Jeremías 24

1Babilonia rey Nabucodonosormi Jerusalenmanta suyunman presota aparqan Judá rey Joacimpa churin Jeconiasta, Judapi umalli runakunata, artesanokunata, fierro takaq runakunatawan. Chaykuna qhepatan Señor Diosqa rikuchiwarqan yupaychana wasiq ñawpaqenpi iskay canasta higosta. 2Hukkaq canastapi higosmi kasqa ñawpaq poqoqmanta allinnin, hukkaqpitaq kasqa millay mana mikhuykuy atiy higos. 3Hinan Señor Diosqa tapuykuwarqan: Jeremías, ¿imatan rikushanki? nispa. Ñoqataq nirqani: Higostan, sumaq kaqqa may sumaqpunin kashan, mana allin kaqtaq millaypuni kashan, mana mikhuykuy atiyraq, nispa. 4Chaymi Señor Diosqa niwarqan: 5Ñoqa Israelpa Diosnin Señormi nini: Chay sumaq higosta hinan qhawarisaq Judamanta apasqanku runakunata, Caldea runakunaq suyunmanqa ñoqan paykunata apachirqani. 6Chaypin sumaqta rikumusaq, kay llaqtamantaq kutichikampusaq. Paykunataqa sayarichisaqmi manataq thunisaqchu, takyachisaqmi manataq t'irasaqchu. 7Allin yuyaytan qosaq ñoqa Señor Dios kasqayta reqsiwanankupaq, tukuy sonqowanmi ñoqaman kutirimpuwanqaku. Paykunan llaqtay kanqa, ñoqataq Diosninku kasaq. 8Ichaqa Judá rey Sedequiasta, umalli runakunata, Jerusalenpi qhepakuqkunata, suyupi qhepakuqkunata, hinallataq Egiptoman pasakuqkunatapas chay millay mana mikhuy atiy higosta hinan qhawarisaq. 9Paykunatan wak suyukunapaq sinchi mancharikuyta ruwasaq, maymanchus ch'eqechisqay suyukunapin paykunaqa kanqaku k'aminapaq, rimaypi rimanapaq, asikunapaq, ñakanapaqwan. 10Paykunamanqa kachaykusaqmi awqa-tinkuyta, yarqayta, hatun onqoytawan, ñawpa taytankuman qosqay suyupi llapanku tukukunankukama, nispa.

will be added

X\