Jeremías 23

1Señor Diosmi nin: ¡Ay, imaynaraqmi kanqa michiqkunaqa, paykunan ovejaykunata chinkachispa ch'eqerichirqanku! nispa. 2Israelpa Señor Diosninmi nillantaq: Llaqtay michiqkuna, qankunan ovejaykunata ch'eqechispa chinkachirqankichis, mana allinta michispa. Chayraykun millay ruwasqaykichismanta ñak'arichisqaykichis. 3Chaymantataq ñoqa kikiy puchuq ovejaykunata suyukunaman ch'eqechisqamanta huñuykakampusaq, kaq t'aqanmanmi kutichikampusaq, chaypin askhata miranqaku. 4Huk michiqkunatan paykuna qhawaqta churasaq, ovejakunataq mana manchakuspa llakhilla tiyanqaku, manataq chinkanqakupaschu, nispa. 5Señor Diosmi nin: Chayamunqan huk p'unchay Davidpa mirayninmanta chanin runa sayarichinay, paymi rey kanqa, allin yachaywan kamachiq, paymi suyuntinpi allinta ruwanqa chaninchanqapas. 6Pay kamachikushaqtinqa allillanmi Judaqa kanqa, Israelpas thak-kaypin kawsanqa. Kay sutiwantaqmi sutichasqa kanqa: “Señor Diosmi chaninchay ruwapuwaqninchisqa”, nispa. 7Señor Diosmi nin: Chayamunqan p'unchaykuna, manaña kay hinata jurananku: Egiptomanta Israel runakunata horqomuq Señor Diospa sutinpin jurani, nispa. 8Aswanmi juranqaku: Wichay suyumanta Israel runakunata horqomuq Señor Diospa sutinpin jurani, nispa. Kaqllataq: Hinantin suyukunapi ch'eqeykusqa Israel runakunata horqomuq Señor Diospa sutinpin jurani, nispa. Ahinapin kaq hallp'ankupi tiyakapunqaku, nispa. 9Jeremiasmi profetakunamanta nin: Hawapi-ukhupi sonqollayoqñan kashani, lliw cuerpoymi khatatatashawan. Machasqa runa hinaraqmi kashani, t'ili machasqa hinaraqmi kashani, Señor Dios hawa, ch'uya siminkuna hawa. 10Suyuntinpin wasancha hucha ruwaqkuna hunt'a kashan, kawsayninkuqa sinchi mana allinmi kashan, munayniyoq kaspankun mana allinkunata ruwanku. Chaymantan Señor Diosqa kay hallp'ata ñakan, hallp'ataq llakikuymanta ch'akiykapun, ch'inneqpi pastokunapas ruphasqa hinan ch'akirqapun, nispa. 11Señor Diosmi nin: Profetakunapas sacerdotekunapas mana allin ruwaqkunan kanku, wasiypipunin tarini millay ruwashaqta. 12Chayraykun ñanninkupas tutayaqtaq llusk'anataq kanqa, ñoqan tanqarparisaq kumpakunankupaq. Paykunata ruwasqankumanta muchuchinay watapin hatun llakiwan ñit'iykachisaq. Ñoqa Señor Diosmi chayta nini. 13Samaria profetakunataqa ñoqa kikiymi rikurqani millakusqayta ruwashaqta: Baal diospa sutinpin profetizarqanku, Israel llaqtaytapas pantachirqanku. 14Jerusalén profetakunataqa ñoqa kikiymi rikurqani millay mana allinkuna ruwashaqta: Wasancha huchakunatan ruwanku, llullakuspan kawsanku, millay ruwaqkunatan kallpachanku, chaymi pipas millay ruwaynintaqa mana wikch'unchu. Ñoqapaqqa llapanmi Sodoma runakuna hina kanku, Jerusalenpi tiyaq runakunapas Gomorra runamanmi rikch'akunku. Ñoqa Señor Diosmi chayta nini. 15Chayraykun Tukuy-atiyniyoq Señor Diosqa profetakunamanta nin: Qhawariy, kunanmi mikhunankupaq qosaq ajenjota, qollasaqtaq ukyanankupaq venenoyoq unuta, Jerusalenpi profetakunamanta hinantin suyuman mana allin-kay mast'arikusqanmanta, nispa. 16Tukuy-atiyniyoq Señor Diosmi nillawarqantaq: Profetakunaq nisqasuykichistaqa ama kasuychischu, nisqasuykichisqa lliwmi yanqa llullakusqakunalla. Paykunaqa rimanku kikinkuq yuyaykusqallankutan, manan ñoqa Señor Diospa nisqaykunatachu. 17Simiykunata pisichaqkunamanmi ninku: Lliw imapas allillanmi kasunkichis, nispa. Rumi sonqonkuman hina kawsaqkunamanmi ninku: Manan ima mana allinpas kasunkichischu, nispa. 18Jeremiasmi nirqan: Señor Dios yuyaykusqankuta willashaqtin, ¿pitaq chaypi kasharqan siminkunata rikunanpaq uyarinanpaqwan? ¿Pitaq llapan nisqanta makilla kasukurqan? 19¡Qhawariychis Señor Diospa manchay kunununuyninta! Señor Diospa k'arak phiñakuyninmi tutuka hatun wayra hina phawanqa, millay runakunaq patanpin t'oqyanqa. 20Señor Diospa phiñakuyninqa manapunin thaninqachu paypa yuyaykusqanman hina hunt'akunankama. Qhepa p'unchaymanmi chaykunata entiendenkichis, nispa. 21Señor Diosmi nin: Chay profetakunataqa manan ñoqachu kachamurqani, paykunan ichaqa phawaylla pasamurqanku. Manapunin rimaykurqanichu, ichaqa sutiypiraqtaqmi willakurqankupas. 22Ñoqaq yuyaykusqayta willashaqtiychus chaypi kashankuman karqan chayqa, llaqtaymanchá simiykunata uyarichinkuman karqan, millay ñanninkumanta t'aqakunkumanchá karqan, mana allin ruwasqankumanta karunchakunkumanchá karqan, nispa. 23Señor Diosmi nin: Karupipas qayllapipas ñoqallapunin Diosqa kani. 24¿Pitaq ñawiymantaqa pakakuyta atinman? ¿Manachu ñoqaqa hunt'aykushani hanaq pachatapas kay pachatapas? Ñoqa Señor Diosmi chayta nini. 25Ñoqan uyarirqani chay profetakunaq nisqanta, paykunan llullakuspa sutiypiraqtaq willakunku: ¡Mosqokusqanin! ¡Mosqokusqanin! nispa. 26¿Hayk'aqkamataq chay profetakunaqa hinalla kanqaku? ¿Hayk'aqkamataq llullakuspa willanqaku paykuna kikinkuq sonqonkupi yuyaykusqankuta? 27Mosqokusqankuta hukman-hukman willaspankun llaqtaypa qonqapuwananta munanku, imaynan ñawpa taytankupas Baal diosta yupaychaspanku qonqapuwarqanku hinata. 28Huk profetachus mosqokun chayqa, mosqoy kasqanta sut'inta willachun. Simiytataqchus chaskin chaypas, cheqaqtapuni willachun. Ñoqa Señor Diosmi chayta nini. 29¿Imaynatan kuskachakunman ichhuqa trigowan? Simiyqa nina hinan, simiyqa combo hinan, qaqatapas ch'eqtanraqmi. Ñoqa Señor Diosmi chayta nini. 30Chayraykun chay profetakuna contra kashani, paykunan profetamasinkuq siminta suwakuspa rimanku, hinaspa simiypas kanman hinataraq rimanku. Ñoqa Señor Diosmi chayta nini. 31Paykunaqa kikinkuq rimasqankutan rimasqayman tukuchinku, arí, paykuna contrapunin kashani. Ñoqa Señor Diosmi chayta nini. 32Llulla mosqokusqankuta willaq profetakuna contran kashani. Paykunan llullakuspa thawtisqankuwan llaqtayta pantachinku. Manan ñoqaqa paykunataqa: Riy, nirqanichu, manataq kacharqanipaschu. Paykunaqa llaqtayta mana imapi yanapaykuqkunan kanku. Ñoqa Señor Diosmi chayta nini. 33Señor Diosmi niwarqan: Jeremías, qantachus tapusunki llaqta runapas profetapas sacerdotepas: ¿Iman Señor Diospa willakuynin kashan? nispa chayqa, qanqa ninkin: Señor Diosmi nin: Qankunan ñoqapaq q'epi kankichis, chaymi pampaman wikch'usqaykichis, nispa. Ñoqa Señor Diosmi chayta nini. 34Kaqllataq huk profetapas sacerdotepas mayqen runapas ninqa: Kayqa Señor Diospa willakuyninmi, nispa. Chay runataqa familiantintan muchuchisaq. 35Qankunapurapi tapunakuspaqa ninaykichismi: ¿Ima nispan Señor Diosqa nishan? ¿Imatañan Señor Diosqa rimashan? nispa. 36Ichaqa amañan wakmanta ninkichischu: Señor Diospa willakuynin nispaqa. Pillapas nillanqapuni chayqa, rimasqan simin paypaqqa q'epi kapunqa. Qankunaqa Kawsaq Dios Tukuy-atiyniyoq Señor Diosninchispa simintan chanzakuspa huk-hinaman tukuchinkichis. 37Profetataqa kay hinatan ninkichis: ¿Ima nispan Señor Diosqa nishasunki? ¿Imatañan Señor Diosqa rimapayashasunki? nispa. 38Qankunataqchus ninkichis: Señor Diospa willakuynin, nispa chayqa, qan Jeremiasmi ninki, Señor Diosmi nin: Amañan ninkichischu nishaqtiypas, qankunaqa rimashallankichispunin, Señor Diospa willakuyninmi, nispa. 39Chay hawan qankunaman ñawpa taytaykichisman qosqay llaqtatapas qankunatawan kuskata q'epirparispa ñoqamanta karuman wikch'umusqaykichis. 40Qankunatan pasaq p'enqayman pisichaymanwan wiñaypaq churasqaykichis, mana hayk'aq qonqanata, nispa.

will be added

X\