqoywan ima, llapachallanku paypa kamachinpi kanankukama. Ñoqa Señor Diosmi chayta nini. 9Chayrayku ama uyariychischu profetaykichistapas, watuqniykichistapas, mosqoy willaqniykichistapas, layqaykichistapas, wañusqakuna rimachiqniykichistapas. Paykunan nisunkichis: Aman Babilonia reytaqa servinkichischu, nispa. 10Chaytaqa llullakuspan nishasunkichis, chay hawan llaqtaykichismanta apasqa kankichis. Ñoqan wikch'usqaykichis, hinan wañumunkichis. 11Aswanmi mayqen suyupas Babilonia reypa kamachinta ruwaspa yugonta apaqqa kaq hallp'allanpi qhepakunqa chakranta llank'akuspa. Ñoqa Señor Diosmi chayta nini. 12Chaytataqmi ñoqa Jeremiasqa Judá rey Sedequiasman iman kaqta willarqani: Babilonia reyta llaqtantawan serviychis yugontapas apaychis, chay hinapin kawsankichis. 13¿Imaraykutaq awqa-tinkuypipas, yarqaypipas, onqoypipas wañuyta munankichis qanpas llaqtayki runapas? Babilonia reyta mana kasuqkunaqa chay hinapin wañunqaku Señor Diospa nisqanman hina. 14Ama profetaykichiskunataqa kasuychischu. Paykunan nisunkichis: Aman Babilonia reytaqa servinkichischu, nispa, chaytaqa llullakuspan rimanku. 15Señor Diosmi nin: Manan ñoqachu kachamuni, aswanpas llullakuspan sutiypi rimanku. Chay hawan suyuykichismanta wikch'usqaykichis, qankunapas profetaykichispas wañunkichispunin, nispa. 16Kaqllataq sacerdotekunaman llaqta runakunamanwan nirqani, Señor Diosmi nin: Ama profetaykichista uyariychischu. Paykunan nishallankupuni: Señor Dios yupaychana wasipi serviciokunata Babiloniaman apasqankutan yaqaña apampunqaku, nispa, chaytaqa llullakuspan nishanku. 17¡Amapunin uyarinkichischu! ¡Hinalla Babilonia reypa kamachin kaychis, kawsallankichismi! ¿Imanaqtintaq kay llaqtari raqay-raqayman tukunman? 18Cheqaq profetachus kanku chayqa, simiytapas uyarirqankupunitaq chayqa, ñoqamantayá mañakamuwachunku ñoqa yupaychana wasipi serviciokuna Judá reypa wasinpi kaqkuna Jerusalenpi kaqkunapas ama Babiloniaman apasqa kananpaq, ñoqan Tukuy-atiyniyoq Señor Diosqa kani, nispa. 19Dios yupaychana wasi haykunapi tusakunata, broncemanta qochata, carretakunata, llaqtapi wakin kaqkunatapas, 20manan Nabucodonosorqa apasqachu, Judá rey Joacimpa churin Jeconiasta lliw umalli runakunatawan Jerusalenmanta Judamantawan Babiloniaman apashaspaqa. 21Dios yupaychana wasipi qhepaqkunamanta, Judá reypa wasinpi, Jerusalén reypa wasinpi qhepaqkunamantan Israelpa Diosnin Tukuy-atiyniyoq Señorqa nillarqantaq: 22Babiloniamanmi chaykunata apapunqaku, chaypin qhepampunqa ñoqaq watukunaykama. Chaymantataqmi kayman churanaypaq kutichimpusaq, nispa. Ñoqa Señor Diosmi chayta nini.

will be added

X\